គន្លឹះរស់នៅដោយសុភមង្គលជាមួយក្ដីស្រមៃ ទោះមិនទាន់ជោគជ័យក៏ដោយ

2018-02-27 06:04:00
ចំនួនមតិ 0 | ចំនួនចែករំលែក 0

មានមនុស្សមួយចំនួនដេកពិបាកចិត្តនៅពេលក្ដីស្រមៃខ្លួនឯងមិនទាន់ជោគជ័យ ប៉ុន្តែតើពេលដែលអ្នកពិបាកចិត្តក្ដីស្រមៃនោះមករកអ្នកទេ? កុំទម្លាប់ឲ្យជីវិតអ្នកមានសេចក្ដីទុក្ខច្រើនពេកអី គួរតែរៀនធ្វើឲ្យខ្លួនឯងរីករាយជាមួយក្ដីស្រមៃដែលអ្នកមានទើបជាការប្រសើរ។ ខាងក្រោមនេះជាវិធីដែលអាចឲ្យអ្នករស់ស្រួលជាមួយបំណងប្រាថ្នាអ្នក ហើយក៏ជាវិធីដែលជួយឲ្យអ្នកសម្រេចក្ដីសុបិននោះផងដែរ ៖

១. ប្រើប្រាស់ថាមពលនៃចិត្តរបស់អ្នក

អ្នកមិនបាច់គេងស្រមៃច្រើននោះទេ គ្រាន់តែចាប់ផ្ដើមមើលឃើញភាពល្អប្រសើរដែលអ្នកមានទៅគឺបានហើយ។ ទម្លាប់ប្រើចិត្តឲ្យមានថាមពលទោះស្ថិតក្នុងភាពលំបាកក៏ដោយ គ្រាន់តែចាប់ផ្ដើមបើកចិត្តឲ្យទូលាយ ហើយគិតថាទាំងនេះសុទ្ធតែជាកម្លាំងជំរុញឲ្យអ្នកឈានទៅកាន់ក្ដីស្រមៃដែលអ្នកប៉ង។

រូបតំណាង

**២. ធ្វើជាត្រីដ៏ធំ នៅក្នុងបឹងដ៏ធំ**

ទោះពេលនេះអ្នកគ្មានឋានៈ មុខមាត់អីធំដុំក៏ដោយ ក៏មិនត្រូវមានគំនិតអវិជ្ជមានលើខ្លួនឯងដែរ។ ត្រូវគិតថាខ្លួនជាត្រីដ៏ធំមួយ ហើយរស់នៅក្នុងបឹងដ៏ធំមួយដូច្នេះនៅមានរឿងជាច្រើនទៀតដែលអ្នកត្រូវរៀន ដែលអ្នកត្រូវជួប។ ត្រូវប្រឹងហែលឲ្យសព្វបឹងដែលអ្នករស់នៅ ហើយពង្រឹងខ្លួនឯងមិនឲ្យត្រីដទៃទៀតបៀតបៀនបាន។

៣. គិតឲ្យបានធំជាអ្វីដែលអ្នកប្រាថ្នា

ពេលអ្នកមានមហិច្ឆតាធំ អ្នកនឹងប្រឹងធ្វើវាដូច្នេះយ៉ាងហោចណាស់ក៏អ្នកបានត្រឹម ឬក្បែរអ្វីដែលអ្នកចង់បានដែរ។ កុំគិតតូចពេក ហើយកុំរស់នៅជាមួយក្ដីស្រមៃចង្អៀតពេក ពង្រីកវាឲ្យធំឡើងព្រោះពេលវាកាន់តែធំអ្នកក៏កាន់តែខ្ពស់ដូចគ្នា។

រូបតំណាង

៤. កុំខ្លាចក្នុងការពិភាក្សា

កុំមានអារម្មណ៍ថាខ្លាច ឬខ្មាស់នៅពេលអ្នកត្រូវការយោបល់ពីអ្នកដទៃ។ បង្ហាញវាហើយជជែកវែកញែកដើម្បីឲ្យខ្លួនឯងកាន់តែយល់ច្បាស់ពីដំណើរការដែលអ្នកត្រូវចាប់ផ្ដើម។ អ្វីដែលចាំបាច់គឺអ្នកត្រូវចេះជ្រើសរើសមនុស្សក្នុងការពិភាក្សា ព្រោះមិនមែនមនុស្សទាំងអស់សុទ្ធតែចង់ជួយអ្នកឡើយ។

៥. កុំរស់នៅក្នុងភ្លើងច្រណែន

ឃើញគេមានឡាន មានផ្ទះធំៗនៅកុំច្រណែនគេអី សប្បាយចិត្តជាមួយគេទៅព្រោះគេខំរកណាស់ទម្រាំបានវាមក ដូច្នេះបើចង់បានដូចគេអ្នកក៏ត្រូវខំប្រឹងដែរ ព្រោះវាមិនអាចធ្លាក់មកពីលើមេឃទេ។ កុំទម្លាប់ខ្លួនឯងរស់នៅជាមួយភ្លើងច្រណែន ឈ្នានីស ព្រោះវាក្ដៅណាស់ហើយរស់ក៏គ្មានសេចក្ដីសុខដែរ។

៦. ដើរហើរខ្លះ

ត្រូវរៀនដើរហើរខ្លះ ព្រោះបើចេះតែនៅមួយកន្លែងក៏អ្នកមិនទទួលបានអីថ្មីដែរ។ ទៅកន្លែងដែលអ្នកចង់ទៅ ហើយរៀនសង្កេតនិងដកបទពិសោធន៍ដែលខ្លួនត្រូវមាន ដូច្នេះវាមិនត្រឹមជាការកម្សាន្តនោះទេ ហើយវាក៏ជាឱកាសដែរ។