សុំទោសដែលធ្វើឲ្យបងប្អូនអ្នកទាំងពីរ និងមនុស្សពីរនាក់ផ្សេងទៀតឈឺចាប់!

2017-05-03 10:18:33
ចំនួនមតិ 0 | ចំនួនចែករំលែក 0

មិនដឹងថានេះជាកំហុស ឬក៏កម្មពៀរពួកខ្ញុំទាំង ៥ នាក់ឡើយ។ ខ្ញុំមានឈ្មោះ រស្មី nickname P ជាបុគ្គលិកក្រុមហ៊ុនឯកជនមួយដែលមានទំនាក់ទំនងស្នេហាដ៏រញ៉េរញ៉ៃនៅកន្លែងធ្វើការ។

បន្ទាប់ពីបញ្ចប់ការសិក្សាខ្ញុំរកការងារធ្វើ និងជាប់ជាជំនួយការ CEO នៅក្នុងក្រុមហ៊ុនជាមួយសង្សារខ្ញុំឈ្មោះ ទី ដែលមានមុខតំណែងផ្នែកទីផ្សារ តែអ្នកដទៃមិនដឹងថាពួកខ្ញុំជាស្អីនឹងគ្នាទេ ហើយយើងទាំងពីរក៏ស្រលាញ់គ្នាបេះមិនចេញដែរ។ រហូតមួយឆ្នាំក្រោយទើបមានអ្នកដឹងខ្លះៗពីរឿងពួកខ្ញុំ ព្រោះឃើញខ្ញុំស្និទ្ធស្នាលគ្នាខុសពីអ្នកធ្វើការដទៃពេក។

ដល់ថ្ងៃមួយខ្ញុំបានផ្លាស់មុខតំណែង ព្រោះចង់សាកល្បងការងារថ្មីតែនៅកន្លែងចាស់ដដែល និងបានធ្វើការជាមួយ រក្សា ដែលមានមុខតំណែងជាងមេខ្ញុំ និងមានអាយុបងខ្ញុំ ៤-៥ ឆ្នាំ។ តួនាទីថ្មីនេះមិនដឹងថាយ៉ាងម៉េចយ៉ាងម៉ាទេ តែអ្នកដទៃតែងប្រាប់ខ្ញុំថាមេថ្មីខ្ញុំនោះពិបាកធ្វើការជាមួយណាស់ គ្មាននរណាចុះសម្រុងជាមួយឡើយ ចំណែកខ្ញុំវិញបានត្រឹមយកមកគិតប៉ុណ្ណោះ។ ផ្ទុយស្រឡះពេលមកធ្វើការជាមួយមេ ខ្ញុំយល់ថាអ្នកទាំងនោះនិយាយមិនពិតឡើយ រក្សា ស្រួលធ្វើការជាមួយណាស់ ចេះយល់ពីសុខទុក្ខ និងតាមយកចិត្តខ្ញុំរហូត ហើយឲ្យតែពេលចេញទៅជួបភ្ញៀវតូច ឬធំគាត់តែងនាំខ្ញុំទៅជាមួយជានិច្ច។

ធ្វើការជាមួយគ្នា ៣ ខែខ្ញុំមានអារម្មណ៍ថាមេខ្ញុំដូចជាស្រលាញ់ខ្ញុំមិចមិនដឹងទេ ខ្ញុំយករឿងនេះទៅប្រាប់មិត្តភ័ក្ដិជិតស្និទ្ធធ្វើការជាមួយ ហើយគេក៏និយាយថា គេក៏គិតដូចខ្ញុំដែរ ព្រោះគេថាធ្លាប់ឃើញមេខ្ញុំ តាមសម្លឹងខ្ញុំដោយក្រសែភ្នែកខុសពីអ្នកដទៃ។ មិនអស់ចិត្តខ្ញុំក៏យករឿងនោះទៅប្រាប់មិត្តប្រុស តែមិត្តប្រុសខ្ញុំក៏ថាខ្ញុំគិតតែម្នាក់ឯង តែគេចូលចិត្តព្រោះខ្ញុំពូកែនិយាយលេងទៅវិញទេ។

