គ្រឿងផ្សំ៦ ជួយឲ្យគូស្នេហ៍ស្រលាញ់គ្នាដល់ចាស់កោងខ្នង ក៏មិនបែក

2018-04-28 02:40:14
ចំនួនមតិ 0 | ចំនួនចែករំលែក 0

បច្ចុប្បន្ននេះអ្នកស្រលាញ់គ្នាហើយបែកគឺមានច្រើន ប៉ុន្តែជឿថាមនុស្សស្រីភាគច្រើនក៏មិនចង់បានស្នេហាដែលចាប់ផ្ដើមហើយក៏ត្រូវបញ្ចប់ដែរ មែនអត់? ដូច្នេះហើយថ្ងៃនេះ កញ្ញា នឹងបង្ហាញពីវិធីសាស្ត្រមួយចំនួនដើម្បីធ្វើឲ្យស្នេហារឹងមាំបានយូរអង្វែង៖

១. ភាពស្មោះត្រង់

ភាពស្មោះត្រង់គឺជាមូលដ្ឋាន ដែលចាត់ទុកថាសំខានខ្លាំងណាស់ដើម្បីឲ្យជីវិតគូដើរទៅមុខដោយរលូន។ បើមានភាពស្មោះត្រង់ហើយ ការកុហក ការក្បត់ចិត្ត ការមិនទុកចិត្ត ឬការរករឿងគ្នាក៏នឹងមិនកើតឡើងដែរ។

២. ការយកចិត្តទុកដាក់

ការយកចិត្តទុកដាក់គឺការគិតគូរ ខ្វល់ខ្វាយពីគ្នាជានិច្ច។ ពេលខ្លះការយកចិត្តទុកដាក់អាចសំដៅលើ ការដែលយើងដឹងថាដៃគូរបស់យើងចូលចិត្តអ្វី មិនចូលចិត្តអ្វី ចងចាំថ្ងៃសំខាន់របស់គ្នា។ បើទោះបីវាមើលទៅជារឿងតូចតាច ប៉ុន្តែរឿងតូចៗទាំងនេះហើយដែលអាចធ្វើឲ្យបេះដូងមនុស្សដែលយើងស្រលាញ់ទទួលបានភាពកក់ក្ដៅ និងអារម្មណ៍មានក្ដីសុខ។

៣. ចែករំលែកបញ្ហា

នៅថ្ងៃណាដែលមានបញ្ហាមិនសប្បាយចិត្តគូស្នេហ៍គួរចែករំលែកឲ្យគ្នាដឹង មិនថាជាបញ្ហាគ្រួសារ មិត្តភ័ក្ដិ ឬការងារ។ ដៃគូជីវិតគួរតែជាមនុស្សដែលអាចនិយាយគ្នាបានគ្រប់រឿង មិនថារឿងល្អ ឬរឿងអាក្រក់ មានប្រយោជន៍ ឬអត់ប្រយោជន៍ក្ដី គឺយើងគួរតែទទួលស្ដាប់បញ្ហារបស់គ្នា និងជួយដោះស្រាយគ្នា ដោយមិនលាក់បាំង។

៤. មិនសើរើរឿងចាស់

រឿងមួយដែលមិនអាចជៀសបានសម្រាប់គូស្នេហ៍ គឺការឈ្លោះទាស់ទែងគ្នា មិនថាជារឿងតូច ឬរឿងធំ ប៉ុន្តែរឿងមួយដែលចង់ឲ្យគូស្នេហ៍គ្រប់គ្នាធ្វើនោះគឺ មិនថាឈ្លោះគ្នាដោយសាររឿងអ្វីក៏ដោយ គួរតែព្យាយាមស្វែងយល់ពីគ្នា ហើយធ្វើយ៉ាងណាឲ្យបញ្ហានោះចប់តែក្នុងរយៈពេលមួយថ្ងៃ ហើយកុំយករឿងដដែលៗមករំឭកនាំឲ្យឈ្លោះគ្នា ព្រោះវានឹងធ្វើឲ្យម្នាក់ៗមានអារម្មណ៍មិនល្អទទេៗ។

៥. បន្ថែមក្ដីស្រលាញ់ឲ្យគ្នាជានិច្ច

រកពេលវេលាទៅធ្វើអ្វី ឬញ៉ាំអ្វីខាងក្រៅផ្ទះ ទៅដើរលេង Shopping តែពីរនាក់ខ្លះ ព្រោះក្រៅពីបានពេលវេលាធ្វើអ្វីជាមួយគ្នាហើយ វាក៏ជាការផ្លាស់ប្ដូរបរិយាកាសឲ្យស្រស់ថ្លា ប្លែកភ្នែក ប្លែកអារម្មណ៍ និងបន្ថែមភាពផ្អែមល្ហែមឲ្យគ្នាបានយ៉ាងល្អ។ ធ្វើយ៉ាងណាកុំឲ្យមានភាពប្រែប្រួល ដំបូងៗស្រលាញ់គ្នាយ៉ាងណា ត្រូវរក្សាសកម្មភាពទាំងនោះឲ្យបានច្រើនតាមដែលអាច។

៦. សុំទោស និងអភ័យទោស

ចង់ឲ្យគូស្នេហ៍គ្រប់គូព្យាយាមនិយាយពាក្យ “សុំទោស” ជាមួយគ្នាខ្លះ មិនថាកំហុសនោះតូចយ៉ាងណា ព្រោះឲ្យតែអ្នកនិយាយពាក្យនេះចេញមក ដៃគូរបស់អ្នកនឹងព្រមអភ័យទោស។ កុំគិតថាការសុំទោសមុនគឺព្រមចាញ់ ព្រោះការយកឈ្នះគ្នាពេលខ្លះវាធ្វើឲ្យយើងបាត់បង់មនុស្សល្អៗពីខ្លួនក៏ថាបាន ៕