បទពិសោធន៍ ពេលស្រឡាញ់មនុស្សដែលគេមិនបានតាំងចិត្តស្រឡាញ់យើង

2017-12-18 10:05:43
ចំនួនមតិ 0 | ចំនួនចែករំលែក 0

ខ្ញុំមិនដឹងថាខ្ញុំមានអារម្មណ៍ស្រឡាញ់គាត់តាំងពីពេលណាទេ គ្រាន់តែដឹងថាខ្ញុំជួបគាត់ដំបូងបេះដូងខ្ញុំលោតញាប់ ហើយ មុខខ្ញុំចាប់ផ្ដើមក្ដៅ ទាំងយើងមិនដែលស្គាល់ឬ ជួបគ្នាពីមុនមកសោះ។

ខ្ញុំចាប់ផ្ដើមចូលមើលរូបគាត់រាល់ថ្ងៃ ហើយនិយាយ និងញញឹមម្នាក់ឯងទាំងមិនដែលបាននិយាយរកគ្នាមួយម៉ាត់។ អស់ពេលជិត ៤ ខែដែលខ្ញុំ Crush លើគាត់ ហើយសូម្បីតែ Facebook ក៏ខ្ញុំមិនបាន Add គាត់ធ្វើមិត្តភក្តិដែរ ហើយពេលដែលដើរជួបគាត់ខ្ញុំធ្វើដូចធម្មតា មុខគាត់ក៏អត់មើលដែរ តែពេលដើរហួសខ្ញុំតែងតែងាកក្រោយមើលគាត់ពីចម្ងាយ។

ប៉ុន្តែថ្ងៃមួយពេលខ្ញុំបើក Facebook លេងខ្ញុំក៏ឃើញគាត់ Add មកខ្ញុំ អារម្មណ៍ពេលនោះដូចបានហោះអីចឹង គឺសប្បាយចិត្តដល់ទប់ខ្លួនឯងមិនជាប់ លោតផងសើចផងតែម្នាក់ឯង។ រំលងពីមួយថ្ងៃទៅមួយថ្ងៃ គឺគ្មានឃើញអីប្លែកនោះទេ ព្រោះយើងមិនបានទាក់ទង និយាយគ្នាឡើយ គឺដូចមនុស្សផ្សេងគ្នាអីចឹង។ តែមានពេលមួយដែលខ្ញុំក្លាហានហ៊ានចូលទៅ Comment ក្នុងរូបភាពគាត់យ៉ាងសាមញ្ញបំផុត ហើយគាត់ក៏តបដូចធម្មតា។

ពួកយើងគ្មានប្រតិកម្មអីទាំងអស់ រហូតដល់ពេលមួយដែលគាត់ឃើញខ្ញុំ Post Status មួយ គាត់ក៏បាន Chat មកខ្ញុំ។ អារម្មណ៍ពេលឃើញឈ្មោះគាត់លោតមក គឺរំភើបជាងត្រូវឆ្នោតរាប់លានទៀត។ និយាយគ្នាបានមួយភ្លែតខ្ញុំមានអារម្មណ៍ថាមិនចូលគ្នាសោះ ហើយខ្ញុំមានគំនិតចង់បោះបង់ព្រោះមានអារម្មណ៍ថាគាត់គ្មានចាប់អារម្មណ៍នឹងខ្ញុំបន្តិចឡើយ ពេលនោះគឺខ្ញុំខូចចិត្តខ្លាំងបំផុត ហើយក៏មានអារម្មណ៍ថាខ្ញុំដុនដាបខ្លាំង ខ្ញុំមិនដែលមានប្រវត្តិស្រឡាញ់មនុស្សប្រុសមុនឡើយ ហើយអ្នកតាមស្រឡាញ់ខ្ញុំក៏ច្រើនដែរ តែហេតុអីបានជាខ្ញុំមកមានចិត្តលើគាត់។

មាត់និយាយថាបោះបង់ តែមិនដែលធ្វើបានឡើយ មានតែស្រឡាញ់ខ្លាំងជាងមុនទៀត ខ្ញុំក៏សាកល្បងនិយាយជាមួយគាត់ម្ដងទៀត តែអ្វីដែលនឹកស្មានមិនដល់គឺពួកយើងនិយាយត្រូវគ្នា និង សប្បាយចិត្តជាងមុន។ ចាប់តាំងពីពេលនោះមកពួកយើងចាប់ផ្ដើមជជែកគ្នាបានច្រើន តែជជែកលក្ខណៈឌឺគ្នាខ្លាំង គាត់ចូលចិត្តលេងសើច ហើយពូកែកូរទៀត ពួកយើងក៏មានជួបគ្នាម្ដងម្កាលដែរ តែគាត់មិនដែលនិយាយអ្វីទាក់ទងនឹងស្នេហានោះទេ។

