ហេតុផល ៤ យ៉ាងនេះបញ្ជាក់ថា ការធ្វើដំណើរកម្សាន្តជាមួយគ្រួសារសំខាន់ណាស់

2018-03-21 01:40:29
ចំនួនមតិ 0 | ចំនួនចែករំលែក 0

បន្ទាប់ពីរៀបអាពាហ៍ពិពាហ៍ កសាងគ្រួសាររួចមនុស្សស្ទើរតែគ្រប់គ្នាតែងតែមានសម្ពាធជាប់ខ្លួនជានិច្ច។ ដើម្បីលើកស្ទួយជីវភាពគ្រួសារ ទាំងប្ដីទាំងប្រពន្ធប្រឹងប្រែងធ្វើការ រកស៊ី រហូតលែងនឹកនាដល់ការសម្រាក លំហែអារម្មណ៍។ ដូចនេះអ្នកគួរតែធ្វើដំណើរកម្សាន្តជុំគ្រួសារ ដោយផ្អែកលើហេតុផលសំខាន់ ៤ យ៉ាងនេះ៖

១.បង្កើនភាពស្និទ្ធស្នាល

ឪពុកម្ដាយរវល់ជាមួយការងារ ហើយកូនៗរវល់ជាមួយការសិក្សា ដូច្នេះហើយអ្នកទាំងអស់គ្នាស្ទើរតែគ្មានពេលបាននិយាយជាមួយគ្នាសោះពេញមួយថ្ងៃ។ ត្បិតថាអ្នកមានថ្ងៃចុងសប្ដាហ៍ ប៉ុន្តែវានៅតែមិនគ្រប់គ្រាន់ក្នុងការតាមដានរាល់គ្រប់សកម្មភាពប្រចាំថ្ងៃរបស់សមាជិកម្នាក់ៗឡើយ។ ហេតុនេះដំណើរកម្សាន្តជុំគ្នា នឹងជួយពង្រឹងទំនាក់ទំនងរបស់អ្នកឲ្យកាន់តែស្និទ្ធស្នាលឡើង។

២.ជួយឲ្យអ្នកគ្រប់គ្នាបានសម្រាកលំហែអារម្មណ៍

ដោយសារតែសម្ពាធពីការងារក្រៅផ្ទះ ក្នុងផ្ទះ ការមើលថែទាំកូនចៅ អ្នកប្រហែលជាហត់នឿយខ្លាំងណាស់ទាំងផ្លូវកាយ ព្រមទាំងផ្លូវចិត្ត។ ចំណែកកូនៗ ពួកគេក៏ធុញទ្រាន់ជាមួយការរៀនសូត្រដូចគ្នា។ ដើម្បីបន្ធូរបន្ថយភាពតានតឹង និងធ្វើឲ្យអារម្មណ៍ជ្រះថ្លាឡើងវិញ ដំណើរកម្សាន្តជាសកម្មភាពដែលគ្រួសារទាំងឡាយមិនអាចខ្វះបាន។

៣.បង្កើតកម្រងអនុស្សាវរីយ៍ល្អៗ

អ្នកអាចថតរូបជុំគ្រួសារជាច្រើន ដើម្បីរក្សាទុកជាកម្រងអនុស្សាវរីយ៍ល្អៗជាមួយគ្នា។ ជឿជាក់ថាយូរឆ្នាំកន្លងផុតទៅ រូបថតទាំងនោះនឹងធ្វើឲ្យអ្នកទាំងអស់គ្នាញញឹម សើចក្អាកក្អាយ ព្រោះនឹកឃើញដល់សកម្មភាពសប្បាយៗទាំងអស់នោះវិញជាក់ជាមិនខាន។

៤.ទទួលបានបទពិសោធន៍ថ្មីៗ

ដំណើរកម្សាន្តទៅតំបន់ឆ្ងាយៗជួយឲ្យអ្នកទទួលបានចំណេះដឹងថ្មីៗទាក់ទងនឹងវប្បធម៌ ភាសា សង្គម ប្រវត្តិសាស្ត្រ ក៏ដូចជារបៀបរស់នៅប្លែកៗរបស់ប្រជាជននៅតំបន់ទាំងនោះ។ វាជួយឲ្យការយល់ដឹងរបស់អ្នកកាន់តែទូលំទូលាយ។ ប្រសិនអ្នកមិនដែលចេញទៅណាទេ អ្នកប្រៀបបានដូចកង្កែបក្នុងអណ្ដូងអញ្ចឹង ទោះអ្នកណានិយាយអ្វី ក៏អ្នកគ្មានយោបល់ជជែកជាមួយគេដែរ៕

ប្រភព៖famifi

ចុចអាន៖ចង់ថតរូបបែបគូស្នេហ៍ បែបរ៉ូមែនទិចងងឹតៗ អាចសាក Style នេះបាន

អត្ថបទ៖ អូន បញ្ញា