ជីវិតគូនឹងមិនសូវរកាំរកូស បើអ្នកទាំងពីរមានចំណុចដូចគ្នា ៣ យ៉ាងនេះ

2018-03-02 02:09:42
ចំនួនមតិ 0 | ចំនួនចែករំលែក 0

ភាពប្រហាក់ប្រហែលគ្នាគឺជាតម្រូវការដ៏ចាំបាច់សម្រាប់ជីវិតគូទាំងឡាយ។ មានចំណុចដូចគ្នាច្រើន អ្នកទាំងពីរប្រាកដជាងាយស្រួលច្រើនយ៉ាង ទាំងផ្លូវកាយ និងផ្លូវចិត្ត ពេលរស់នៅក្បែរគ្នារាល់ថ្ងៃ។ ខាងក្រោមនេះ កញ្ញា នឹងលើកយកចំណុច ៣ យ៉ាង ដែលគូស្នេហ៍គួរតែមានដូចគ្នា ដើម្បីឲ្យសម្ពន្ធភាពកាន់តែមានភាពស៊ីចង្វាក់គ្នាខ្លាំងឡើង៖

១.ការកម្សាន្ត

មូលហេតុចម្បងមួយដែលធ្វើឲ្យគូស្នេហ៍ភាគច្រើនប៉ះទង្គិចគ្នា គឺភាពខុសគ្នានៃការកម្សាន្តអារម្មណ៍ផ្ទាល់ខ្លួន។ ពេលទំនេរបុរសៗចូលចិត្តមើលការប្រកួតកីឡា ចំណែកឯស្រីៗវិញចង់មើលរឿងភាគបែបមនោសញ្ចេតនា។ ដូច្នេះដើម្បីដោះស្រាយជម្លោះបែបនេះ អ្នកទាំងពីរត្រូវចេះផ្លាស់ប្ដូរខ្លួនឯងម្នាក់បន្តិចៗ ដើម្បីសម្របសម្រួលរកចំណុចរួម ទើបជារឿងប្រសើរ។

២.ចំណង់ចំណូលចិត្ត

តើអ្នកទាំងពីរមានចំណង់ចំណូលចិត្តដូច ឬប្រហាក់ប្រហែលគ្នាច្រើនដែរឬទេ? ប្រសិនបើម្នាក់ជាមនុស្សដែលចូលចិត្តដើរលេងច្រើន ហើយម្នាក់ទៀតចូលចិត្តសំងំដេកនៅផ្ទះ អ្នកទាំងពីរប្រាកដជាមិនអាចរស់នៅជាមួយគ្នាជាធ្លុងមួយនោះទេ។ ខុសគ្នាកាន់តែច្រើន អ្នកកាន់តែពិបាក ដូច្នេះសូមស្គាល់ពីគ្នាឲ្យបានច្រើន មុននឹងសម្រេចចិត្តចាប់ដៃគ្នាជាគូជីវិត។

៣.វិជ្ជាជីវៈ

ប្រភេទការងារខុសគ្នាខ្លាំងពេកក៏ជាមូលហេតុបង្ក ធ្វើឲ្យអ្នកទាំងពីរមិនអាចរស់នៅចុះសម្រុងជាមួយគ្នាដែរ។ ឧទាហរណ៍ វិជ្ជាជីវៈពេទ្យជាការងារដែលមហាសែនរវល់ ដូច្នេះប្រសិនការងាររបស់អ្នកសម្បូរពេលវេលាច្រើន ហើយអ្នកជាមនុស្សដែលត្រូវការការយកចិត្តទុកដាក់ និងចង់ឲ្យគូស្នេហ៍កំដររាល់ថ្ងៃសម្រាក អ្នកមិនអាចរៀបការជាមួយគ្រូពេទ្យបាននោះទេ។

សរុបជារួម ចំណុចធំៗទាំងបីនេះជាអ្វីដែលអ្នកត្រូវរៀនសូត្រពីគ្នាឲ្យបានច្បាស់មុនសម្រេចចិត្តរៀបការ។ ខុសគ្នាបន្តិចបន្តួច អ្នកប្រហែលជាអាចបត់បែនតាមបាន ប៉ុន្តែបើខុសគ្នាខ្លាំងស្ទើរគ្រប់រឿងពេក ទោះអ្នកជាមនុស្សពូកែអត់ធ្មត់ប៉ុណ្ណា ក៏ប្រហែលមិនអាចទ្រាំបានអស់មួយជីវិតដែរ៕

ចុចអាន៖មិនត្រឹមតែស្រឡាញ់ ថែមទាំងគោរពអ្នកខ្លាំងទៀតបើគាត់មានសញ្ញាទាំងនេះ

ប្រភព៖ Likelovequotes អត្ថបទ៖ អូន បញ្ញា