បីថ្ងៃបន្ទាប់ ខ្ញុំ និង រក្សា បានចុះបេសកកម្មទៅមណ្ឌលគិរី នៅទីនោះពួកយើងមានបញ្ហាជាច្រើនជាមួយគ្នារហូត ដល់ថ្នាក់ខ្ញុំចុះពីឡាននៅតាមផ្លូវទៀតផង។ តែពេលមកដល់ភ្នំពេញវិញគេបានតាមអង្វរខ្ញុំរហូត ហើយខ្ញុំក៏បាត់ខឹង។

ថ្ងៃបន្ទាប់រឿងដ៏ហួសចិត្តមួយបានកើតឡើង គឺថា CEO ឲ្យខ្ញុំ និង មេ ខ្ញុំទៅជួបភ្ញៀវនៅសៀមរាបតែពីរនាក់ទៀត។ ដោយមិនអាចប្រកែកបានយើងក៏ទៅទៀត តែខ្ញុំលួចឃើញមេខ្ញុំញញឹមពេលឮបែបនេះ។ យប់ទី១ នៅសៀមរាបក៏បានមកដល់ យើងបានទៅញ៉ាំអីជាមួយគ្នា និងស្ដាប់ភ្លៀង ញ៉ាំបៀរបន្តិចបន្តួច ហើយគេក៏ចាប់ផ្ដើមសារភាពប្រាប់ថាស្រលាញ់ខ្ញុំត្រង់ៗ។ នោះហើយជាពេលដែលខ្ញុំស្អប់ខ្លួនឯងបំផុត ព្រោះខ្ញុំមិនបានបដិសេធការស្រលាញ់របស់គាត់ តែអ្វីដែលធ្វើឲ្យខ្ញុំកាន់តែស្អប់ខ្លួនឯងគឺខ្ញុំយល់ព្រមនឹងគាត់ធ្វើជាសង្សារលួចលាក់ជាមួយគ្នាទៀតផង ទោះបីមានសង្សាររៀងខ្លួនក៏ដោយ។

បន្ទាប់ពីមកពីសៀមរាបពួកយើងកាន់តែយល់ចិត្តគ្នា ចំណែក ទី វិញខ្ញុំនៅតែស្រលាញ់អស់ពីបេះដូងដដែល តែខ្ញុំឆ្ងល់ថា ខ្ញុំយក រក្សា មកទុកនៅទីណា បើបេះដូងពេញដោយម្នាក់ឈ្មោះ ទី នោះទៅហើយ។ ថ្ងៃមួយយើងលួចណាត់ជួបគ្នាទៅញ៉ាំអាហារ ហើយខ្ញុំ និង ឲ្យបានចាប់ដៃគ្នាដូចសង្សារ។ ពេលនោះខ្ញុំមានអារម្មណ៍ថាខ្លួនឯងជាមនុស្សស្រីអាក្រក់បំផុតហើយ ព្រោះហ៊ានទាក់ទងបុរសពីរនាក់ក្នុងពេលតែមួយ។ តាមផ្លូវមកផ្ទះវិញគេសួរខ្ញុំថាធ្វើយ៉ាងណា ខ្ញុំមិនដឹងថាធ្វើយ៉ាងណាដែរ តែអ្វីដែលខ្ញុំប្រាកដបាន គឺមិនអាចរស់នៅដោយគ្មាន ទី។ ខ្ញុំថា "រវាងយើងទាំងពីរអាចចប់គ្នាបាន តែខ្ញុំនិង ទី គឺមិនអាចបែកគ្នាបានឡើយ”។

