នៅថ្ងៃណាមួយចំណងអាពាហ៍ពិពាហ៍នឹងដាច់ដោច បើអ្នកមានទម្លាប់ ៥ យ៉ាងនេះ

2018-03-26 01:38:56
ចំនួនមតិ 0 | ចំនួនចែករំលែក 0

អាពាហ៍ពិពាហ៍បរាជ័យ មិនមែនដោយសារកង្វះក្ដីស្រឡាញ់ទេ ប៉ុន្តែពេលខ្លះដោយសារតែកង្វះមិត្តភាពទៅវិញ។ មានត្រឹមក្ដីស្រឡាញ់ ប៉ុន្តែប្រសិនអ្នកទាំងពីរមិនចេះរក្សាភាពស្និទ្ធស្នាល ផ្អែមល្ហែមជាប្រចាំទេ បញ្ហាជម្លោះ ភាពព្រងើយកន្តើយ និងចូលមកយាយីទំនាក់ទំនងអ្នកជាមិនខាន។ ជាក់ស្ដែង ខាងក្រោមនេះហើយជាទម្លាប់មិនល្អ ៥ យ៉ាង ដែលធ្វើឲ្យចំណងស្នេហ៍ដើរដល់ផ្លូវបញ្ចប់ និងពិបាកស្រោចស្រង់ត្រឡប់មកវិញ៖

១.ខ្សោយផ្នែកទំនាក់ទំនង

អ្នកទាំងពីរលែងសូវចំណាយពេលអង្គុយស្ដាប់រឿងរ៉ាវរបស់គ្នាដូចពីមុន។ ពេលមានបញ្ហាកើតឡើងម្ដងៗ ម្នាក់ៗព្យាយាមគេចមុខគ្នា យកចាញ់ឈ្នះរៀងខ្លួន ដោយមិនព្រមដោះស្រាយដោយសន្តិវិធីឲ្យបានឆាប់។ ស្ទើរតែគ្រប់ពេលអ្នកជ្រើសរើសការផ្ញើសារបែបសោះកក្រោះ ដើម្បីបញ្ចៀសការជះកំហឹងនានាដោយអចេតនា ព្រោះគិតថាការនិយាយផ្ទាល់មាត់ លែងមានប្រសិទ្ធភាពតទៅទៀត។

២.គ្មានមនុស្សស្និទ្ធស្នាលផ្សេង ក្រៅពីគាត់

កាលពីមុនរាល់ពេលអ្នកមានវិបត្តិ មិនថារឿងការងារ ជីវិត ឬស្នេហាអ្នកប្រាកដជាត្រូវការការលួងលោម ឬដំបូន្មានល្អៗពីមិត្តភ័ក្ដិ ឬក្រុមគ្រួសារជាដើម។ ក្រោយរៀបការរួច អ្នកលែងខ្វល់នឹកនាអំពីនរណាទាំងអស់ ក្រៅពីប្ដីប្រពន្ធរបស់ខ្លួន។ គាត់មិនអាចក្លាយជាមនុស្សតែម្នាក់ដែលអាចត្រូវអង្គុយស្ដាប់ទុក្ខសោកអ្នកគ្រប់ពេលទេ ផ្ដល់ឱកាសឲ្យគាត់បានដកដង្ហើមស្រួលខ្លះ ដូច្នេះអ្នកត្រូវតែមានមនុស្សស្និទ្ធស្នាលក្បែរខ្លួនដទៃទៀត ដែលអាចកំដរអ្នកបានក្រៅពីគាត់។

៣.ការផ្ដល់តម្លៃ មានភាពខុសគ្នាខ្លាំង

ប្រសិនអ្នកប្រញាប់រៀបការទាំងមិនទាន់ស្គាល់គ្នាច្បាស់ អ្នកប្រាកដជាជួបបញ្ហានេះជាក់ជាមិនខាន។ ឧទាហរណ៍៖ ម្នាក់ជាមនុស្សពូកែថែរក្សាសុខភាព មិនដែលញ៉ាំអ្វីផ្ដេសផ្ដាសទេ ហើយម្នាក់ទៀតជាមនុស្សដែលត្រូវការត្រឹមរបស់ដែលឆ្ងាញ់មាត់មួយពេល មិនខ្វល់ខ្វាយរឿងអនាម័យ ដល់ពេលដែលឈឺចាំគិតគ្នាក្រោយទៀត។ បើខុសគ្នាខ្លាំងយ៉ាងហ្នឹង ទាល់តែអ្នកទាំងពីរព្យាយាមសម្រុះសម្រួលគ្នាឲ្យបានច្រើនករណី នោះទើបចំណងអាពាហ៍ពិពាហ៍នេះមានសង្ឃឹមអាចបន្តទៅមុខទៀតបាន។

៤.លាក់រឿងសំងាត់រៀងខ្លួន

ភាពស្មោះត្រង់ គឺជាកត្តាដ៏ចាំបាច់ ដើម្បីពង្រឹងសម្ពន្ធភាពឲ្យកាន់តែរឹងមាំ។ មិនថាវាជារឿងតូច ឬរឿងធំ អ្នកមិនគួរលាក់ទុកតែម្នាក់ឯង ដោយមិនព្រមចែករំលែកជាមួយដៃគូឡើយ។ មិនមែនមានន័យថា អ្នកត្រូវប្រាប់គាត់គ្រប់គំនិតដែលមានក្នុងខួរក្បាលទាំងអស់ ឬហេតុការណ៍អ្នកជួបប្រទះគ្រប់រឿងនោះទេ ប៉ុន្តែអ្នកគួរដឹងថារឿងណាដែលសំខាន់ ត្រូវនិយាយចេញមក ព្រោះវានឹងបង្កបញ្ហានៅថ្ងៃក្រោយ ប្រសិនអ្នកលាក់មិនជិត។

៥.លែងខ្វល់ខ្វាយចំពោះរឿងតូចតាចប្រចាំថ្ងៃ

រៀបការរួច បន្ទុកកាន់តែធ្ងន់ ទាំងការងារក្រៅផ្ទះ ក្នុងផ្ទះ ការមើលថែទាំកូនចៅ បំណុល ការបង់រំលោះប្រចាំខែ សុទ្ធតែរឿងធំៗដែលទាញយកការព្រួយបារម្ភពីអ្នកស្ទើរទាំងស្រុង។ ជីវិតកាន់តែរវល់ អ្នកកាន់តែភ្លេចនូវទង្វើផ្អែមល្ហែមមួយចំនួនដូចជា ការថើប ឱប ឬសរសើរចំពោះភាពស្រស់ស្អាតរបស់ដៃគូដូចពីមុន។ មនុស្សភាគច្រើនតែងតែផ្លាស់ប្ដូរ នៅពេលពួកគេដើរដល់ចំណុចមួយនេះ៕

ចុចអាន៖ហេតុផល ៤ យ៉ាងនេះបញ្ជាក់ថា ការធ្វើដំណើរកម្សាន្តជាមួយគ្រួសារសំខាន់ណាស់

ប្រភព៖ powerofpositivity អត្ថបទ៖ អូន បញ្ញា