ជាមនុស្សស្រីថ្លៃថ្នូរម្នាក់ក្នុងរឿងស្នេហា គួរទម្លាប់ប្រកាន់ចរិតបែបនេះ

2018-03-23 02:18:08
ចំនួនមតិ 0 | ចំនួនចែករំលែក 0

ពេលមានស្នេហាតើអ្នកចង់បានរបៀបណា? បែបចាស់ទុំ ស្ងប់ស្ងាត់ ឬក៏ត្រូវតែផ្អែមល្ហែម ស្និទ្ធស្នាលរាល់ថ្ងៃ? បើសិនជាអ្នកចង់បានបែបចាស់ទុំ ថ្លៃថ្នូរ មិនចង់ឲ្យគេពេបជ្រាយនោះ អ្នកជាមនុស្សស្រីកួរតែរៀនទម្លាប់ខ្លួនប្រកាន់ចរិតបែបនេះ ៖

១. កុំងប់ងុលជាមួយរឿងមនោសញ្ចេតនាពេក

មនោសញ្ចេតនាគឺជារឿងមួយដែលបន្ថែមរសជាតិឲ្យជីវិត តែមិនមែនមានន័យថាអ្នកត្រូវខ្វល់ខ្វាយពីវាខ្លាំងពេករហូតដល់ភ្លេចធ្វើអ្វីផ្សេងនោះទេ។ កុំយកពេល ២៤ម៉ោងអង្គុយគិតពីគេ អង្គុយនឹកគេ អង្គុយអន់ចិត្តជាមួយគេ ដេកយំ ដេកសើចដោយសារគេច្រើនពេក គួរតែចំណាយពេលធ្វើរឿងដើម្បីអនាគតអ្នកទាំងពីរវិញទើបល្អ ព្រោះថ្ងៃក្រោយអ្នកគង់តែមានពេលជាមួយគ្នារាល់ថ្ងៃទេ។

រូបតំណាង

**២. កុំរញ៉េរញ៉ៃ រករឿងពេក**

កុំចូលចិត្តរករឿង ដេញដោល ជីកកកាយ ប្រចណ្ឌពីនេះពីនោះនាំឈ្លោះពេក ព្រោះសកម្មភាពបែបនេះធ្វើឲ្យស្នេហាកាន់តែគួរឲ្យធុញទ្រាន់។ ម្យ៉ាងទៀតក៏មិនគួរលេងសើចច្រើនទៅលើរឿងស្នេហាដែរ បើមិនប្រាកដថាស្រឡាញ់ទេ កុំទៅលេងសើចលើទឹកចិត្តអ្នកផ្សេងទៀត ដោយគ្រាន់តែបំពេញអារម្មណ៍ត្រូវការរបស់ខ្លួនឯង។

៣. ផ្ដល់សេរីភាពឲ្យម្នាក់ៗ

ខ្លួនឯងក៏ត្រូវការសេរីភាព គេក៏ត្រូវការសេរីភាព មិនមែនមានស្នេហាត្រូវគាបខ្លួនឯងមិនឲ្យទៅណាក្រៅពីនៅជាមួយគ្នាឡើយ។ បែងចែកពេលវេលាផ្ទាល់ខ្លួនអ្នក ជាមួយនឹងស្នេហាឲ្យបានល្អ ដើម្បីកុំឲ្យម្នាក់ៗអន់ចិត្ត និងមានអារម្មណ៍មិនល្អ។ ព្យាយាមរីករាយជាមួយមិត្តភក្តិ គ្រួសារ ការងារ និងស្នេហាឲ្យបានល្អដូចគ្នា នោះជីវិតអ្នកនឹងមានន័យ។

៤. និយាយត្រង់ៗ

ពេលខ្លះគ្មានអ្នកណាអាចដឹងពីចិត្តយើងទាំងអស់ឡើយ បើមិនពេញចិត្តអីនិយាយគ្នាទៅ កុំចាំឲ្យម្នាក់ទៀតយល់ ព្រោះគេមិនអាចយល់គ្រប់យ៉ាងនោះទេ។ បើមិនសប្បាយចិត្ត និយាយប្រាប់គេទៅ ថាចង់ចេញក្រៅជាមួយគ្នា ញ៉ាំអីជាមួយគ្នា ដើរលេងជាមួយគ្នា។ កុំចូលចិត្តលាក់ទុកម្នាក់ឯង ហើយមកពិបាកចិត្តនោះ។

រូបតំណាង

៥. ធ្វើឲ្យម្នាក់ៗក្លាយជាថាមពលក្នុងជីវិតរបស់ខ្លួន

ស្នេហាជាកម្លាំងមួយដែលជួយមនុស្សឲ្យផ្លាស់ប្ដូរបានយ៉ាងអស្ចារ្យ ដូច្នេះហេតុអីមិនព្រមឲ្យម្នាក់ៗក្លាយជាកម្លាំងចិត្តរបស់ខ្លួននោះ។ ពេលមានបញ្ហាចែករំលែកទៅគ្នា ផ្ដល់កម្លាំងចិត្តឲ្យគ្នា គាំទ្រ និងជួយគ្នាទៅវិញទៅមក នេះទើបជាស្នេហាដ៏ល្អមួយ មិនមែនពេលមានរឿងយកមកជះកំហឹងឲ្យម្ខាងទៀតនោះទេ។

៦. មានភាពនឹងធឹងលើរឿងអារម្មណ៍ និងបេះដូង

បើម្នាក់មិនបានសូវខ្វល់ មិនបានសូវផ្អែមល្ហែម អ្នកគួរតែព្យាយាមយល់ និងស្វែងរកមូលហេតុ មិនមែនគ្រាន់តែគេទុកចោលពេលខ្លះក៏ទៅលង់ស្រឡាញ់អ្នកផ្សេងនោះ។ ធំៗអស់ហើយ ការងារក៏មានច្រើន ការគិតក៏កាន់តែច្រើន ដូច្នេះពេលខ្លះគេក៏ហត់ គេក៏ចង់នៅម្នាក់ឯង ឬគេរវល់ តែមិនមានន័យថាគេឈប់ស្រឡាញ់។ ព្យាយាមយកបេះដូងមកស្រឡាញ់គ្នា កុំយកអារម្មណ៍ ព្រោះបើអ្នកយកបេះដូងមកស្រឡាញ់ ទោះឆ្ងាយគ្នាប៉ុណ្ណាក៏អ្នកនៅតែមានអារម្មណ៍កក់ក្ដៅដែរ។

៧. ស្ងប់ស្ងាត់ដោយមិនបាច់បង្អួតអ្នកណា

ស្នេហាចាស់ទុំ ថ្លៃថ្នូរមួយមិនចាំបាច់បង្អួតអ្នកណាថាអ្នករកបានមនុស្សល្អម្នាក់ទេ ក៏មិនចាំបាច់បង្អួតថាអ្នកនិងគេមានក្ដីស្រឡាញ់ឲ្យគ្នាប៉ុណ្ណាដែរ ដឹងត្រឹមតែ២នាក់ក៏គ្រប់គ្រាន់ពេកណាស់ទៅហើយ។ ក្ដីស្រឡាញ់ដ៏ស្ងៀមស្ងាត់មួយដែលមនុស្សភាគច្រើនមើលមិនឃើញ តែវាបានដើរទៅមុខយ៉ាងរឹងមាំ និងក្ដីសុខ។