គ្រាន់តែឮសម្ដីនោះគេខឹងខ្ញុំ ហើយចាប់តាំងពីពេលនោះមកពួកយើងមិនសូវត្រូវគ្នាទេ។ ពេលខ្លះគេមិនខ្វល់ពីខ្ញុំ ហើយខ្ញុំក៏គិតថារឿងពួកយើងបានចប់ហើយ។ ពេលគិតបែបនេះម្ដងៗ និងចាប់ផ្ដើមភ្លេច គេតែងមកធ្វើល្អជាមួយខ្ញុំវិញ ហើយខ្ញុំក៏ចាប់ផ្ដើមទន់ចិត្តដែរ។ យើងលួចទាក់ទងគ្នាបែបនេះបាន ១ ឆ្នាំ ទើបរឿងរ៉ាងលេចឮដល់ ទី តែ ទី គ្រាន់តែខឹងនឹងខ្ញុំប៉ុណ្ណោះ ហើយខ្ញុំចង់និយាយជាមួយ រក្សា ដើម្បីបញ្ចប់ទំនាក់ទំនងរញ៉េរញ៉ៃនោះណាស់ តែគេមិនព្រមនិយាយស្ដីអ្វីទាំងអស់។ រហូតដល់ពេលមួយខ្ញុំទៅដើរផ្សារ Aeon ជាមួយមិត្តភ័ក្ដិស្រីៗ ក៏បានជួប មេខ្ញុំ កំពុងបណ្ដើរស្រីថ្មីទៅទិញឥវ៉ាន់ តែខ្ញុំធ្វើធម្មតា គេក៏ធ្វើមិនស្គាល់គ្នា អ្វីដែលមិនធម្មតាគឺខ្លួនខ្ញុំក្ដៅដូចភ្លើង ដោយមិនដឹងមូលហេតុ។

មួយសប្ដាហ៍កន្លងផុតទៅ គេបានមកហៅខ្ញុំថា** baby** ប្រហែលជាបែកគ្នាជាមួយអ្នកនោះហើយ ទើបមកហៅខ្ញុំផ្អែមបែបនេះ តែខ្ញុំមិនរវល់ ហើយគេក៏ចាប់ផ្ដើមតាមលួងខ្ញុំ ពួកយើងក៏ត្រូវគ្នាវិញ។ ខ្ញុំស្អប់ខ្លួនឯងបែបនេះ ហេតុអ្វីមិនចិត្តដាច់ផឹងជាមួយគេតែម្ដងទៅ នៅត្រាំត្រែងដល់ណា?

មួយខែកន្លង បើមិនទៅជួបអតិថិជន ពួកយើងមិនដែលទៅណាមកណាជាមួយគ្នាឡើយ ហើយក៏មិនដែលនិយាយគ្នាទៀត។ យប់មួយខ្ញុំទៅញ៉ាំអីនៅហាងម្ដុំបឹងកេងកងដែលជាហាង រក្សា ឧស្សាហ៍នាំមិត្តភ័ក្ដិ និងស្រីៗមកញ៉ាំអី ព្រោះឧស្សាហ៍ឃើញគេ check-in។ តែខ្ញុំមកដោយសារតែមិត្តភ័ក្ដិស្គាល់កន្លែង និងថាទីនេះមានផាសុកភាព និងសេវាកម្មល្អប៉ុណ្ណោះ មិនមែនមកចង់ជួបគេទេ។ មុននឹងមកខ្ញុំគិតដែរថាខ្លាចជួបគេនៅកន្លែងនេះណាស់ ហើយពិតជាជួបមែនពេលខ្ញុំទៅបន្ទប់ខ្ញុំដើរកាត់មុខតុគេ លើកនេះខុសពីលើកមុនត្រង់បណ្ដើរស្រីម្នាក់ តែលើកនេះស្រី ២ នាក់ឱបឆ្វេងស្ដាំ។ ខ្ញុំក្រឡេកទៅឃើញ ហើយគេក៏ឃើញខ្ញុំ ដូចលើកមុនដែរខ្ញុំធ្វើជាមិនស្គាល់ តែគេស្ទុះក្រោកមក តែខ្ញុំក៏ដើរហួសទៅដល់បន្ទប់ទឹក។ ពេលចេញមកវិញគេនៅឈររង់ចាំខ្ញុំនៅខាងមុខបន្ទប់ទឹក តែខ្ញុំដើរហួសធ្វើមិនឃើញ។ ដើរផុតបាន ៣ ជំហានគេធ្វើជាស្រែកថា "មកតាមដានមែន”? តែខ្ញុំធ្វើមិនស្គាល់ រួចក៏ហួសចេញទៅ ដើរមកដល់ផ្លូវកាច់ជ្រុងក៏បុកបុរសម្នាក់ ទាំងមុខមាត់ និងរូបរាងពិតជាសង្ហា ហើយក៏សុំទោសគេ និងទៅដល់តុ ទោះញ៉ាំមិនទាន់អស់ តែខ្ញុំហៅគេគិតលុយ។

