ពេលមនុស្សស្រីលង់ស្រលាញ់បុរសណាម្នាក់ នាងនឹងក្លាយទៅជាបែបនេះ

2018-04-09 02:46:19
ចំនួនមតិ 0 | ចំនួនចែករំលែក 0

នៅពេលមនុស្សស្រីម្នាក់ចាប់ផ្ដើមស្រលាញ់អ្នកណាម្នាក់ខ្លាំងហើយ នាងនឹងចាប់ផ្ដើមក្លាយទៅជាបែបនេះ។ ពេលខ្លះមនុស្សប្រុសក៏គួរតែយល់ពីនាងខ្លះដែរ ព្រោះវាជាធម្មជាតិនៃមនុស្សស្រីទៅហើយ ដូច្នេះមិនគួរធុញទ្រាន់ និងស្ដីថាឲ្យនាងដែរ ៖

១. លែងខ្វល់ពីមនុស្សប្រុសផ្សេង

នាងចាប់ផ្ដើមលែងខ្វល់ខ្វាយពីបុរសផ្សេង ព្រោះក្នុងកែវភ្នែករបស់នាងគឺមានតែអ្នកប៉ុណ្ណោះ។ នាងមិនចង់ទៅពាក់ព័ន្ធជាមួយអ្នកផ្សេងឬឲ្យអ្នកផ្សេងមកពាក់ព័ន្ធនឹងនាងដូចគ្នា។ អ្វីដែលសំខាន់គឺនាងខ្វល់តែពីអ្នកប៉ុណ្ណោះ។

រូបតំណាង

**២. ទទួលយករាល់ចំណុចរបស់អ្នកទាំងអស់**

នៅពេលដែលនាងស្រឡាញ់អ្នក នាងនឹងទទួលយកទាំងចំណុចល្អនិងចំណុចអាក្រក់របស់អ្នក និយាយឲ្យចំទៅគឺស្រឡាញ់អ្នកជាអ្នក។ ទោះអ្នកខុសអីក៏នាងអាចលើកលែងទោសឲ្យអ្នកបាន តែកុំធ្វើរហូតដល់នាងអស់ស្រឡាញ់ ព្រោះពេលនោះកំហុសតិចតួចប៉ុណ្ណាក៏នាងមិនអាចលើកលែងដែរ។

៣. ចង់បានពេលវេលា

ពេលខ្លះដោយសារតែចំណុចនេះហើយទើបបានជាមនុស្សប្រុសនិយាយថាមនុស្សស្រីទាមទារពេលវេលាពីគេច្រើន តែនេះមកពីនាងស្រឡាញ់ ទើបនាងចង់នៅក្បែរ ចង់ជួបមុខ។ គ្រាន់តែមនុស្សស្រីខ្លះទាមទារជ្រុលរហូតធ្វើឲ្យគេមានអារម្មណ៍ដូចជាប់ទ្រុង ដូច្នេះបើអាចចំណាយពេលខ្លះជាមួយនាងផង ព្រោះនាងពិតជាត្រូវការ។

រូបតំណាង

៤. គម្រោងរបស់នាងមានអ្នកជានិច្ច

ទៅណាមកណានាងមិនចង់ទៅម្នាក់ឯងឡើយ នាងតែងតែបបួលអ្នកហើយចង់ទៅជាមួយអ្នកជាងគេ។ ពេលនាងចង់ធ្វើអ្វីមួយ នាងតែងសួរអ្នក ពិភាក្សាជាមួយអ្នកព្រោះនាងចង់ដឹងថាអ្នកគិតដូចនាងឬអត់ ហើយតើគួរធ្វើបែបណាទើបល្អទាំងសងខាង។

៥. ចេះអន់ចិត្ត ប្រចណ្ឌច្រើន

ការអន់ចិត្ត ការប្រចណ្ឌតិចតួចតែងតែមាននៅពេលមនុស្សស្រីម្នាក់ស្រលាញ់បុរសម្នាក់ ព្រោះនាងមិនអាចចេះតែញញឹមចេញទាំងសង្សារខ្លួនឯងស្និទ្ធស្នាលជាមួយនារីផ្សងនោះទេ។ ប៉ុន្តែមនុស្សស្រីខ្លះនាងចេះគិត នាងដឹងអ្វីគួរធ្វើមិនគួរធ្វើ ទើបនាងអាចគ្រប់គ្រងអារម្មណ៍ខ្លួនឯងបាន មិនទៅរករឿង ឬដេញដោលច្រើន។

៦. ចេះរៀបចំខ្លួនស្អាតជាងមុន

នាងចាប់ផ្ដើមចង់ស្អាតជាងមុន នេះមកពីនាងចង់ឲ្យនាងក្លាយជាមនុស្សស្រីស្អាតជាងគេក្នុងកែវភ្នែកអ្នក។ នាងចង់ទៅណាមកណាអ្នកមានអារម្មណ៍ល្អដែលមាននាងជាសង្សារ ហើយនាងក៏ចង់ឲ្យអ្នកស្រឡាញ់នាងកាន់តែខ្លាំងផងដែរ។

៧. គិតគូរច្រើនជាងមុន

មនុស្សស្រីគិតគូរណាស់ សូម្បីតែរឿងតូចតាចក៏ដោយ។ ពេលខ្លះសូម្បីតែកាដូដែលត្រូវឲ្យអ្នកក៏នាងយកចិត្តទុកដាក់ដែរ ព្រោះនាងចង់ឲ្យអ្នករំភើប និងភ្ញាក់ផ្អើល។ នាងអាចគិតច្រើនជាងអ្វីដែលអ្នកដឹង ជាពិសេសរឿងដែលអ្នកគិតថាមិនសមនឹងគិត ក៏នាងគិតដែរ៕