ទៅមើលខ្សែជីវិតដ៏អស្ចារ្យរបស់ ត្រចៀកកាំ តារាស្រីមានទ្រព្យច្រើនជាងគេនៅចិន

2017-02-24 02:21:00
ចំនួនមតិ 0 | ចំនួនចែករំលែក 0

មនុស្សមួយចំនួនលើពិភពលោកបានក្លាយជាបុគ្គលល្បីដោយសាររូបសម្រស់ ហើយខ្លះទៀតបានក្លាយជាបុគ្គលស្រស់ស្អាតដោយសារខួរក្បាល ការតាំងចិត្ត និងការតស៊ូរបស់ពួកគេ។ ជួបជាមួយ Vicki Zhao តារាសម្ដែងវ័យ៤០ឆ្នាំដែលបានឈរជើងលើអាជីពដ៏អស្ចារ្យនេះក្នុងនាមជាតារាសម្ដែងល្បីជាងគេនៅប្រទេសចិន អ្នកដឹកនាំភាពយន្ត តារាបង្ហាញម៉ូដ និងជាវិនិយោគិនដ៏ជោគជ័យ។

ចំពោះអ្នកគាំទ្រភាពយន្តនិងរឿងភាគរបស់នាង Vicki Zhao ឬ Zhao Wei ត្រូវបានចាត់ទុកជា "តារាជាតិសម័យទំនើបលំដាប់ទីមួយរបស់ចិន" ប៉ុន្តែក្នុងពិភពជំនួញ នាងត្រូវបានគេស្គាល់ថាជា "Buffett របស់ប្រទេសចិន" ដែល Buffett សំដៅលើមហាសេដ្ឋីអ្នកវិនិយោគផ្នែកសិល្បៈដ៏ជោគជ័យនៅអាមេរិក Warren Buffett។

នាងបានរៀបការជាមួយស្វាមី ជាអ្នកជំនួញឈ្មោះ Huang Youlong កាលពីឆ្នាំ២០០៨ នៅប្រទេសសិង្ហបុរី ដែលទ្រព្យសម្បត្តិរបស់ពួកគេទាំងពីរសរុបចូលគ្នាគឺប្រមាណជាង ១ពាន់លានដុល្លារ ដែលភាគច្រើនគឺជាភាគហ៊ុនក្នុងក្រុមហ៊ុន Alibaba Pictures ដែលជាការសហការរបស់ Zhao Wei ជាមួយមហាសេដ្ឋី Jack Ma ដែលជាមិត្តជិតស្និទ្ធ។

ការវិនិយោគផ្សេងៗទៀតរបស់ប្ដីប្រពន្ធមួយគូនេះមានដូចជា វិស័យអចលនទ្រព្យ រោងចក្រស្រាទំពាំងបាយជូរនៅបារាំង និងហាងលក់គ្រឿងអលង្ការនៅប្រទេសសិង្ហបុរី។ Zhao ក៏ជាតារាម៉ូដែលដ៏ជោគជ័យមួយរូបដែរ ដោយនាងបានផ្សព្វផ្សាយឲ្យផលិតផលល្បីៗលើពិភពលោកជាង ១២០យីហោ។

Zhao និង Huang មានកូនស្រីម្នាក់ឈ្មោះ April, ដែលបានកើតក្នុងខែមេសា ឆ្នាំ២០១០

កើតក្នុងខេត្តអានហ៊ុយ ប្រទេសចិន Zhao គឺជាគ្រូមត្តេយ្យមួយរូបនៅអាយុ ១៧ឆ្នាំ ដែលពេលនោះអ្នកដឹកនាំភាពយន្តមួយរូបបានចូលមកក្នុងភូមិរបស់នាងដើម្បីស្វែងរកតារាបន្ថែម។ ដំបូងឡើយ Zhao មានចំណាប់អារម្មណ៍លើការសម្ដែង ប៉ុន្តែក៏មិនជឿជាក់ថាខ្លួនឯងមានសម្រស់ស្រស់ស្អាតគ្រប់គ្រាន់នឹងអាចក្លាយជាតារាសម្ដែងមួយរូបបាន។ “ខ្ញុំគិតថាតារាសម្ដែងស្រីត្រូវតែមានសម្រស់ស្អាត ចំណែកខ្លួនខ្ញុំគ្រាន់តែមានមុខមាត់សាមញ្ញៗ"។

នាងបានចាប់ផ្ដើមអាជីពសម្ដែងជាតួរាយរងម្នាក់ ហើយបន្ទាប់ពីលាឈប់ពីការងារ នាងក៏បានផ្លាស់មករស់នៅទីក្រុងសៀងហៃ ដើម្បីសិក្សានៅសាលាភាពយន្ត។ មុនអាយុ ២០ឆ្នាំ នាងបានទទួលពិន្ទុយ៉ាងខ្ពស់សម្រាប់ការប្រឡងចូលរៀននៅសាលាបណ្ឌិតសភាភាពយន្តទីក្រុងប៉េកាំង (Beijing Film Academy) ដ៏ល្បីល្បាញ រហូតបញ្ចប់ថ្នាក់បរិញ្ញាបត្រជាន់ខ្ពស់ផ្នែកដឹកនាំភាពយន្ត។

ភាពជោគជ័យខ្លាំងរបស់នាងបានចាប់ផ្ដើមក្នុងអំឡុងទសវត្សឆ្នាំ១៩៩០ តាមរយៈភាពយន្តភាគរឿង “ព្រះនាងយេយេ” ដែលនាងសម្ដែងជាមួយ Fan Bingbing និងបានក្លាយជាតារាសម្ដែងស្រីវ័យក្មេងបំផុតដែលបានឈ្នះពាន Golden Eagle ដែលស្មើនឹងកម្មវិធី Emmy Award របស់ហូលីវូដ សម្រាប់ប្រទេសចិន។

Zhao ដែលជាពុទ្ធសាសនិកមួយរូប គឺជាអ្នកហូបបួសមួយរូបដែរ និងជឿថាគន្លឹះសំខាន់ក្នុងការរក្សាសម្រស់គឺការរស់នៅដោយថែទាំសុខភាពរាងកាយពីខាងក្នុងមក។

ខណៈដែលនាងចេញសម្ដែងក្នុងភាពយន្តល្បីៗជាច្រើន Zhao Wei ក៏បានចេញអាល់ប៊ុមចម្រៀងចំនួន ៧ មុនឆ្នាំ២០០៩ និងធ្លាប់បានជាប់ចំណាត់ថ្នាក់កំពូលលើតារាងចម្រៀងចិនទៀតផង។

Zhao បានចាប់ផ្ដើមដឹកនាំរឿងដំបូងក្នុងឆ្នាំ២០១៣ តាមរយៈភាពយន្តមនោសញ្ចេតនា “So Young” ដែលទទួលបានជោគជ័យយ៉ាងខ្លាំងលើតារាង Box Office ចិន និងក្លាយជាភាពយន្តរកចំណូលបានច្រើនជាងគេលំដាប់ទី៥របស់ចិននាពេលនោះ។

ក្រៅពីភាពជោគជ័យខ្លាំងក្នុងអាជីព Zhao ក៏បានចូលរួមក្នុងការងារមនុស្សធម៌ជាច្រើនដែរ ជាមួយអង្គការនានារួមមាន គម្រោងក្ដីសង្ឃឹមរបស់មូលនិធិយុវជនចិន មូលនិធិសម្រាប់កុមាររបស់អង្គការសហប្រជាជាតិ និងកាកបាទក្រហមប្រទេសចិន ៕