រំលងបាន ៣ ថ្ងៃពេលចុះទៅញ៉ាំអាហារថ្ងៃត្រង់ខ្ញុំក៏បានជួបគេឈរមុខក្រុមហ៊ុនខ្ញុំ ហើយបុរសសង្ហាដែលខ្ញុំបានដើរប៉ះថ្ងៃមុនក៏និយាយពាក្យ "សួស្ដី” ធ្វើឲ្យខ្ញុំ និង ទី ទៅជាស្រឡាំងកាំង។ ខ្ញុំគិតថាម្នាក់នោះប្រហែលជាចង់ញ៉ែខ្ញុំ ហើយខ្ញុំក៏មិនខ្វល់រហូតដល់ត្រឡប់ពីញ៉ាំបាយវិញខ្ញុំឃើញម្នាក់សង្ហានោះ នៅឈរនិយាយជាមួយនរណាម្នាក់កៀន office ពេលដើរជិតដល់ខ្ញុំឮសំឡេងបុរសម្នាក់ដែលនៅបន្ទប់ធ្វើការតែពីរនាក់រាល់ថ្ងៃ នោះគឺ រក្សា។ ស្ដាប់យូរៗទៅទើបដឹងថាបុរសសង្ហានោះ គឺប្អូនប្រុសបង្កើតរបស់រក្សា ខ្ញុំក៏គិតរឿងឆ្កួតមួយថា ធ្វើយ៉ាងណាឲ្យប្អូនប្រុសរបស់ រក្សា ខូចចិត្តម្ដង ដើម្បីសងសឹក ដែលមេឆ្កួតនោះតែងធ្វើលើខ្ញុំ។ នេះជាការគិតលេងៗរបស់ខ្ញុំទេ គ្មានចេតនាឡើយ។

កំពុងតែគិតសុខៗ ខ្ញុំក៏បានដើរទៅប៉ះគេទៀត តែម្ដងនេះខ្ញុំធ្វើជាញ៉ិកញ៉ក់ឲ្យគេចាប់អារម្មណ៍ វិធីនេះពិតជាបានផលមែន។ ខ្ញុំដួលទៅដី ហើយគេក៏ចូលមកជួយលើក តែគេមិនដឹងខ្លួនថាជាប់អន្ទាក់ខ្ញុំទេ។ បន្ទាប់មកខ្ញុំអរគុណគេ ហើយប្អូនប្រុសដ៏សង្ហារបស់ រក្សា ចាប់ផ្ដើមញ៉ែខ្ញុំត្រង់ៗដោយគេសូមណាត់ញ៉ាំបាយល្ងាចនេះ តែត្រូវខ្ញុំបដិសេធ ហើយលើកណាត់ទៅញ៉ាំបាយស្អែកវិញ ព្រោះដើរប៉ះគេពីរដង។ មុននឹងទៅគេបានងាកមកសួរថា ខ្ញុំធ្វើការនៅទីនេះដែរមែន ខ្ញុំក៏ឆ្លើយថាចា គេប្រាប់ថាថ្ងៃស្អែកនឹងធ្វើឲ្យខ្ញុំភ្ញាក់ផ្អើល។ តាមខ្ញុំគិតគេប្រហែលជាហៅបងប្រុសគេមកដែរក៏មិនដឹង។

ស្អែកម៉ោងបាយថ្ងៃត្រង់ដ៏សែនអន្ទះសាបានមកដល់ ម៉ោង ១១:៥០ នាទី ខ្ញុំឃើញ មេខ្ញុំចេញពីការិយាល័យ ហើយដើរសំដៅទៅហាងដ៏ធំនៅទល់មុខនោះ ហើយក៏ជាហាងតែមួយដែលប្អូនគេណាត់ខ្ញុំ។ "ចូលស៊ងទាំងបងទាំងប្អូនហើយតើ" នេះជាគំនិតខ្ញុំ ហើយក៏ដើរតាមក្រោយគេទៅ។ ពេលខ្ញុំទៅដល់ហាងមេខ្ញុំពិតជាភ្ញាក់ផ្អើល ហើយខ្ញុំក៏ធ្វើជាភ្ញាក់ផ្អើល។ ក្រោយបាយរួចប្អូនគេសុំលាពួកខ្ញុំទៅមុន ហើយតាមផ្លូវមកកន្លែងធ្វើការវិញគេសួរខ្ញុំថាម៉េចក៏មានរឿងបែបនេះកើតឡើង ខ្ញុំក៏ប្រាប់តាមត្រង់ថានោះជាគម្រោងការ គេពិតជាភ្ញាក់ផ្អើលសម្រាប់សម្ដីមុតស្រួចរបស់ខ្ញុំ។ ចាប់តាំងពីពេលនោះខ្ញុំធ្វើឲ្យ រង្សី គេស្រលាញ់ខ្ញុំយ៉ាងងប់ងុល ដោយតែងតែឆាត ឬនិយាយទូរស័ព្ទធ្វើដូចជាព្រួយបារម្ភ និងខ្វល់ពីគេ។

