បើឪពុកម្ដាយមិនពេញចិត្តសង្សារ តើបុរសៗមានដំណោះស្រាយបែបណា?

2017-04-06 09:26:14
ចំនួនមតិ 0 | ចំនួនចែករំលែក 0

នេះជាសំណួរដ៏ពិបាកបំផុតសម្រាប់បុរសៗ ពេលដែលឪពុកម្ដាយមិនពេញចិត្តនឹងសង្សារខ្លួនបែបនេះ។ ចង់ដឹងថាប្រុសៗឆ្លើយ ឬដោះស្រាយបែបណាពេលជួបបញ្ហានេះកើតឡើង អានតិចបុរស ៥ នាក់ដែលធ្លាប់ជួបប្រទះបញ្ហានេះ៖

ភីរម្យ៖ «នេះជាបទពិសោធន៍ដ៏ឈឺចាប់ដែលធ្វើឲ្យខ្ញុំបែកគ្នាជាមួយមិត្តស្រីកាលពី ៣ ឆ្នាំមុន ហើយរហូតមកទល់ពេលនេះ ខ្ញុំមិនទាន់សម្លឹងមើលអ្នកផ្សេងដែរទេ ព្រោះខ្លាចមិនសមបំណងដូចលើកមុន ហើយក៏ខ្លាចធ្វើឲ្យនារីម្នាក់ទៀតអស់សង្ឃឹមចំពោះខ្ញុំ។ ខ្ញុំធ្លាប់បានពួកគាត់ថា"ហេតុអ្វីមិនអាចឲ្យពួកខ្ញុំរៀបការជាមួយគ្នាបាន? ចម្លើយគាត់ថា គាត់មិនពេញចិត្ត ចាំដល់ពេលគាត់ពេញចិត្តចាំគាត់ឲ្យរៀបការ"។ មិនមែនខ្ញុំមិនខំប្រឹងទេ តែគាត់មិនព្រម ទោះជាវិធីណាក៏ដោយ»។

សុវណ្ណា៖ «ខ្ញុំដឹងថាអ្នកមានគុណ ពិតជាមានហេតុផលរបស់គាត់ តែយើងក៏ត្រូវមានហេតុផលរបស់យើងដែរ។ ដំបូងយើង និងសង្សារត្រូវប្រាកដចិត្តគ្នាជាមុនសិនថា ពិតជាចង់ដឹកដៃគ្នាចូលរោងការមែនឬក៏អត់? បើមែនយើងទាំងពីរត្រូវជម្នះរបាំងមួយនេះឲ្យបាន ហើយបើគាត់នៅមិនព្រម ចាំប្រើវិធីពិសេសចុងក្រោយថា "បើនារីដែលខ្ញុំនាំមកជួបប៉ាម៉ាក់មិនពេញចិត្ត មិនប្រាកដថានារីដែលប៉ាម៉ាក់នាំមកខ្ញុំពេញដែរទេ ហើយបើអត់មានចៅឲ្យប៉ាម៉ាក់ពរ កុំបន្ទោសខ្ញុំអី។ វិធីនេះរៀងចំណាយពេលយូរបន្តិចសម្រាប់ខ្ញុំ តែលទ្ធផលបានដូចបំណង»។

ហុងលី៖ «អឹមមមម! ខ្ញុំខំប្រឹងមានតែសម្របសម្រួលទាំងសងខាងឲ្យសង្សារធ្វើអ្វីខ្លះៗ ដើម្បីតម្រូវចិត្តពួកគាត់ ហើយឲ្យគាត់ចូលចិត្តសង្សារខ្ញុំវិញ និងជម្រាបឲ្យប៉ាម៉ាក់ បើកចិត្តមើលនាង ក្នុងផ្លូវវិជ្ជមាន។ ម្យ៉ាងទៀតបើសង្សារពិតជាចង់សាងគ្រួសារជាមួយយើងមែន គាត់ត្រូវសម្របខ្លួនតាមចាស់ទុំយើងបន្តិចហើយ។ និយាយខ្ញុំ និងសង្សារពិតជាពិបាកបន្តិចហើយ តែនៅព្យាយាមពុះពារ ហើយបើពួកគាត់នៅតែមិនព្រមប្រាប់ថា “ចឹងចាំពួកខ្ញុំបានកូនមួយ ចាំខ្ញុំនាំម៉ាក់របស់ចៅ ម៉ាក់មកនិយាយគ្នាម្ដងទៀត” នេះជាស្នៀតចុងក្រោយ ហើយបើមិនព្រមទៀតពង្រត់គ្នាទៅមែនទែនហ្មង»។

វុទ្ធី៖ «បញ្ហានេះកើតឡើងមកលើខ្ញុំផ្ទាល់តែម្ដង តែឥឡូវជម្នះរហូតបានកូនប្រុសមួយ ស្រីមួយហើយ។ ប៉ាម៉ាក់ខ្ញុំគាត់មិនចង់ឲ្យខ្ញុំ និងសង្សាររៀបការជាមួយគ្នា ព្រោះពួកខ្ញុំជាអ្នកធ្វើការទាំងពីរ ហើយគាត់ចង់បានកូនប្រសាអ្នករកស៊ី ហើយសង្សារខ្ញុំគាត់ក៏មិនចង់រកស៊ីទៀត។ តែខ្ញុំមានវិធីពិសេសមួយដោយប្រាប់អ្នកមានគុណទាំងពីរខ្ញុំថា “បើនៅតែបែបនេះទៀត ខ្ញុំមិនយកស្រីផ្សេងធ្វើប្រពន្ធ ក្រៅពីសង្សារខ្ញុំដែរ គឺនៅទំនេរចឹងហ្មង” គាត់ខ្លាចកូនអត់ប្រពន្ធអត់កូន ចឹងហើយមានតែព្រម ព្រោះកូនប្រុសតែមួយផង ហើយសំខាន់ជាប់ខ្សែចិនទៀត ចឹងពួកគាត់បារម្ភណាស់»។

បញ្ហា៖ «ខ្ញុំមិនហ៊ានធ្វើបាបចិត្តអ្នកមានគុណឡើយ ដូចនេះមានតែប្រាប់សង្សារឲ្យចាំបន្តិច បានចាំបានយើងនឹងបានរៀបការជាមួយគ្នា ព្រោះខ្ញុំនឹងខំប្រឹងរកលុយខ្លួនឯងឲ្យបានច្រើន។ កាលណាយើងមានសមត្ថភាពរកលុយបានរៀបចំចាត់ចែងជីវិតដោយខ្លួនឯង ពួកគាត់ទាំងពីរមិនហ៊ានបង្ខំយើងទេ ហើយខ្ញុំក៏ធ្វើបានសម្រេច។ តែអ្វីដែលចង់ផ្ដាំផ្ញើដល់បងប្អូនបុរសដទៃទៀតថា បើស្រលាញ់ស្មោះត្រូវតែពុះពារ ឧបសគ្គប៉ុណ្ណាក៏មិនអាចរារាំងយើងបានដែរ»៕

នេះគ្រាន់តែជាបទពិសោធន៍បុរសៗ ៥ នាក់ប៉ុណ្ណោះ!

អត្ថបទ៖ ទ្រី រ៉ាវី