សញ្ញាទាំង ៩ បញ្ជាក់ថាមិត្តអ្នកច្រណែន ព្រោះឃើញអ្នកល្អជាង

2018-04-25 07:30:00
ចំនួនមតិ 0 | ចំនួនចែករំលែក 0

ការច្រណែនគឺជាអ្វីដែលមនុស្សយើងគួរតែបោះបង់ចោល ព្រោះវាគ្មានបានអ្វីមកវិញក្រៅពីភាពមួម៉ៅក្តៅក្រហាយក្នុងចិត្តនោះទេ។ បើឃើញគេល្អជាង គួរកោតស្ញប់ស្ញែង ខិតខំប្រឹងប្រែងឲ្យបានដូចគេ។ យ៉ាងណាមិញ បើមានអ្នកដទៃមកច្រណែន អ្នកមិនសូវជាខ្វល់ប៉ុន្មានទេ ប៉ុន្តែសូម្បីតែមិត្តភ័ក្ដិខ្លួនឯងក៏អីចឹងដែរ អ្នកច្បាស់ជាហួសចិត្ត។ ខាងក្រោមនេះជា សញ្ញាទាំង៩ ដែលអាចបញ្ជាក់យ៉ាងច្បាស់ ថាអ្នកពិតជាមានមិត្តភ័ក្ដិប្រភេទនោះ ៖

១. ចូលចិត្តនិយាយថា "អយុត្តិធម៌"

មិនថាពិន្ទុនៅក្នុងថ្នាក់ ការងារ ស្នេហា ឬរបស់ដែលអ្នកប្រើប្រាស់ គេតែងនិយាយថា ហេតុអ្វីកើតមកអយុត្តិធម៌ម្ល៉េះ មិនមានអ្វីដូចដែលអ្នកកំពុងតែមានសព្វថ្ងៃនេះសោះ? ពួកគេចូលចិត្តបន្ទោសនេះបន្ទោសនោះ នៅពេលគេមិនអាចទទួលបាន នូវអ្វីដែលអ្នកទទួលបាន។

២. តែងតែចង់ប្រកួតប្រជែងជាមួយអ្នក

បើក្នុងការរៀនសូត្រមិនសូវអីប៉ុន្មានទេ ប៉ុន្តែបើចង់ប្រកួតប្រជែងគ្រប់រឿង សូម្បីតែការស្លៀកពាក់ ការតុបតែងខ្លូន ខ្លាចចាញ់ឈ្នះគ្នាដែរនោះ ច្បាស់ណាស់គេពិតជាមានចិត្តច្រណែន។

៣. មានគំនិតអវិជ្ជមាន

ឧទាហរណ៍ថា អ្នកបានសម្ភាសន៍ជាប់ធ្វើការនៅក្រុមហ៊ុនមួយ នៅពេលប្រាប់មិត្តហើយ បែរជានិយាយថា ក្រុមហ៊ុនមួយនោះមិនសូវល្បី ប្រហែលជាគ្មានអ្នកដាក់ច្រើន ទើបឯងជាប់។ និយាយរួមទៅគឺគេតែងមានគំនិតអវិជ្ជមាន ចំពោះភាពជោគជ័យរបស់អ្នក។

៤. មិនសរសើរអ្នក ប៉ុន្តែនិយាយអួតខ្លួនឯង

ធ្វើម៉េចគេនឹងមកសរសើរអ្នក ព្រោះខ្លាចធ្វើឲ្យខ្លួនគេមើលទៅអន់ជាងអ្នកនោះអី។ មិនសរសើរក៏ហីចុះ ប៉ុន្តែថែមទាំងមកអួតថា គេធ្លាប់ធ្វើបានល្អលើសហ្នឹងទៅទៀត។

៥. មិនគោរពការសម្រេចចិត្តរបស់អ្នក

ឧទាហរណ៍ថា ពេលអ្នកសម្រេចចិត្ត ត្រូវទៅលេងនៅប្រទេសដែលអ្នកគិតប៉ងប្រាថ្នា យូរមកហើយនោះ ស្រាប់តែមិត្តអ្នកបានលឺ មិនជួយត្រេកអរហើយ ថែមទាំងនិយាយរិះគន់ពីប្រទេសនោះទៀត។

៦. ងប់ងុលនឹងតំណែងតួនាទី

ភាពច្រណែនឈ្នានីសគ្នា តែងតែកើតចេញពី ឋានៈ មុខតំណែង តួនាទីនេះឯង។ បើមិត្តអ្នកជាមនុស្សពូកែច្រណែន គេច្បាស់ជាព្រួយបារម្ភ ខ្លាចអ្នកបានតំណែងលើសគេ ឬពេលដែលអ្នកបានហើយ គេក៏នៅមិនសុខក្នុងចិត្តដូចគ្នា។

៧. ធ្វើពុទ្ធជាសប្បាយ ពេលអ្នកប្រាប់ដំណឹងល្អ

មានដែលចាប់អារម្មណ៍អត់ថា ពេលដែលអ្នកមានដំណឹងល្អមកប្រាប់ មិត្តអ្នកមានភាពត្រេកអរ រួមនឹងស្នាមញញឹមមួយ ដែលមើលទៅដូចជាមិនចេញពីចិត្តពិតទាល់តែសោះ។ នេះមកពីគេមានគំនិតថា ដំណឹងល្អរបស់អ្នក មិនមែនជាក្តីសុខរបស់គេ។

៨. មិនលើកទឹកចិត្ត

ពេលដែលអ្នកធ្វើអ្វីមួយមិនបានដូចបំណង គេមិនជួយលើកទឹកចិត្តទេ បែរជាសួរពីហេតុផលដែលអ្នកធ្វើមិនបានទៅវិញ។

៩. មិនគាំទ្រ

មិនមែនត្រឹមតែមិនជួយលើកទឹកចិត្តទេ ថែមទាំងមិនគាំទ្រ ពេលដែលអ្នកមានគម្រោងចង់ធ្វើអ្វីមួយ ព្រោះខ្លាចអ្នកទទួលជោគជ័យច្រើនជាងគេ។

ទោះបីមិត្តអ្នក ជាមនុស្សពូកែច្រណែនយ៉ាងក៏ដោយ មិនមែនមានន័យថាអ្នកត្រូវខឹងគេ ហើយបញ្ចប់ទំនាក់ទំនង មិត្តភាពជាមួយគ្នានោះទេ។ អ្នកត្រូវចេះរកមធ្យោបាយ និងបើកចិត្តឲ្យទូលាយដើម្បី ឲ្យពួកគេអាចកាត់បន្ថយនូវ ភាពច្រណែននោះបានខ្លះ។

ចុចអានបន្ត៖