ពេលមួយដែលខ្ញុំអស់សង្ឃឹមលើស្នេហាបំផុត ខ្ញុំមានតែដើរចេញ

2018-04-09 07:08:13
ចំនួនមតិ 0 | ចំនួនចែករំលែក 0

នៅពេលដែលអ្នកអស់សង្ឃឹមខ្លាំងបំផុតលើស្នេហា តើអ្នកនឹងធ្វើអ្វីបន្ត? បើសូម្បីតែក្ដីសង្ឃឹមបន្តិចក៏អ្នកលែងមាននោះ តើអ្នកអាចនឹងឈរចំពោះមុខស្នេហាអ្នកទៀតបានទេ?

រូបតំណាង

អាចប្រហែលមកពីខ្ញុំអន់ពេក ខ្សោយពេកដែលមិនអាចថែរក្សាការស្រឡាញ់មួយនេះទៅមុខទៀត។ ខ្ញុំមិនបន្ទោសទៅលើអ្នកណាទេ នេះប្រហែលមកពីពួកយើងហត់នឿយដូចគ្នា។ ម្នាក់ៗចាប់ផ្ដើមប្រែប្រួល ចាប់ផ្ដើមលែងចង់និយាយអីទាំងអស់ ព្រោះពេលនេះនិយាយអីក៏លែងសំខាន់ដែរ។

ខ្ញុំគួរនិយាយអីបន្តទៀតទៅ បើខ្ញុំនិយាយអ្នកគិតថាខ្ញុំយកល្អតែខ្លួនឯង ខ្ញុំជាមនុស្សពាក់មុខ ខ្ញុំជាមនុស្សសម្ដែង។ ពេលនេះពាក្យអីក៏អ្នកនិយាយចេញមកដែរ អ្នកស្ដីអ្នកថាឲ្យខ្ញុំគ្រប់សព្វ។ អ្នកថាខ្ញុំប្លែក អ្នកថាខ្ញុំប្រែប្រួល តែតើអ្នកមានមើលខ្លួនឯងទេ? របៀបដែលអ្នកស្រឡាញ់ខ្ញុំពេលនេះ អ្នកមានដឹងខ្លួនទេ? អ្នករវល់ ខ្ញុំក៏មិនទាមទារពេលវេលាពីអ្នកច្រើនដូចមុនដែរ ខ្ញុំឲ្យអ្នកតាមតែអ្នកត្រូវការ។ អ្នកថារឿងខ្លះឲ្យខ្ញុំរឹងមាំចេះធ្វើខ្លួនឯងខ្លះទៅ ខ្ញុំក៏ធ្វើវាដោយខ្លួនឯងមិនបាច់ពឹងអ្នក បន្ទាប់មកអ្នកក៏ថាខ្ញុំប្លែក។ ពេលខ្លះខ្ញុំហួសចិត្តណាស់ខ្ញុំហួសចិត្តនឹងអ្វីដែលអ្នកនិយាយ និងធ្វើមកកាន់ខ្ញុំ។

រូបតំណាង

ពេលអ្នកទុកខ្ញុំចោលអ្នកមានដែលគិតអារម្មណ៍ខ្ញុំទេ ចុះពេលដែលខ្ញុំទុកអ្នកចោលវិញហេតុអីអ្នកបន្ទោសខ្ញុំ? ពេលមានបញ្ហាតើអ្នកណាដែលព្យាយាមនិយាយ ព្យាយាមសម្រុះសម្រួលគ្នា? អ្នកណាដែល Call ទៅ? អ្នកណាដែលនិយាយរហូតដល់អ្នកនិងខ្ញុំត្រូវគ្នាវិញ? គឺមានតែខ្ញុំទេ ព្រោះមានតែខ្ញុំ។

យូរៗទៅខ្ញុំក៏ចាប់ផ្ដើមហត់ ព្រោះខ្ញុំជាមនុស្ស ខ្ញុំចាប់ផ្ដើមអស់សង្ឃឹមលើអ្នក រឹតតែអស់សង្ឃឹមលើស្នេហាមួយនេះ។ ខ្ញុំលែងចង់ព្យាយាមម្នាក់ឯងទៀតហើយ ខ្ញុំលែងចង់និយាយអីទាំងអស់ ខ្ញុំហត់នឹងដេកយំតែឯងរាល់យប់ណាស់ ខ្ញុំហត់នឹងព្យាយាមថែរក្សាស្នេហាមួយនេះទៀតណាស់។

ពួកយើងអហោសិកម្មឲ្យគ្នាទៅ ចាត់ទុកថាយើងលែងជំពាក់អីគ្នាទៀតទៅ ការលះបង់ខ្ញុំចំពោះស្នេហានេះ ហើយការលះបង់អ្នកចំពោះស្នេហានេះយើងទុកថារួចគ្នាទៅ។ ពួកយើងទៅមុខទៀតលែងកើតហើយ ព្រោះពេលនេះខ្ញុំលែងមានសង្ឃឹម លែងមានកម្លាំងចិត្តអីទៀតហើយ។ អ្នកបានផ្ដល់ភាពអស់សង្ឃឹមឲ្យខ្ញុំជាច្រើនដងច្រើនសា រហូតដល់ក្ដីរំពឹងខ្ញុំរបូតអស់ពីខ្លួន។

ចប់ត្រឹមហ្នឹងទៅចុះណា ហើយខ្ញុំនឹងព្យាយាមព្យាបាលរបួសទាំងប៉ុន្មានដែលខ្ញុំមានដោយខ្លួនឯង៕