ដើម្បីឲ្យខ្លួនឯងមានសុភមង្គល និងរីករាយរាល់ថ្ងៃ គួរតែចាប់ផ្ដើមធ្វើរឿងទាំងនេះ

2018-03-21 02:15:07
ចំនួនមតិ 0 | ចំនួនចែករំលែក 0

សេចក្ដីសុខរបស់មនុស្សគឺកើតចេញពីចិត្ត ព្រោះបើផ្លូវចិត្តអ្នកជាប់អំពល់ហើយនោះ ទោះអ្នកស្ថិតក្នុងស្ថានភាពបែបណាក៏អ្នកគ្មានក្ដីសុខដែរ។ យ៉ាងណាក៏ដោយអ្នកគួរតែចាប់ផ្ដើមស្វែងរកសុភមង្គលឲ្យខ្លួនឯងបើដឹងថាជីវិតរាល់ថ្ងៃមានភាពសោះកក្រោះ។ ដើម្បីឲ្យខ្លួនឯងមានសុភមង្គលបាន គួរតែរៀនធ្វើរឿងទាំងនេះ ៖

១. ប្រើខួរក្បាលគិតតែរឿងល្អៗបានហើយ

រឿងល្អ និងរឿងអាក្រក់តែងតែមានទន្ទឹមគ្នា តែអ្នកមិនគួរផ្ទុករឿងមិនល្អច្រើនពេកក្នុងខួរក្បាលឡើយ។ រៀនបំភ្លេច រៀនអភ័យទោស រៀនលើកលែង ដើម្បីខ្លួនឯងសប្បាយចិត្តច្រើនជាងមុន។

រូបតំណាង

**២. បើកចិត្តឲ្យទូលាយ និងលះបង់ភាពអាត្មានិយម**

រៀនមើលពិភពលោកឲ្យបានធំទូលាយជាងមុន ព្រោះប្រហែលជីវិតយើងអាចនៅល្អជាមនុស្សជាច្រើនទៀតណាស់។ រៀនចាប់ផ្ដើមចេះចែករំលែក គិតពីមនុស្សជុំវិញខ្លួនថាតើពួកគេមានឈឺចាប់ដោយសារទង្វើយើងឬអត់? ចែករំលែកសេចក្ដីសុខដែលយើងមាន ទៅអ្នកដទៃដើម្បីឲ្យពួកគេញញឹមនោះហើយជាភាពរីករាយដែលមនុស្សគួរតែមានពិតប្រាកដ។

៣. រស់នៅជាមួយបច្ចុប្បន្នកាល

ពេលខ្លះយើងប្រហែលជាស្ដាយអតីតកាល តែបានភ្លេចថាខ្លួនកំពុងរស់នៅជាមួយបច្ចុប្បន្នកាលហើយក៏ដេកយំ កើតទុក្ខឈឺចាប់នៅអ្វីដែលបានកន្លងផុត។ ត្រូវចាំថាបើយើងស្ដាយរបស់ដែលបាត់ទៅ យើងមិនអាចរកឃើញសេចក្ដីសុខឡើយ។

រូបតំណាង

៤. ធ្វើបញ្ជីមួយ

កត់ចូលនូវអ្វីដែលយើងគួរបំភ្លេចចោល ហើយអ្វីដែលយើងត្រូវធ្វើបន្ត ដើម្បីជាការរំឭកខ្លួនឯងឲ្យដើរចេញពីរឿងមិនសប្បាយចិត្ត។ យើងគួរតែកក់ចូលនូវរឿងល្អៗដែលយើងបានធ្វើ ហើយបន្តធ្វើវាទៀត។

៥. មានសកម្មភាពក្នុងការគាំទ្រជីវិត

បើយើងគ្មានសកម្មភាពទេ តើភាពរីករាយនោះបានមកពីណា? ភាពរីករាយគឺកើតចេញពីអ្វីដែលយើងបានធ្វើ ដូច្នេះយើងគួរតែចំណាយពេលទៅមើលរឿងដែលយើងចូលចិត្ត ប្ដូរម៉ូដសក់ដែលយើងស្រឡាញ់ ញ៉ាំអាហារដែលយើងចូលចិត្ត ជាជាងអង្គុយ Sad អង្គុយយំទាំងធ្វើឲ្យខ្លួនឯងវេទនា។

៦. មើលថែខ្លួន និងស្មារតីឲ្យបានល្អ

ជារឿងចាំបាច់ណាស់ដែលយើងត្រូវមើលថែរក្សាខ្លួន និងស្មារតីឲ្យបានល្អ ព្រោះយើងនៅមានក្ដីសង្ឃឹមជាច្រើនទៀតគ្រាន់តែវាមិនទាន់មកដល់។ ពិភពលោកនេះធំណាស់ មិនមែនតូចដូចអ្វីដែលយើងមើលឃើញរាល់ថ្ងៃទេ ហើយរឿងខ្លះអាចកើតឡើងគ្រប់ពេលវេលា ដូច្នេះត្រូវចេះលើកទឹកចិត្តខ្លួនឯង និងមើលថែខ្លួនឯងឲ្យបានល្អដើម្បីបន្តក្ដីស្រមៃយើងទៅទៀត។