២ ខែក្រោយស្គាល់គ្នាខ្ញុំអាចដឹងថាប្អូនប្រុសគេពិតជាស្រលាញ់ខ្ញុំខ្លាំង ហើយក៏ដល់ពេលខ្ញុំសុំប្អូនប្រុសគេបែកគ្នា។ គ្រាន់តែឮពាក្យនេះ បុរសមានមាឌធំរាងសង្ហាបែរជាបង្ហូរទឹកភ្នែកនៅចំពោះមុខខ្ញុំទៅវិញ គេព្យាយាមសូមខ្ញុំត្រូវគ្នា ហើយសួរពីហេតុផល តែខ្ញុំឆ្លើយថាមកពីខ្ញុំចង់បែក។ ទោះជាមាត់ខ្លាំងតែក៏រៀងរំជួលចិត្តបន្តិចដែរ តែនៅតែធ្វើជាចិត្តរឹងថា មិនអាចទាក់ទងគ្នាបានទៀតទេ ព្រោះមិនចង់មានបញ្ហាជាមួយបងប្រុសគេ។

ខ្ញុំគិតថា រក្សា ប្រាកដជានិយាយដើមខ្ញុំប្រាប់ប្អូនប្រុសគេហើយ តែនោះជាការគិតផ្ទុយស្រឡះព្រោះគេមិនដែលរំលឹករឿងនោះប្រាប់ រង្សី សូម្បីតែបន្តិច មានតែនិយាយល្អប្រាប់។ មួយខែក្រោយខ្ញុំបានប្រកាសលើ Facebook ថាខ្ញុំជិតរៀបការជាមួយសង្សារខ្ញុំ ហើយគ្រាន់តែឮតំណឹងនេះភ្លាម រង្សី តេមកខ្ញុំមកឈប់ តែខ្ញុំមិនទទួល ហើយគេក៏តេមកបងប្រុសគេដើម្បីជួប ហើយមេខ្ញុំមកសូមឲ្យខ្ញុំទៅជួបប្អូនប្រុសគេ ព្រោះពេលនេះ រង្សី ស្រែកយំឡូឡាដូចមនុស្សឆ្កួត។

