ស្រីៗស្រលាញ់សត្វចិញ្ចឹម រហូតដល់លែងចង់បានសង្សារ?

2017-06-28 10:06:25
ចំនួនមតិ 0 | ចំនួនចែករំលែក 0

ស្រីៗខ្លះស្រលាញ់ និងចាត់ទុកសត្វចិញ្ចឹម (ឆ្មា ឬ ឆ្កែ) ដូចជាសមាជិកក្រុមគ្រួសាររបស់ខ្លួនអញ្ចឹង ហើយគេបានផ្តល់សេចក្តីស្រលាញ់ខ្លាំង រហូតភ្លេចនឹកនាដល់ចង់មានស្នេហា។ ស្រីៗមួយចំនួនទៀតហ៊ានទាំងនិយាយថា អត់សង្សារបាន តែអត់ឆ្កែ អត់ឆ្មា រស់មិនបានទេ។ ហេតុអ្វីបានជាស្រីៗស្រលាញ់សត្វចិញ្ចឹមដល់ថ្នាក់នេះ?

នៅពេលនេះ យើងមានសុភាពនារី ៣នាក់ ដែលជាអ្នកស្រលាញ់សត្វចិញ្ចឹមខ្លាំងបំផុត ចូលមកបកស្រាយពីមូលហេតុទាំងនេះ៖

កញ្ញា ចាន់ ជាត្តា បានប្រាប់កញ្ញាថា៖ «សត្វចិញ្ចឹមប្រៀបបានដូចជាសមាជិកគ្រួសារ ខ្ញុំស្រលាញ់គេខ្លាំងណាស់ ហើយប៉ាម៉ាក់ខ្ញុំ ក៏ស្រលាញ់គេដូចជាកូនប្រុសស្រី អញ្ចឹងដែរ។ សត្វចិញ្ចឹមមានអារម្មណ៍ដូចមនុស្សដែរ ហើយពួកគេដឹងពីមនុស្សច្រើន។ ពេលខ្លះ យើងនិយាយថា យើងស្រលាញ់គេខ្លាំង ប៉ុន្តែគេស្រលាញ់យើងខ្លាំងជាងយើងគិតទៅទៀត»។

ចំពោះរឿងស្នេហា និងសត្វចិញ្ចឹមវិញ ជាត្តា បានបញ្ជាក់ថា៖ «ពេលខ្លះ គ្មានសង្សារក៏មិនអីដែរ កុំឲ្យតែរស់នៅដោយគ្មានសត្វឆ្កែ ព្រោះវានឹងធ្វើឲ្យខ្ញុំមានអារម្មណ៍ឯកា ហើយអផ្សុក»។

ជាត្តា និងសត្វឆ្កែរបស់នាង។

ចំពោះកញ្ញា អ៊ុក អេលីតា ដែលជាអ្នកស្រលាញ់សត្វឆ្កែខ្លាំងដែរនោះ បានឲ្យដឹងថានាងស្រលាញ់សត្វតាំងពីនាងនៅតូច ព្រោះថាពួកគេគួរឲ្យខ្នាញ់ ហើយគេស្រលាញ់ម្ចាស់ដោយស្មោះ។ អេលីតា បានបន្តថា សត្វចិញ្ចឹមចូលចិត្តឲ្យមនុស្សអង្អែល ដូចនេះយើងនឹងមានភាពកក់ក្តៅ ដូចជាយើងបានប្រលែងលេងជាមួយកូន ឬមិត្តភក្តិជិតស្និទ្ធរបស់យើងអ៊ីចឹង។ លើសពីនេះ សត្វឆ្កែរបស់អេលីតា ក៏ជាផ្នែកមួយជំរុញទឹកចិត្តរបស់នាងផងដែរ។

ចំពោះរឿងស្នេហាវិញ អេលីតា អះអាងថា មនុស្សប្រុសដែលស្រលាញ់នាង គួរតែយល់ពីការសេចក្តីស្រលាញ់របស់នាងចំពោះសត្វចិញ្ចឹម។ អេលីតា ៖ «បើគេស្អប់សត្វឆ្កែរបស់ខ្ញុំ ខ្ញុំក៏មិនទៅរវល់ស្រលាញ់គេដែរ។ ប៉ុន្តែប្រសិនបើគេប្រតិកម្មនឹងរោមសត្វ ខ្ញុំអាចស្វែងយល់ ហើយរកវិធីផ្សេងបាន»។

អេលីតា និងសត្វឆ្កែរបស់នាង

រីឯ កញ្ញា វិញ សុជាតា ដែលស្រលាញ់សត្វឆ្មាខ្លាំង ក៏បានតាំងចិត្តដែរថា ៖ «ប្រសិនបើសង្សារខ្ញុំ ឲ្យខ្ញុំជ្រើសរើសរវាងគាត់ និងសត្វចិញ្ចឹម ខ្ញុំនឹងជ្រើសរើសយកសត្វចិញ្ចឹម ព្រោះខ្ញុំយល់ថាមនុស្សដែលមិនចូលចិត្តសត្វចិញ្ចឹម ដូចជាមនុស្សដែលគ្មានបេះដូងអញ្ចឹង។ ម៉េចបានគេមិនចូលចិត្ត ឆ្កែ ឬ ឆ្មា ដ៏គួរឲ្យស្រលាញ់ទាំងអស់នេះ?»

សុជាតា បានប្រៀបប្រដូចសត្វ ឆ្មា និងឆ្កែរបស់នាង ដូចជាមិត្តស្និទ្ធិស្នាលម្នាក់ ដែលរាល់ថ្ងៃពេលនាងបានលេងជាមួយពួកគេ គឺនាងសប្បាយចិត្តមែនទែន។ ហើយពួកគេស្មោះត្រង់នឹងនាង ទោះបីជាគេមិនចេះនិយាយភាសាមនុស្សក៏ដោយ។ គ្រប់ពេលនាងចង់ទិញរបស់លេងប្លែកៗឲ្យសត្វឆ្មា ឆ្កែ នាងលេង ហើយចង់មើលថែពួកគេឲ្យបានល្អបំផុត។ ពេលទៅណាម្តងៗ ជាតាតែងមានអារម្មណ៍ថា សត្វចិញ្ចឹមរបស់គេកំពុងតែនឹកគេ ហើយនាងក៏នឹកពួកគេខ្លាំងដែរ៕

អត្ថបទៈ ភារី