កូនខ្មែរមួយក្រុមផ្ដើមគំនិតផ្សព្វផ្សាយសម្លៀកបំពាក់បុរាណខ្មែរ សម្រាប់ស្លៀកចូលឆ្នាំថ្មី

2018-03-30 07:01:19
ចំនួនមតិ 0 | ចំនួនចែករំលែក 0

សង្ក្រាន្ដឆ្នាំនេះប្រទេសដែលមានវប្បធម៌ស្រដៀងគ្នាជាមួយកម្ពុជា គឺប្រទេសថៃបានរៀបចំដាក់ខោអាវប្រពៃណីឲ្យប្រជាជនស្លៀកពាក់ដើរលេងក្នុងពិធីបុណ្យចូលឆ្នាំថ្មី។ ការអនុវត្តន៍ទទួលបានការគាំទ្រ និងកោតសរសើរពីប្រជាជនថៃយ៉ាងច្រើនកុះករ។

សម្លៀកបំពាក់ថៃ

ដោយសារតែវប្បធម៌ស្រដៀងគ្នាខ្លាំង ទើបធ្វើឲ្យប្រជាជនខ្មែរមួយចំនួនស្រងាកចិត្តចំពោះការស្លៀកពាក់នេះ ដោយមើលទៅដូចគ្នានឹងសម្លៀកបំពាក់បុរាណខ្មែរខ្លាំង។ ដូចនេះហើយទើបកាលពីពេលថ្មីៗនេះយុវជនមួយក្រុមបានធ្វើវីដេអូបំផុសគំនិតឲ្យខ្មែរយើងជាពិសេសយុវវ័យងាកមកស្លៀកពាក់បែបបុរាណប្រពៃណីខ្មែរដើរលេងកម្មវិធីសង្ក្រាន្តឆ្នាំថ្មីខាងមុខនេះ។

សម្លៀកបំពាក់ខ្មែរ

ក្នុងកិច្ចសម្ភាសន៍ជាមួយ កញ្ញា ម៉ារ៉ាឌី រីហ្គែន ជានិស្សិត និងជាអ្នកបង្ហោះវីដេអូទាក់ទងនឹងម៉ូដប្រពៃណីខ្មែរបុរាណ បានបកស្រាយថា នាងបំផុសគំនិតនេះឡើង ដើម្បីជាការចាប់ផ្ដើមឲ្យយុវជនងាកមកស្រលាញ់ និងថែរក្សានូវវប្បធម៌ដ៏ផូរផង់របស់ជាតិខ្មែរ។

ម៉ារ៉ាឌី រីហ្គែន

រីហ្គែន បន្ថែមថា ៖"ទាល់តែយើងចាប់ផ្ដើមមុនគេបង ទើបមានគេចាប់ផ្ដើមបន្តបន្ទាប់។ ចំពោះវីដេអូវិញខ្ញុំមិនផ្ដោតលើជំនួញអីទេបង គឺខ្ញុំធ្វើឡើងចេញពីចិត្ត និងការស្រលាញ់ចូលចិត្តប៉ុណ្ណោះ។ ខ្ញុំជឿថា មានមនុស្សច្រើនណាស់ដែលស្រលាញ់សម្លៀកបំពាក់បែបប្រពៃណីនេះដូចខ្ញុំ ហើយមានគំនិតការពារ និងអភិរក្ស"។

រស់ ខេមរី

ក្នុងនោះដែរជានិសិត្សស្រីម្នាក់ឈ្មោះ រស់ ខេមរី ហើយជាអ្នកច្នៃម៉ូដសម្លៀកបំពាក់ផ្ទាល់ឆ្លើយតបទៅនឹងពាក្យរិះគុណធ្វើតាមថៃថា៖ "ការពិតម៉ូដប្រពៃណីខ្មែរមានច្រើនតាមសម័យកាលខុសៗគ្នា ហើយសុទ្ធតែមានឯកសារបញ្ជាក់ច្បាស់លាស់។ តែដោយសារប្រទេសមានវប្បធម៌ស្រដៀងគ្នា តែមានភាពជឿនលឿនជាងយើងបានដាក់បង្ហាញមុនទើបធ្វើខ្មែរមួយចំនួនយល់ថាសម្លៀកបំពាក់នេះជារបស់គេទៅវិញ។"

តាមការផ្សព្វផ្សាយសម្លៀកបំពាក់របស់ក្រុមនាង មានដាក់លក់ក្នុងតម្លៃដូចខាងក្រោម៖

-បង់កប្រុស ១២០០០រៀល

-ស្បៃស្រី ២០០០០រៀល

-សំពត់ ២០០០០រៀល

ជាចុងក្រោយ នាងបានបន្ថែមថា ឆ្នាំនេះគ្រាន់ជាការចាប់ផ្ដើមប៉ុណ្ណោះ ដូច្នេះការរៀបចំម៉ូដសម្លៀកបំពាក់នៅមានចំណុចខ្វះខាត តែនាងសន្យាថាឆ្នាំក្រោយនឹងស្វះស្វែងស្រាវជ្រាវបន្ថែមពីម៉ូដខោអាវខ្មែរ ដើម្បីច្នៃម៉ូដឲ្យបានលំអិតជាងនេះ៕