៩ការពិតក្នុងជីវិត ដែលអ្នកត្រូវយល់ហើយតឿនប្រាប់ខ្លួនឯងឲ្យចាំ

2018-02-14 08:39:09
ចំនួនមតិ 0 | ចំនួនចែករំលែក 0

១. បែបណាហៅថាពូកែពិត? ១. អ្នកពូកែ ២. មានអ្នកប្រាប់ថាអ្នកពូកែ ៣. អ្នកដែលប្រាប់ថាអ្នកពូកែជាមនុស្សពូកែ

២. មនុស្សយើងមានភ្នែក២ ហើយភ្នែកទាំងពីរស្ថិតនៅកម្រិតដូចគ្នា ប៉ុន្តែយើងបែរជាប្រើវាមើលមនុស្សមិនបានស្មើគ្នា។ មនុស្សយើងមានត្រចៀក២ ដើម្បីស្ដាប់បានទាំងសងខាង ប៉ុន្តែយើងបែរជាចូលចិត្តស្ដាប់តែម្ខាងៗ។ ពួកយើងមានមាត់តែ១ ប៉ុន្តែបែរជានិយាយឲ្យអ្នកដទៃយល់ច្រឡំថារឿងមួយទៅជារឿងមួយផ្សេងទៀតបាន។

៣. មនុស្សដែលរិះគន់អ្នកនៅថ្ងៃនេះ អ្នកអាចគិតថាគេគឺជាសត្រូវ ប៉ុន្តែទៅថ្ងៃមុខគេអាចក្លាយជាមិត្ត។ មនុស្សដែលសរសើរអ្នកនៅថ្ងៃនេះ អ្នកអាចគិតថាគេជាមិត្ត ប៉ុន្តែទៅថ្ងៃមុខគេក៏អាចក្លាយជាសត្រូវ។ ដូច្នេះហើយទើបបុរាណពោលថា “សម្ដីផ្អែមអាចមានថែមថ្នាំពុល កុំខ្វើកតាមខ្យល់ កុំខ្វល់តាមរលក”។

៤. បញ្ហាធំរបស់មនុស្សមិនមែនដោយសារមើលមិនឃើញអន្ទាក់ ប៉ុន្តែទាំងដឹងហើយថាវាគឺជាអន្ទាក់ តែនៅតែយកក្បាលទៅដាក់ឲ្យជាប់អន្ទាក់ម្ដងជាពីរដង។

៥. គេថាទឹកភ្នែកអាចប្រាប់អ្វីម្យ៉ាងដែលមាត់និយាយមិនបាន ប៉ុន្តែពេលខ្លះទឹកភ្នែកក៏អាចប្រាប់ពីក្ដីសុខក្នុងចិត្តដែលយើងមិនអាចអធិប្បាយបានដូចគ្នា។ គេថាស្នាមញញឹមអាចប្រាប់ពីក្ដីសុខស្ថិតនៅក្នុងចិត្ត ប៉ុន្តែពេលខ្លះស្នាមញញឹមក៏ជាអ្នកតំណាងឲ្យភាពឈឺចាប់ដែលមាត់យើងមិនអាចនិយាយចេញមកបានដូចគ្នា។

៦. មិនថាអ្នករស់នៅជាមួយអ្នកណា មិនថាញាតិមិត្ត ឬអ្នកក្រៅ អ្នកត្រូវហ្វឹកហាត់ញញឹមឲ្យបានទោះក្នុងចិត្តមានរឿងទោមនស្សក៏ដោយ ព្រោះមនុស្សគ្រប់គ្នាសុទ្ធតែមានភាពអាត្មានិយម ដូច្នេះកុំរំពឹងថាអ្នកដែលនៅជុំវិញខ្លួនអ្នកនឹងធ្វើល្អ ឬស្មោះត្រង់ជាមួយអ្នកគ្រប់ៗគ្នា។

៧. គេថា នៅពេលមនុស្សម្នាក់អស់ស្រឡាញ់ អ្នកម្ខាងទៀតធ្វើអ្វីក៏ខុសទាំងអស់ យំក៏ខុស អង្គុយស្ងាត់ស្ងៀមក៏ខុស ដកដង្ហើមក៏ខុស សូម្បីស្លាប់ទៅក៏នៅតែខុស។ នៅពេលអស់ចិត្តស្រឡាញ់ សូម្បីពាក្យថា “យើងនៅស្រឡាញ់គ្នាទៀតទេ?” ក៏ក្លាយជាពាក្យនាំឲ្យគេសុំបែកបានដែរ។

៨. រឿងកុនតែមួយ ក្រោយបញ្ចាំងចប់ មានអ្នកនិយាយថាមើលមិនស្ដាយលុយ មានអ្នកថាមើលហើយស្ដាយលុយ។ បុកល្ហុងហាងតែមួយ មានអ្នកនិយាយថាឆ្ងាញ់បំផុត ហើយក៏មានអ្នកនិយាយថាមិនឆ្ងាញ់សូម្បីបន្តិច។ បទចម្រៀងតែមួយ អ្នកខ្លះស្ដាប់ហើយមិនចេះធុញ អ្នកខ្លះស្ដាប់លើកទីមួយមិនទាន់ចប់ស្រួលបួលផងក៏លែងចង់ស្ដាប់មួយជីវិត។ រឿងកុនល្អវាអាស្រ័យលើត្រូវចំណូលចិត្តអ្នកទស្សនា បុកល្ហុងឆ្ងាញ់វាអាស្រ័យលើត្រូវមាត់អ្នកញ៉ាំ ភ្លេងពីរោះ ឬមិនពីរោះវាអាស្រ័យទៅតាមវ័យអ្នកស្ដាប់ និងអារម្មណ៍ដែលអ្នកស្ដាប់នោះធ្លាប់ឆ្លងកាត់ ដូច្នេះហើយ មានចូលចិត្តអ្នក មានអ្នកស្អប់អ្នក គឺជារឿងធម្មតា។

៩. រាល់ថ្ងៃគឺទីបញ្ចប់ ហើយរាល់ថ្ងៃក៏ជាចំណុចចាប់ផ្ដើម បើទោះបីម្សិលមិញល្អអស្ចារ្យយ៉ាងណា ថ្ងៃនេះវាក៏ក្លាយជាអតីត បើទោះបីថ្ងៃនេះអាក្រក់យ៉ាងណា អ្នកគង់តែឆ្លងវាផុត។ ខ្ចីគំនិតក្នុងអតីតកាលមកតម្រែតម្រង់ផ្លូវជីវិតក្នុងពេលបច្ចុប្បន្ន ហើយអ្វីដែលអ្នកកសាងក្នុងពេលបច្ចុប្បន្ននឹងជាការសាងសង់ផ្លូវឆ្ពោះទៅកាន់អនាគតដូចគ្នា ៕

ចុចអាន៖

ប្រភព៖ NusonBooks ប្រែសម្រួល៖ ស្វាយ វ៉ាន់ថន