នៅពេលមនុស្សម្នាក់ឯកា អស់សង្ឃឹម និងឈឺចាប់បំផុត ពួកគេពិតជាត្រូវការអ្នកណាស់

2017-12-22 06:09:39
ចំនួនមតិ 0 | ចំនួនចែករំលែក 0

រសជាតិជីវិតមិនមែនស្រស់បំព្រងរហូតនោះទេ ការឈឺចាប់ ការខកចិត្ត ភាពឯកា អស់សង្ឃឹម តែងតែជ្រៀតចូលក្នុងជីវិតយើង ហើយវានឹងក្លាយជាជំងឺដ៏សាហាវបំផុតដែលបំផ្លាញជីវិតយើង។

នៅពេលមនុស្សម្នាក់ឯកា និងឈឺចាប់បំផុត អ្វីដែលពួកគេត្រូវការគឺមានមនុស្សដែលយល់ពីពួកគេបំផុត មនុស្សម្នាក់ដែលគេអាចចែករំលែករឿងពិបាកចិត្តដែលកប់ក្នុងទ្រូងគេ ស្ដាប់គេដោយយកចិត្តទុកដាក់បំផុត។ ប៉ុន្តែតើគេអាចរកមនុស្សបែបនោះដោយរបៀបណាទៅ?

តើអ្នកណាអាចអង្គុយស្ដាប់យើងរៀបរាប់ភាពឈឺចាប់ដែលពួកគេមាន ការខកចិត្តដែលពួកគេជួប ភាពឯកាដែលកំពុងរុំព័ទ្ធជីវិតយើងនោះ?

តើអ្នកណាអាចកំដរពួកគេពេលគេពិបាកចិត្ត ឲ្យស្មាពួកគេផ្អែក ហើយអាចអង្អែលស្មា អង្អែលក្បាលពួកគេ ហើយប្រាប់ពួកគេថា « មិនអីទេ បន្តិចគ្រប់យ៉ាងនឹងប្រសើរឡើង!»?

តើអ្នកណាអាចស្ដាប់ពួកគេយំដោយមិនគេចត្រចៀកចេញនោះ?

តើអ្នកណាអាចយល់ពីការលំបាក ភាពឯកាដែលពួកគេមាននោះ?

ដោយសារតែពួកគេមិនអាចនឹងរកមនុស្សបែបនោះឃើញ ទើបភាពឯកា ភាពអស់សង្ឃឹម ការបាក់ទឹកចិត្តរបស់បួកគេកើនឡើងពីមួយថ្ងៃទៅមួយថ្ងៃ រហូតពេលខ្លះវាស្រូបយកជីវិតពួកគេទាំងមូលឲ្យរស់នៅក្នុងភាពខ្មៅងងឹតមិនអាចមើលឃើញពន្លឺឡើងវិញ។

សុំបានទេ អាចធ្វើជាមនុស្សដែលពួកគេកំពុងតាមរកបានទេ? ពួកគេពិតជាត្រូវការអ្នកណាស់ ពួកគេពិតជាចង់បានអ្នកដែលយល់ពីពួកគេណាស់ គេត្រូវការអ្នកណាស់ ត្រូវការឲ្យអ្នកផ្ដល់ភាពកក់ក្ដៅឲ្យគេ ផ្ដល់ស្នាមញញឹមឲ្យពួកគេ ផ្ដល់ក្ដីសង្ឃឹម ក្ដីស្រឡាញ់ឲ្យពួកគេ និងនៅក្បែរគេ ពេលគេដុនដាបបំផុត។

អាចទេបើអ្នកជាម្នាក់នោះ?

ចុចអាន៖ដល់ពេលផ្ដល់ក្ដីសុខខ្លួនឯងដោយគ្មានល័ក្ខខ័ណ្ឌ មនុស្សគ្រប់គ្នាត្រូវតែធ្វើ

អត្ថបទ៖ ផេង ផលធិតា