ស្លៀកពាក់ ៧របៀបនេះ ដឹងតែជួយឲ្យនារីរាងទាបល្អិតៗ មើលទៅឃើញខ្ពស់ស្អាតតែម្តង

2017-06-26 10:12:53
ចំនួនមតិ 0 | ចំនួនចែករំលែក 0

មនុស្សស្រីរាងតូចល្អិត មិនមែនអត់ប្រយោជន៍ទេ ព្រោះថាមនុស្សស្រីមានរាងបែបនេះ តែងតែមើលទៅក្មេងជាងវ័យ មិនចេះចាស់។ ប៉ុន្តែប្រសិនបើមិនចេះរើសខោអាវស្លៀកពាក់ ឬសម្ភារៈលម្អខ្លួននោះទេ នោះមនុស្សស្រីរាងបែបនេះ អាចមើលទៅឃើញកន្តឿ ហើយធាត់។ ខាងក្រោមនេះជាគន្លឹះនៃការស្លៀកពាក់ ៧ចំណុច ជួយឲ្យការតុបតែងខ្លួនរបស់មនុស្សស្រីមានកម្ពស់ទាបល្អិត អាចមើលទៅឃើញខ្ពស់ស្អាត និងមានរាងស្លីមស្វែល គួរឲ្យទាក់ទាញ។ ១. អាវ និងសំពត់ ដើម្បីឲ្យមើលទៅ មានភាពសមរម្យ នារីៗរាងតូចល្អិត គួរកុំពាក់អាវវែង គ្របលើសំពត់វែង ព្រោះមើលទៅ ឃើញកាន់តែទាបកន្តឿ។ ដូច្នេះ អ្នកគួរតែតឺនុយអាវចូលក្នុងសំពត់ ដើម្បីឲ្យមើលទៅឃើញជើងវែង កម្ពស់ខ្ពស់។ ២. ខ្សែក្រវ៉ាត់ និងស្បែកជើង ប្រសិនបើពាក់ស្បែកជើងកែងចោត ឬស្បែកជើងផ្ទាត់ ដែលមានខ្សែចងកែងជើង នារីៗគួរតែជ្រើសយកពណ៌ណា ដែលស៊ីនឹងសម្បុរស្បែក បើមិនដូច្នោះទេ វាអាចធ្វើឲ្យឃើញជើងខ្លី។ ចំពោះខ្សែក្រវ៉ាត់វិញ អ្នកមិនគួរពាក់ខ្សែក្រវ៉ាត់ដាក់ចង្កេះ មានរង្វង់ធំនោះទេ ព្រោះវាអាចធ្វើឲ្យឃើញដើមទ្រូងធំ។ គួរតែពាក់ខ្សែក្រវ៉ាត់តូច ឬ មិនបាច់ពាក់តែម្តង ប្រសិនបើអ្នកស្លៀករ៉ូបវែង។ ៣. អាវក្រៅខ្លី និងអាវក្រៅវែង អ្នកមិនគួរពាក់អាវក្រៅ ឬក៏សម្លៀកបំពាក់ ដែលមានដៃវែង និងធំពេកនោះទេ ព្រោះវានឹងធ្វើឲ្យអ្នកកាន់តែទាប ហើយរីកមាឌធំ។ អ្នកគួរតែជ្រើសរើសយកសម្លៀកបំពាក់ណា ដែលមិនរលុងពេក ហើយសមនឹងខ្លួន។ ប្រសិនបើពាក់អាវក្រៅដៃវែង នោះអ្នកគួរតែមូរដៃវាឡើងត្រឹមចង្កេះ។ ជាមួយគ្នានេះ អ្នកក៏គួរតែប្រុងប្រយ័ត្ន ចំពោះការជ្រើសរើសកាបូបស្ពាយ ឬយួរធំៗទេ គួរតែជ្រើសយកកាបូបតូចៗវិញ។ ៤. អាវចាក់ ចំពោះអាវចាក់ អ្នកគួរជ្រើសរើសអាវដែលមានសម្រុងវែង ហើយមានហោប៉ៅ។ ពាក់អាវបែបនេះ ក៏អាចធ្វើឲ្យអ្នកមើលទៅខ្ពស់ ដោយមិនបាច់ពាក់ស្បែកជើងកែងចោត។ ៥. រ៉ូប គួរតែពាក់រ៉ូបរឹបមានរាង ហើយដាក់ខ្សែក្រវ៉ាត់ត្រង់ចង្កេះមួយទៅ គឺមើលទៅអេមតែម្តង។ តែបើពាក់រ៉ូបរលុងពេក វានឹងមើលទៅ ដូចទីងម៉ោង។ ៦. ការជ្រើសរើសពណ៌ដូចគ្នា និងខុសគ្នា ប្រសិនបើអ្នកស្លៀកខោ និងពាក់អាវ ពណ៌ខុសគ្នា វាអាចធ្វើឲ្យរាងរបស់អ្នកធំ ហើយមើលទៅដាច់ដោយឡែកពីគ្នា រវាងខ្លួន និងជើង។ ប៉ុន្តែបើជ្រើសរើសពណ៌ដូចគ្នា វាអាចធ្វើឲ្យកម្ពស់របស់អ្នកឡើងខ្ពស់មួយកម្រិតទៀត។ ជាទូទៅការស្លៀកពាក់ពណ៌ឆើតៗ សម្រាប់មនុស្សស្រីទាបៗ វានឹងឃើញមាឌធំ មិនសូវស្អាត។ ៧. ខោខៅប៊ូយ និងអាវយឺត គួរតែស្លៀកខោខៅប៊ូយ ដែលមានចង្កេះវែងដល់ផ្ចិត ហើយគួរតែពាក់អាវយឺតដៃវែង និងសម្រុងខ្លួនខ្លី ដើម្បីមើលទៅឃើញរាងខ្ពស់ស្លីម គួរឲ្យស្រលាញ់។ ដូច្នេះ ប្រសិនបើអ្នកទើសទាល់ក្នុងការស្លៀកពាក់ឥលូវនេះ អ្នកអាចចាប់ផ្តើមសាកល្បងជាមួយស្ទីលទាំងនេះបាន!

ប្រភព៖ Brightside ប្រែសម្រួលៈ ភារី