ថ្ងៃមួយខ្ញុំបាន Chat ជាមួយគាត់រហូតដល់ឆ្លងចូលថ្ងៃថ្មី តែដោយសារតែខ្ញុំនៅចាំជូនពរថ្ងៃកំណើតគាត់ ហើយក៏សម្រេចចិត្តថាបង្ហាញអារម្មណ៍ដែលខ្ញុំមានចំពោះគាត់ ទោះគាត់ទទួលមិនទទួលខ្ញុំអត់ខ្វល់សំខាន់បានធ្វើអ្វីដែលបេះដូងខ្ញុំចង់ធ្វើ ហើយក៏មិនចង់ស្ដាយក្រោយទៀត។ យប់នោះគាត់ក៏បានប្រាប់ខ្ញុំវិញថាគាត់ចង់ឲ្យខ្ញុំមើលពីគាត់សិន ព្រោះគាត់មានចំណុចមិនល្អច្រើនខ្លាចខ្ញុំទទួលអត់បាន ចាំស្គាល់អស់ហើយចាំគិតទៀត ហើយគាត់ក៏ប្រាប់ខ្ញុំថាគាត់ចូលចិត្តខ្ញុំ។

ខ្ញុំដឹងថាពាក្យទាំងនេះគ្រាន់តែលួងចិត្តខ្ញុំ ហើយមិនចង់ឲ្យខ្ញុំពិបាកចិត្តតែប៉ុណ្ណោះ តែខ្ញុំក៏មិនបានគិតអីច្រើនដែរគ្រាន់តែឲ្យគាត់ និង ខ្ញុំនិយាយលេងសើចជាមួយគ្នាដូចរាល់ថ្ងៃទៅ។ ពីមួយថ្ងៃទៅមួយថ្ងៃ ពួកយើងកាន់តែស្និទ្ធស្នាល និង ត្រូវគ្នាជាងមុន តែនៅតែមិនអាចលើសពីនេះ។ប៉ុន្មានថ្ងៃក្រោយមកខ្ញុំក៏សួរគាត់ម្ដងទៀតថា «ពេលនេះគាត់ទុកខ្ញុំជាអី?» យប់នោះជាយប់ដែលអ្វីប្រែប្រួល ហើយក៏ជាយប់ដែលខ្ញុំរីករាយជាងគេ គឺគាតបានប្រាប់ខ្ញុំថា គាត់ស្រឡាញ់ខ្ញុំ និង ទុកខ្ញុំជាសង្សារគាត់។

ពួកយើងចាប់ផ្ដើមទាក់ទងគ្នា ដោយមិនបង្ហាញឲ្យអ្នកណាដឹង។ រាល់យប់គាត់តែងតែ Video call មកខ្ញុំ ហើយនិយាយគ្នាដោយសប្បាយចិត្ត តែគាត់គឺជាមនុស្សមិនសូវខ្វល់ មិនសូវចូលចិត្តផ្អែមល្ហែម បែបនេះហើយពេលខ្លះខ្ញុំក៏អន់ចិត្ត ពេលខ្លះយំតែឯងទៀតក៏មាន។

តែខ្ញុំត្រឹមតែដឹងថាខ្ញុំស្រឡាញ់គាត់ខ្លាំង ហើយឲ្យតែបាននិយាយ និង ជួបគាត់គឺជាពេលដែលខ្ញុំរីករាយបំផុត។ ខ្ញុំចង់ក្បែរគាត់ឲ្យបានច្រើនជាងនេះ ហើយក៏ចង់ឲ្យគាត់ស្រឡាញ់ខ្ញុំឲ្យច្រើនជាងនេះដែរ។

ប៉ុន្តែ.....

មួយរយៈកន្លងមក ខ្ញុំដឹងថាប្រហែលជាខ្ញុំស្រឡាញ់គាត់តែម្ខាងប៉ុណ្ណោះ គាត់មិនសូវរវល់ជាមួយខ្ញុំ ទុកខ្ញុំចោល ហើយពួកយើងក៏មិនដែលចេញក្រៅ ឬទៅណាមកណាជាមួយគ្នាដែរ។ ពេលខ្លះគាត់ស្ងាត់ឈឹង ១ អាទិត្យ ២ អាទិត្យទាំងគ្មានរឿងអីសោះក៏មាន គ្រាន់តែប្រាប់ថាគាត់ចង់នៅម្នាក់ឯង។

ទីបំផុតរឿងដែលខ្ញុំគិត វាក៏បានមកដល់ គាត់ក៏សម្រេចចិត្តបែកពីខ្ញុំ ហើយខ្ញុំក៏សមល្មមនឹងបោះបង់ដូចគ្នា។ ការពិតខ្ញុំគ្រាន់តែចង់ប្រាប់អ្នកដទៃទៀតថា គួរតែកុំស្រឡាញ់មនុស្សដែលមិនបានស្រឡាញ់យើងអី ព្រោះភាពឈឺចាប់ ភាពឯកានឹងរត់មករកយើង៕

សាច់រឿង៖ អ៉ី ជីន

អត្ថបទ៖ ផេង ផលធិតា