ទម្លាប់ខ្លួនឲ្យក្លាយជាមនុស្សម្នាក់ដ៏រឹងមាំ និងរីករាយ តាមគន្លឹះទាំងនេះ

2018-03-24 02:35:07
ចំនួនមតិ 0 | ចំនួនចែករំលែក 0

បង្ហាត់ខ្លួនឯងឲ្យរឹងមាំ និងរស់នៅដោយភាពរីករាយមិនមែនជារឿងងាយស្រួលប៉ុន្មានទេ ព្រោះជីវិតនេះត្រូវតែមានសុខ និងទុក្ខ តែអ្វីដែលអ្នកអាចធ្វើបាននោះគឺរស់នៅជាមួយសុខឲ្យបានច្រើន។ ខាងក្រោមនេះជាវិធីដ៏ល្អសម្រាប់ឲ្យអ្នកក្លាយជាមនុស្សម្នាក់ដែលរឹងមាំ និងរីករាយបាន ៖

១. ទទួលយកខ្លួនឯង

គ្មានអ្នកណាល្អគ្រប់ដប់នោះទេ ប្រហែលពេលខ្លះអ្នកអន់ចិត្ត អ្នកមិនសប្បាយដែលកើតមកមិនស្អាត មិនល្អដូចគេ ប៉ុន្តែអ្នកត្រូវបើកចិត្តគិតថាមនុស្សម្នាក់ៗសុទ្ធតែមានចំណុចល្អរៀងៗខ្លួន។ មិនប្រាកដថាអ្នកដែលស្អាតមានវាសនាល្អឡើយ អ្វីដែលសំខាន់យើងចេះទទួលយកការពិតហើយរស់នៅដោយក្ដីស្រឡាញ់សម្រាប់ខ្លួនឯង។

រូបតំណាង

**២. អភិវឌ្ឍខ្លួន**

នេះសម្ដៅលើរូបរាងខាងក្រៅ និងចរិតមាយាទខាងក្នុងព្រមគ្នាតែម្ដង។ បើអ្នកគិតថាខ្លួនឯងមិនសូវស្អាតទេ ចាប់ផ្ដើមថែខ្លួន រៀបចំខ្លួនឲ្យបានស្អាត ដោយហាត់ប្រាណយករាងស្អាត ថែរក្សាសម្រស់ឲ្យបានល្អ និងផ្លាស់ប្ដូររបៀបតែងខ្លួន។ លើសពីនេះ ចរិតឬកពាក៏ត្រូេះតែចេះរៀបចំឲ្យបានល្អដែរ មិនមែនស្អាតបានតែខ្លួនឲ្យគេដៀលថាចរិតអន់។

៣. ប្រើជីវិតឲ្យមានតម្លៃ

ការពិតជីវិតរបស់មនុស្សម្នាក់ៗសុទ្ធតែមានតម្លៃ អ្វីដែលសំខាន់តើអ្នកចេះប្រើវាទេ? ទោះបីជាអ្នកមានជីវិតដុនដាបយ៉ាងណាក៏ដោយ តែបើអ្នកចេះស្វែងរកផ្លូវចេញហើយចាត់ទុកជីវិតខ្លួនឯងមានតម្លៃ នោះអ្នកនឹងរីករាយ។ គ្មានអ្នកណាអាចទាយដឹងឡើយថាថ្ងៃស្អែកមានអ្វីកើតឡើង ថ្ងៃណាមួយអ្នកប្រាកដជាអាចស្វែងរកផ្លូវជីវិតមួយដ៏ប្រសើរបាន។

៤. បន្តក្ដីស្រមៃ

អ្នកណាក៏ដូចអ្នកណាដែរ ទម្រាំឈោងចាប់ក្ដីស្រមៃខ្លួនឯងបានមិនមែនងាយស្រួលនោះទេ ដូច្នេះត្រូវចេះលើកទឹកចិត្តខ្លួនឯង ទោះគ្មានអ្នកណាលើកទឹកចិត្តអ្នកក៏ដោយ។ ត្រូវចាំថាគ្មានអ្នកណាល្អដាក់អ្នកជាងអ្នកខ្លួនឯងទេ ក្រោកឡើងហើយបន្តនូវក្ដីស្រមៃដែលខ្លួនចង់បាន។

រូបតំណាង

៥. ប្រឡូកក្នុងជីវិតការងារ

ការងារណាក៏បង្រៀនអ្នកដែរ អ្នកធ្វើការកាន់តែច្រើន អ្នកកាន់តែស្គាល់ពីខ្លួនឯង និងសង្គមមនុស្សកាន់តែច្បាស់។ ការងារបង្រៀនអ្នកឲ្យរឹងមាំ និងមានថាមពលជីវិតកាន់តែខ្លាំង ព្រោះក្នុងជីវិតការងារមានមនុស្សគ្រប់ប្រភេទ ហើយបើអ្នកមិនឈ្លាសវៃអ្នកនឹងអាចរងគ្រោះដោយសារមនុស្សទាំងអស់នោះ។

៦. ធ្វើជាមនុស្សដែលនៅកណ្ដាល

កុំធ្វើជាមនុស្សដែលដើរតាមគេ បើគេស្អប់អ្នកនេះ អ្នកក៏ស្អប់អ្នកនេះដែរ នោះអ្នកគ្មានថ្ងៃល្អឡើយ។ អ្នកត្រូវធ្វើជាមនុស្សដែលនៅផ្លូវកណ្ដាល កុំឆាប់ជឿ កុំឆាប់ស្ដាប់អ្នកណាពេក ត្រូវចេះសម្របខ្លួន និង គិតពីការពិតឲ្យបានត្រឹមត្រូវ។

៧. រៀនបំភ្លេច និងអភ័យទោស

បើអាចគួរតែរៀនបំភ្លេចរឿងរ៉ាវមិនល្អៗចោលខ្លះទៅ ព្រោះខួរក្បាលអ្នកមិនមែនជាធុងសម្រាមឡើយ។ ការបំភ្លេចចោល និងការអភ័យទោសបានជួយឲ្យជីវិតអ្នកស្រស់ស្អាត មិនស្មុគស្មាញ និងឈឺចាប់ដោយសាររឿងដែលមិនល្អចូលមកក្នុងជីវិត។