ជីវិតកាន់តែស្មុគស្មាញ កុំបន្ទោសព្រហ្មលិខិត បើអ្នកធ្វើរឿង ៥យ៉ាងនេះ

2017-10-31 06:36:59
ចំនួនមតិ 0 | ចំនួនចែករំលែក 0

មនុស្សកើតមកមិនមែនមានក្តីសុខជាប់ខ្លួនរហូតទេ គ្រប់គ្នាសុទ្ធតែត្រូវឆ្លងកាត់ការលំបាករៀងខ្លួនក្នុងជីវិតប្រចាំថ្ងៃ។ យ៉ាងណាមិញ នៅពេលកំពុងជួបស្ថានភាពលំបាកទាំងនោះ មនុស្សកាន់តែព្យាយាមដាក់សម្ពាធទៅលើជីវិតខ្លួនឯងបន្ថែមទៀត ជាហេតុធ្វើឱ្យពួកគេកាន់តែយ៉ាប់យឺនជាងមុនទ្វេដង។ តើទង្វើណាខ្លះដែលចាត់ទុកថាអ្នកដាក់សម្ពាធឱ្យខ្លួនឯង?

១. សម្រេចចិត្តដោយភាពភ័យខ្លាច៖ សម្រេចចិត្តដោយភាពភ័យខ្លាច ក្រៅពីធ្វើឱ្យច្របូកច្របល់ហើយ ថែមទាំងធ្វើឱ្យអ្នកមានសម្ពាធផ្លូវចិត្តទៀត។ មុននឹងសម្រេចថាធ្វើអ្វីមួយ ត្រូវសួរខ្លួនឯងឱ្យបានច្បាស់សិនថាជឿជាក់ចំពោះជម្រើសបែបនោះឬអត់ ប្រសិនបើអ្នកច្បាស់ជាមួយខ្លួនឯងហើយ អ្នកប្រាកដជាគ្មានភាពតានតឹង ឬមានសម្ពាធអ្វីឡើយ រីឯចិត្តគំនិតវិញក៏ហាក់ដូចជាមានភាពធូរស្បើយខ្លះដែរ។

រូបតំណាង

**២. ធ្វើអ្វីលើសសមត្ថភាពពេក៖** វាជាការល្អហើយដែលអ្នកអាចទទួលការងារច្រើនក្នុងពេលតែមួយបាន ប៉ុន្តែពេលខ្លះកម្លាំងរបស់អ្នកមិនប្រាកដថាអាចទ្រាំទ្រជាមួយសេចក្តីចង់មានចង់បានទាំងនោះទេ។ ការធ្វើអ្វីដែលលើសសមត្ថភាពពេកគឺធ្វើឱ្យគំនិតប្រាជ្ញាអ្នកចុះខ្សោយនៅថ្ងៃក្រោយ។

៣. ប្រៀបធៀបខ្លួនឯងជាមួយអ្នកដទៃ៖ វាសមហេតុសមផលដែរប្រសិនបើអ្នកយកខ្លួនទៅធៀបនឹងបុគ្គលជោគជ័យណាម្នាក់ដើម្បីធ្វើជាកម្លាំងចិត្ត ប៉ុន្តែកុំដល់ថ្នាក់ប្រាថ្នាឱ្យដូចជីវិតគេខ្លាំងពេក។ ធ្វើបែបនេះមិនខុសពីយកថ្មមកសង្កត់លើទ្រូងខ្លួនឯងទេ។

៤. ទិញរបស់ដែលមិនត្រូវការ៖ គួរបែងចែកឱ្យដាច់រវាង «របស់ដែលចង់បាន» និង «របស់ដែលត្រូវការ»។ បើអ្នកចំណាយលុយច្រើនលើរបស់ដែលចង់បាន នោះគឺចាត់ទុកថាអ្នកជាមនុស្សសម្ភារៈនិយមហើយ វាអាចឱ្យអ្នកសប្បាយចិត្តតែមួយភ្លែតប៉ុណ្ណោះតែ ក្រោយពីនោះទៅអ្នកនឹងមានអារម្មណ៍ថារបស់ដែលចង់បាននោះលែងសំខាន់តទៅទៀតហើយ។

រូបតំណាង

៥. ឆាប់មានប្រតិកម្មពេក៖ ទង្វើនេះបញ្ជាក់ថាក្នុងខ្លួនអ្នកពោរពេញទៅដោយភ្លើងក្តៅ ហើយវាមិនមែនកើតមកពីអ្នកដទៃទេ ភ្លើងនេះបញ្ឆេះឡើងដោយអ្នកតែម្នាក់គត់។ កុំឆាប់មានប្រតិកម្មពេក រៀនទប់ចិត្តខ្លួនឯងខ្លះហើយត្រូវព្យាយាមស្តាប់ឱ្យច្រើនជាងនិយាយ។ មិនខ្វះទេវិធីសាស្ត្ររម្ងាប់អារម្មណ៍ឆេវឆាវ ណាស់តែអ្នកមិនតាំងចិត្តធ្វើវាប៉ុណ្ណោះ៕

ចុចអាន៖បុគ្គលជោគជ័យលំដាប់ពិភពលោកទាំងនេះមានទម្លាប់ធ្វើអីខ្លះរាល់ព្រឹក?

ប្រភព៖ goalcast ប្រែសម្រួល៖ អ៊ុង រ័ត្នបញ្ញា