បើមានអារម្មណ៍ថាហត់ចិត្ត តឹងណែនក្នុងទ្រូង ត្រូវទម្លាប់ចិត្តធ្វើរឿងទាំងនេះ

2018-02-16 05:34:09
ចំនួនមតិ 0 | ចំនួនចែករំលែក 0

ធម្មជាតិនៃមនុស្សត្រូវមានទុក្ខ មានសុខដើរទន្ទឹមគ្នា ប៉ុន្តែបើអ្នកចេះគ្រប់គ្រងលើចិត្តខ្លួនឯងនោះ ជីវិតអ្នកក៏មិនស្មុគស្មាញច្រើនពេកដែរ។ បើអ្នកមានអារម្មណ៍ថាហត់ចិត្ត តឹងទ្រូង ត្រូវទម្លាប់ចិត្តធ្វើរឿងទាំងនេះ ដើម្បីបន្ថយសេចក្ដីទុក ស្វែងរកសេចក្ដីសុខ ៖

១. សមាធិ ដកដង្ហើមមួយៗ

ចំណាយពេល៥ នាទីសម្រាប់សមាធិ ដកដង្ហើមមួយៗឲ្យវែងៗហើយព្យាយាមតាំងចិត្តឲ្យស្ងប់។ ដកដង្ហើមចេញ ដង្ហើមចូលហើយគិតរឿងណាដែលធ្វើឲ្យអ្នកសប្បាយចិត្ត រឿងល្អៗដែលអ្នកបានធ្វើពីមុនមក។

រូបតំណាង

**២. អភ័យទោសនូវរឿងដែលបានកើតឡើង**

បន្ទាប់ពីអ្នកតាំងចិត្តបានស្ងប់ហើយ ត្រូវរៀនអភ័យទោសឲ្យអ្វីដែលកើតឡើង។ បើគេធ្វើឲ្យអ្នកពិបាកចិត្ត ឈឺចាប់ អភ័យទោសឲ្យគេទៅព្រោះមានតែការអភ័យទោសទេដែលអាចឲ្យយើងបំភ្លេចនូវរឿងមិនល្អចោល។

៣. កុំហួងហែងពេក

រៀនទទួលស្គាល់ការពិត ថាអ្វីក្នុងលោកដែលកើតឡើងនេះមិនអាចដូចចិត្តអ្នកឡើយ។ បើវាមិនបានដូចចិត្ត កុំក៏គុំកួន កុំហួងហែងពេកអី បណ្ដោយឲ្យវាទៅៗ ហើយចាប់ផ្ដើមធ្វើវាម្ដងទៀត ព្រោះនេះជាធម្មជាតិនៃជីវិត។

៤. ទម្លាប់ដាំផ្កាក្នុងចិត្ត

មានន័យថាអ្នករៀនធ្វើចិត្តអ្នកឲ្យរីករាយ មានក្ដីអាណិតអាសូរ ក្ដីស្រឡាញ់ ហើយរៀនបញ្ចេញភាពខឹង ភាពស្អប់ឲ្យអស់ពីចិត្ត។ ទម្លាប់ស្វែងរកសេចក្ដីសុខដាក់ក្នុងខ្លួន រៀនញញឹមចំពោះខ្លួនឯង រៀនអបអរសាទរជាមួយអ្នកដទៃ។

៥. កុំទោរទន់ទៅតាមរឿងដែលចូលមកក្នុងជីវិតអ្នក

បើដឹងថាខ្លួនឯងមិនសប្បាយចិត្ត ត្រូវព្យាយាមរកវិធីព្យាបាលចិត្ត មិនមែនទោរទន់ដេកយំ ដេកស្ដាយនោះទេ។ ទម្លាប់រឹងមាំក្នុងចិត្ត បើជួបបញ្ហាអីដោះស្រាយទៅ កុំគិតរឿងអីមិនល្អដែលមិនទាន់បានកើតឡើង។ កុំភ័យ កុំស្លន់ស្លោ ព្រោះគ្មានបានអីមកវិញទេ ក្រៅពីនាំភ្លើង នាំទុកមកដាក់ក្នុងចិត្ត។