សម្ដីដែលខ្ញុំឮចេញពីមាត់ និងទឹកភ្នែកបុរសដែលខ្ញុំគិតថាជាព្រាននារី ពិតជាធ្វើឲ្យខ្ញុំស្លុតចិត្ត និងគិតថាខ្លួនឯងមានកំហុសធ្ងន់ណាស់។ នៅក្នុងបន្ទប់ធ្វើការតែពីរនាក់ រក្សា ចាប់ផ្ដើមដោយសំឡេងបែបពិបាកទប់អារម្មណ៍មិនចង់យំ តែភ្នែកក្រហមបាត់ទៅហើយ "ហេតុអ្វីអូនធ្វើបែបនេះ? ទោះដឹងថាអូនមានសង្សារហើយក៏បងនៅតែតាមស្រលាញ់, បងស៊ូទ្រាំឈឺចាប់ស្រលាញ់អូនទាំងគេមានម្ចាស់, អូនឃើញបងបណ្ដើរស្រីថ្មីនោះមិនមែនបងចង់ធ្វើឡើយ តែព្រោះបងចង់ឲ្យអូនកាត់ចិត្ត និងសាងជីវិតដ៏ល្អជាមួយ ទី បងក៏សម្រេចចិត្តដើរចេញ។” គេនិយាយបណ្ដើរស្រក់ទឹកភ្នែកម៉ាត់ៗនៅចំពោះមុខខ្ញុំ "អូនធ្វើបាបបងតែម្នាក់ឯងមិនអស់ចិត្ត ទៅទាក់ទងប្អូនបងឲ្យគ្នាស្ទើរក្លាយជាមនុស្សឆ្កួតម្នាក់ទៀត ទាំងមិនដឹងអី, ព្រោះតែស្រលាញ់អូន បងសុខចិត្តបែកគ្នានឹងមិត្តស្រីដែលស្រលាញ់ រស់នៅ និងតស៊ូជាមួយគ្នាជិត ១០ ឆ្នាំ, អូនផ្អែមល្ហែមជាមួយសង្សារនៅនឹងមុខបង បងមិនទាំងថាអីផង។ ពេលអូនឃើញបងនៅជាមួយស្រីផ្សេងបងគិតថាអូនប្រហែលជាកាត់ចិត្តពីបងបានហើយ តែហេតុអីអូននៅធ្វើឲ្យក្មេងប្រុសអាយុ ២៣ ឆ្នាំ មិនដឹងអីសោះនោះមកឈឺចាប់ព្រោះស្នេហាគ្រាដំបូងរបស់គេ? រឿងរវាងយើងទាំងពីរបងមិនហ៊ានប្រាប់ប្អូនបងឡើយ បងសង្ឃឹមថាអូននិងគេអាចទៅមុខបានល្អ ជាងនេះ តែអូនមកផ្ដាច់ចំពេលមនុស្សស្រលាញ់ខ្លាំង ឥឡូវវាស្ទើរតែសម្លាប់ខ្លួនទៅហើយ។ហេតុអី???????????? ហេតុអីមនុស្សដូចអូនចិត្តអាក្រក់យ៉ាងនេះ”?

ខ្ញុំបានត្រឹមតែខំមាត់រកនិយាយអ្វីមិនចង់ ដើរចេញទៅសម្ងំយំក្នុងបន្ទប់ទឹកម្នាក់ឯងរាប់ម៉ោង ហើយពេលមកដល់បន្ទប់វិញ រក្សា ក៏ចេញទៅបាត់ទៀត ធ្វើឲ្យខ្ញុំគិតថា ខ្លួនឯងពិតជាអាក្រក់ពេកហើយ។ និយាយតាមត្រង់ខ្ញុំមិនបានស្រលាញ់ រក្សា ខ្លាំងអីណាស់ណាទេ តែហេតុអីខ្លួនឯងចិត្តខ្មៅធ្វើឲ្យគេឈឺចាប់បែបនេះទៅវិញ។ ចុងក្រោយខ្ញុំមានវិប្បដិសារីដែលធ្វើឲ្យមនុស្សប្រុស ៣ នាក់ និងនារីម្នាក់ខូចចិត្ត។ ចង់ប្រាប់ថាខ្ញុំមិនបានដឹងថា រក្សា ស្រលាញ់ខ្ញុំខ្លាំងដល់ថ្នាក់នេះឡើយ ហើយអ្វីដែលសោកស្ដាយបំផុតគឺធ្វើឲ្យ រង្សី ដែលគ្នាទើបស្គាល់ស្នេហ៍គ្រាដំបូង បែរជាជិតក្លាយជាមនុស្សឆ្កួតទៅវិញ រឹតតែមិនដឹងថាតើនារីម្នាក់នោះឈឺចាប់ប៉ុណ្ណាពេលបាត់បង់មនុស្សប្រុសដែលខ្លួនខំលះបង់ខ្លួនប្រាណ និងពេលវេលាមករាប់ឆ្នាំ ជាពិសេសចង់សុំទោសចំពោះ ទី ដែលធ្លាប់ក្បត់ចិត្តបង តែបងមិនប្រកាន់ខឹង និងនៅតែស្រលាញ់ខ្ញុំដូចដើម៕

ផ្ដល់ឲ្យពីមនុស្សស្រីដ៏សែនឃោរឃៅ!

អត្ថបទ៖ ទ្រី រ៉ាវី