ចំណាំមើលទៅ មនុស្សស្រីឆ្លាតហើយពូកែត្រូវតែមាន ៥ចំណុចនេះដូចៗគ្នា

2018-02-25 05:05:28
ចំនួនមតិ 0 | ចំនួនចែករំលែក 0

បច្ចុប្បន្ននេះ មនុស្សស្រីបានវិវត្តខ្លួនក្លាយជាអ្នកដឹកនាំកាន់តែច្រើនមិនថាក្នុងវិស័យនយោបាយ វិស័យជំនួញ ឬវិទ្យាសាស្ត្រ ខណៈមានការផ្ដល់ឱកាស និងសិទ្ធិសេរីភាពកាន់តែច្រើនដល់ពួកគេ។ មនុស្សស្រីដែលមានភាពពូកែបែបនេះត្រូវបានគេសង្កេតឃើញថាមានបុគ្គលិកលក្ខណៈជារួមចំនួន ៥ ដូចខាងក្រោម ៖

រូបតំណាង

**១. អភិវឌ្ឍសមត្ថភាពខ្លួនឯងជានិច្ច**

ខណៈពិភពលោកពោរពេញដោយការប្រកួតប្រជែង មនុស្សស្រីក៏មិនអាចបណ្ដោយឲ្យពេលវេលាកន្លងផុតទៅទទេៗដែរ។ ការដែលអាចជោគជ័យបានគឺត្រូវប្រើពេលវេលា និងភាពមោះមុត ហើយមនុស្សស្រីដែលទទួលបានជោគជ័យគឺត្រូវមានទាំងព្រមទាំងកម្លាំងកាយ និងកម្លាំងចិត្ត ក្នុងការអភិវឌ្ឍទស្សនៈ និងសមត្ថភាពខ្លួនឯងឲ្យកាន់តែមានប្រសិទ្ធភាព ដើម្បីអាចជឿជាក់ថាអ្វីដែលនាងមានគឺជាអ្វីដែលចាំបាច់ និងមិនអាចមានអ្វីមកជំនួសបាន។

២. ពូកែរឿងលុយកាក់

អ្នកណាទៅដែលមិនស្រឡាញ់មនុស្សស្រីវៃឆ្លាត? មនុស្សស្រីដែលជោគជ័យភាគច្រើនគឺមានសមត្ថភាពគ្រប់គ្រងចាត់ការរឿងលុយកាក់បានយ៉ាងល្អ។ បញ្ហាលុយកាក់គឺជាបញ្ហាដែលមនុស្សស្រីរឹងមាំចាត់ទុកជាអាទិភាព ព្រោះវាធ្វើឲ្យពួកគេអាចគ្រប់គ្រងជីវិតផ្ទាល់ខ្លួនបាន តាមរយៈការស្វែងរក ការសន្សំ ការបណ្ដាក់ទុន និងការគ្រប់គ្រងចំណូលចំណាយឲ្យមានរបៀប។

៣. គិតគ្រួសារមុនជានិច្ច

គ្រួសារមាននាទីសំខាន់ណាស់សម្រាប់ភាពជោគជ័យរបស់មនុស្សស្រី។ មនុស្សស្រីដែលទទួលបានជោគជ័យភាគច្រើនមានគ្រួសារជាកម្លាំងជំរុញទឹកចិត្ត បើទោះបីត្រូវធ្វើការធ្ងន់ ឬមានទំនួលខុសត្រូវខ្ពស់ ប៉ុន្តែពួកនាងនឹងបែងចែកពេលវេលាឲ្យគ្រួសារ។ សម្រាប់មនុស្សស្រី ជោគជ័យដែលកើតឡើងចំពោះនាងក៏ចាត់ទុកថាជាជោគជ័យរបស់គ្រួសារដូចគ្នា ហើយភាពជោគជ័យដែលនាងបានមកទាំងអស់នឹងប្រែជាគ្មានន័យ ប្រសិនបើនាងមិនបានចែករំលែកវាជាមួយមនុស្សដែលនាងស្រឡាញ់។

៤. អ្វីដែលពួកនាងមានគឺភាពជឿជាក់ និងមិនចុះចាញ់

ការមានភាពជឿជាក់ និងអំណត់តស៊ូគឺជាគុណសម្បត្តិសំខាន់សម្រាប់មនុស្សស្រីដែលទទួលបានភាពជោគជ័យ។ សព្វថ្ងៃនេះមនុស្សស្រីនៅតែត្រូវបានគេមើលរំលងក្នុងវិស័យជាច្រើន ជាពិសេសនៅកន្លែងធ្វើការ ដូច្នេះហើយមិនថាអ្នកដទៃគិតបែបណា តែនាងនឹងដឹងពីតម្លៃនៃសមត្ថភាពដែលខ្លួនមាន និងមិនព្រមឲ្យអ្នកណាមកបន្ទាបតម្លៃរបស់នាងបានឡើយ។ ផ្ទុយទៅវិញ នាងនឹងប្រើឱកាសនេះជាការក្រើនរំឭក និងជំរុញខ្លួនឯងឲ្យខំប្រឹងដើម្បីជោគជ័យ។

រូបតំណាង

៥. ពួកនាងមិនខ្លាចនឹងដើរចេញពីកន្លែងសុខស្រួល (Comfort Zone)

មនុស្សស្រីដែលទទួលបានភាពជោគជ័យចូលចិត្តទទួលយកស្ថានភាពដែលមានភាពប្រថុយប្រថាន។ បើមានឱកាសអ្វីដែលអាចឲ្យនាងសាកល្បងអ្វីថ្មីៗ នាងនឹងស្ម័គ្រចិត្តមុនគេជានិច្ច ហើយគំនិតបែបនេះនឹងនាំឲ្យនាងឈានទៅរកភាពជោគជ័យ ព្រោះវាស្ដែងឲ្យឃើញពីសមត្ថភាពនៃការសម្របខ្លួននៅគ្រប់ស្ថានការណ៍។ នាងចូលចិត្តអារម្មណ៍រំភើបដែលបានមកពីការប្រថុយ ហើយពួកនាងក៏មិនខ្លាចនឹងធ្វើអ្វីដែលខុសប្លែកពីអ្នកដទៃដែរ។ បើទោះបីស្ដាប់ទៅហាក់ដូចមិនអាចទៅរួច ប៉ុន្តែសម្រាប់ពួកនាងគ្រប់យ៉ាងគឺសុទ្ធតែអាចទៅរួច ៕

ចុចអាន៖

ប្រភព៖ p-mee ប្រែសម្រួល៖ ស្វាយ វ៉ាន់ថន