មិនមែនការចាប់អារម្មណ៍ធម្មតាៗ ប៉ុន្តែជាស្នេហ៍ពិត បើអ្នកឃើញសញ្ញាទាំង៥នេះ

2018-03-06 02:19:39
ចំនួនមតិ 0 | ចំនួនចែករំលែក 0

តើអ្នកធ្លាប់លង់ស្រឡាញ់គេអស់ប៉ុន្មាននាក់ហើយ រហូតមកដល់ពេលនេះ? តើអ្នកធ្លាប់សង្ស័យថា ប្រហែលខ្លួនគ្រាន់តែត្រូវការ ចង់បាន ងប់ងុល ឬឈ្លក់វង្វេងមួយពេល ព្រោះឃើញគេល្អខ្លាំង ហើយមិនមែនជាក្ដីស្រឡាញ់ពិតប្រាកដដែរឬទេ? ប្រសិនបែបនេះមែន តោះទៅស្វែងយល់ឲ្យកាន់តែច្បាស់អំពីសញ្ញានៃស្នេហ៍ពិតទាំង៥ចំណុចខាងក្រោម ដើម្បីយកមកវិនិច្ឆ័យឡើងវិញទាំងអស់គ្នា៖

១. អ្នកតែងតែសម្លឹងមើលមុខ ឬភ្នែករបស់គេ

ការសិក្សាមួយបានបង្ហាញថា មនុស្សដែលចាប់អារម្មណ៍លើអ្នកណាម្នាក់ រួចតែងសម្លឹងមើលរាងកាយរបស់គេ គឺជាមនុស្សដែលកំពុងមានចំណង់ផ្លូវភេទប៉ុណ្ណោះ។ ផ្ទុយទៅវិញ ប្រសិនអ្នកតែងសម្លឹងមើលមុខ ឬភ្នែករបស់គេ ច្បាស់ណាស់ថាវាគឺជាស្នេហាដែលកើតចេញពីចិត្តរបស់អ្នកពិតៗ។

រូបតំណាង

**២. អ្នកស្ម័គ្រចិត្តលះបង់ដើម្បីគេ**

ទាំងពេលវេលា លុយកាក់ ឬក៏ទឹកចិត្ត អ្នកអាចលះបង់គ្រប់យ៉ាងដើម្បីផ្ដល់ភាពងាយស្រួលដល់គេ។ ឲ្យតែគេហាមាត់ពឹងពាក់អ្វីមួយ អ្នកមិនដែលរារែកចិត្ត ឬបដិសេធម្ដងណាឡើយ។ នេះជាក្ដីស្រឡាញ់ដ៏បរិសុទ្ធ ព្រោះអ្នកមិនចង់បានអ្វីតបស្នងឡើយ ក្រៅពីចង់ឃើញគេញញឹម សប្បាយចិត្តដោយសារទង្វើល្អរបស់អ្នក។

៣. អ្នកប្រើពាក្យ “ពួកយើង” ជំនួសពាក្យ “ខ្ញុំ”

មនុស្សដែលស្រឡាញ់គេខ្លាំង តែងតែប្រើពាក្យ “ពួកយើង” ដើម្បីធ្វើឲ្យទំនាក់ទំនងរឹតតែស្និទ្ធស្នាល និងល្អូកល្អើនលើសពីមិត្តធម្មតា។ ឧទាហរណ៍៖ តើពួកយើងអាចទៅមើលកុនជាមួយគ្នានៅចុងសប្ដាហ៍នេះបានទេ? តើអ្នកអាចទៅមើលកុនជាមួយខ្ញុំនៅចុងសប្ដាហ៍នេះបានទេ? រវាងប្រយោគពីរនេះ ប្រយោគទីមួយពិតជាបង្ហាញភាពផ្អែមល្ហែម និងពោរពេញដោយក្ដីស្រឡាញ់ខ្លាំងជាងដាច់។

រូបតំណាង

៤. មិនប្រកាន់ជាមួយភាពទន់ជ្រាយ ផ្ដេកផ្ដួលរបស់គេ

ពីមុនអ្នកអាចជាមនុស្សដែលចូលចិត្តភាពឯករាជ្យ រឹងមាំ ម្ចាស់ការ និងត្រូវការសេរីភាពផ្ទាល់ខ្លួនខ្លាំងបំផុត ដូច្នេះមនុស្សបែបទន់ជ្រាយ ម្ញ៉ិកម្ញ៉ក់ ចូលចិត្តពឹងពាក់ ឬរំខានគេ គឺអ្នកស្អប់បំផុត។ ប៉ុន្តែនៅពេលដែលអ្នកជួបស្នេហ៍ពិត អ្នកបែរជាមនុស្សដែលលែងប្រកាន់ជាមួយរឿងបែបនេះតទៅទៀត ព្រោះឥទ្ធិពលក្ដីស្រឡាញ់ដែលអ្នកមានចំពោះគេគឺធំធេងខ្លាំង រហូតបាត់ជិតអស់គំនិតទាំងនោះ។

រូបតំណាង

៥. នៅសុខៗក៏ស្រាប់តែចេះនឹកគេ គ្រាន់តែមិនបានជួបគេមួយរយៈសោះ អ្នកអន្ទះសាក្នុងចិត្ត ព្រោះតែក្ដីនឹករលឹកគេយ៉ាងខ្លាំង។ រាល់ថ្ងៃ មិនថាពេលញ៉ាំបាយ ធ្វើការ ឬលំហែកាយ អ្នកមិនដែលភ្លេចគេមួយវិនាទីណាឡើយ។ អារម្មណ៍ចង់ជួប ចង់ក្បែរ ចង់និយាយជាមួយ ព្រមទាំងនឹករលឹកគ្រប់ពេលបែបនេះកើតឡើងនៅពេលដែលអ្នកបានជួបស្នេហ៍ពិតប៉ុណ្ណោះ៕

ចុចអាន៖មូលហេតុចម្បង ៧យ៉ាង បណ្ដាលឲ្យជីវិតប្ដីប្រពន្ធឈានដល់ការលែងលះគ្នា

ប្រភព៖ powerofpositivity ប្រែសម្រួល៖ អូន បញ្ញា