ស្រីៗសារភាពស្នេហ៍ប្រាប់មុន ប្រុសៗគិតថាគេជាមនុស្សចិត្តងាយមែន?

2017-03-01 09:38:13
ចំនួនមតិ 0 | ចំនួនចែករំលែក 0

មនុស្សស្រីបើទោះជាចាប់អារម្មណ៍ និងស្រលាញ់មនុស្សប្រុសមុនក៏ដោយ តែនាងពិតជាអៀនខ្មាសមិនហ៊ាននិយាយឡើយ។ តែបើស្រីៗហ៊ានសារភាពស្នេហ៍ប្រាប់មុន ប្រុសៗគិតថាគេជាមនុស្សចិត្តងាយមែន?

ពិទូ៖ «បើមាននារីមកសារភាពថាស្រលាញ់ខ្ញុំមុនមែន មិនដឹងជាល្អប៉ុណ្ណាទេ មានតែពួកខ្ញុំទេអ្នកសារភាពស្រលាញ់គេមុន ហើយក៏មិនហ៊ានគិតថាគេចិត្តងាយអីដែរ ព្រោះសម័យនេះហើយ ស្រីៗក្លាហានសឹងអី»។

រិទ្ធី៖ «ហេហេហេហេ... មិនអាចនិយាយថាពួកគាត់ចិត្តងាយបានទេ គ្រាន់តែសារភាពស្រលាញ់សោះនឹង។ តែសម្រាប់ខ្ញុំរៀងភ្ញាក់ផ្អើលបន្តិច ព្រោះសង្គមយើងកម្រមានស្រីៗហ៊ាននិយាយបែបនេះមុនណាស់»។

រូបតំណាង

**ជីវ័ន្ត**៖ «មិនហ៊ានវាយតម្លៃគាត់ថាចិត្តងាយ ឬមិនងាយណាស់។ បើអ្នកមកសារភាពនោះ ជាមនុស្សស្រីដែលខ្ញុំលួចស្រលាញ់ដែរ ពិតជាសប្បាយចិត្តណាស់។ តែបើនៅសុខៗស្រាប់តែមានស្រីៗមិនដែលស្គាល់ផងមកនិយាយបែបនេះ ខ្ញុំក៏មិនហ៊ានឆ្លើយតបវិញភ្លាមៗដែរ សុំពេលមើលចិត្តសិន»។

ឆាយ៉ា៖ «បើគេស្រលាញ់ល្អហើយ កុំឲ្យតែគេស្អប់។ ចឹងហើយបើមានស្រីស្អាតមកសុំស្រលាញ់មែន ទទួលយកភ្លាម គ្មានទុកយូរទេ»។

ប៊ុនណាង៖ «សម័យនេះហើយលោកអើយ ស្រលាញ់ មិនស្រលាញ់គេប្រាប់ត្រង់គ្នាហើយ គ្មានអីត្រូវចិត្តងាយ ឬជារឿងអីចម្លែកផង»។

ពិភព៖ «ខ្ញុំធ្លាប់រៀននៅបរទេសធ្លាប់ជួបរឿងស្រីៗសុំស្រលាញ់មុននឹងច្រើន ហើយនៅអឺរ៉ុបវាគ្មានអីចម្លែកទេ ព្រោះផ្នត់គំនិតគេប្រុសធ្វើអ្វីបានស្រីក៏ធ្វើបានដែរ។ នៅខ្មែរខ្ញុំមិនដឹងម៉េចដែរទេ ហើយក្មេងៗដូចពួកយើងប្រហែលមិនគិតអីទេ តែចាស់ៗគាត់អាចនឹងគិតថាជាស្រីចិត្តងាយមែននឹង»៕