ស្រាយចម្ងល់ សម្រាប់អ្នកឧស្សាហ៍ហូរឈាមច្រមុះ

2017-12-15 08:41:50
ចំនួនមតិ 0 | ចំនួនចែករំលែក 0

មនុស្សភាគច្រើនធ្លាប់មានបញ្ហាហូរឈាមច្រមុះ (epistaxis) យ៉ាងហោចណាស់ម្ដងក្នុងមួយជីវិត ហើយបញ្ហាហូរឈាមច្រមុះ នឹងជាសះស្បើយវិញខ្លួនឯង ដោយភាគច្រើនកើតលើក្មេងអាយុ ២-១០ឆ្នាំ និងមនុស្សចាស់ ៥០-៨០ឆ្នាំ។

ការហូរឈាមច្រមុះកើតឡើងនៅពេលដែលភ្នាសក្នុងច្រមុះរងការប៉ះទង្គិច ឬរលាក ទើបបណ្ដាលឲ្យហូរឈាម ហើយមូលហេតុមានដូចជា៖

ការយកដៃឆ្កឹះ ឬរុកចូលច្រមុះលេង ដែលជាមូលហេតុចម្បងនៃការហូរឈាមច្រមុះរបស់កុមារ
អាកាសធាតុត្រជាក់ហើយស្ងួត -ថ្នាំមួយចំនួន (ថ្នាំ antihistamines និងថ្នាំពពួក corticosteroids) អាចបណ្ដាលអោយរលាកច្រមុះ
ការដុះឆ្អឹងច្រមុះខុសប្រក្រតីដែលអាចរំខានដល់លំហូរខ្យល់ បន្ទាប់មកនាំឲ្យច្រមុះស្ងួត និងហូរឈាម
បាក់តេរី វីរុស និងប្រតិកម្ម (Allergy) ច្រមុះ
ដុះសាច់ និងមហារីកច្រមុះ
វិបត្តិកំណកឈាមពីកំណើត
ឈឺក្បាលប្រកាំង
លើសឈាម

ឈាមច្រមុះមិនមែនសុទ្ធតែត្រូវទៅជួបគ្រូពេទ្យនោះទេ ដោយការហូរឈាមបណ្ដាលមកពីអាកាសធាតុត្រជាក់ និងស្ងួត ឬការយកដៃឆ្កឹះច្រមុះ គឺអាចព្យាបាលនៅផ្ទះបានយ៉ាងងាយស្រួលដោយគ្រាន់តែ៖

ច្របាច់ច្រមុះពី ៥-១០នាទី
ស្អំទឹកកកលើកន្លែងមានហូរឈាម
ដកដង្ហើមវែងៗ និងបន្ធូរអារម្មណ៍
ប្រើស្ព្រៃយ៍បាញ់ច្រមុះដែលមានវេជ្ជបញ្ជាពីគ្រូពេទ្យ

ការហូរឈាមច្រមុះមាន ២ប្រភេទ ផ្នែកខាងមុខ និងខាងក្រោយ ដោយខាងមុខហូរឈាមច្រើនជាង ហើយការហូរឈាមច្រមុះផ្នែកខាងក្រោយវិញ ត្រូវព្យាបាលដោយគ្រូពេទ្យជំនាញខាងត្រចៀក ច្រមុះ និងបំពង់ក ដោយសារឈាមមិនត្រឹមតែឆ្លងកាត់ច្រមុះប៉ុណ្ណោះទេ ថែមទាំងអាចឆ្លងកាត់មាត់ផងដែរ។

ដើម្បីទប់ស្កាត់ ឬកាត់បន្ថយការហូរឈាមអ្នកត្រូវរក្សាសំណើមច្រមុះក្នុងរដូវត្រជាក់ ព្រមទាំងជៀសវាងការជក់បារី ផឹកគ្រឿងស្រវឹងច្រើនពេក និងគ្រប់គ្រងសម្ពាធឈាមរបស់អ្នកឲ្យបានល្អ ហើយត្រូវស្វែងរកការព្យាបាល បើមានការហូរឈាមច្រមុះម្ដងទៀតក្នុងរយៈពេលខ្លី ហូរឈាមច្រើន វិលមុខ និងឈឺក្បាល៕