កន្លែងដែលអូនប្រាថ្នានៅថ្ងៃនេះ!

2017-02-14 04:15:56
ចំនួនមតិ 0 | ចំនួនចែករំលែក 0

វេលាថ្មើណេះប្រុសៗខ្លះប្រហែលជាកំពុងមមាញឹករើសផ្កា ឬកាដូនានាជូនមិត្តស្រី ដើម្បីបង្ហាញនូវក្ដីស្រលាញ់របស់ខ្លួនហើយ។ រើសកាដូ មិនពិបាកដូចរើសកន្លែងណាត់ជួបទេ ស្រីៗខ្លះប្រហែលជាកំពុងខ្វល់ចិត្តណាស់មែនទេ? បើមានណាត់ជាមួយមនុស្សពិសេស គួរទៅកន្លែងណារ៉ូមែនទិក ហើយមិនខុសភ្នែកញាតិ?

បើចង់ដឹង តោះមកស្ដាប់ស្រីៗយើងប្រាប់កន្លែងដែលគាត់ប្រាថ្នាចង់ទៅក្នុងថ្ងៃ១៤ កុម្ភៈ នេះ!

នីតា ៖ (ហាស្ដីទាំងរីករាយ) ថ្ងៃនេះកន្លែងណាក៏ដូចកន្លែងណាប្រាកដជាមានមនុស្សច្រើនហើយ សម្រាប់ខ្ញុំអត់ចូលចិត្តភាពអ៊ូអរទេ ចង់ទៅទីស្ងប់ស្ងាត់ ដូចជា Sky bar ញ៉ាំអាហារពេលល្ងាច សាងសងគ្នាបែបរ៉ូមែនទិច។

លីដា ៖ (បន្ទរថាមែនហើយៗ) ខ្ញុំក៏ចូលចិត្តបរិយាកាសបែបហ្នឹងដែរ...!

លីលី ៖ (និយាយទាំងសើច) ម្នាក់ៗ និយាយមកស្វីតៗដល់ហើយ ឱកាសល្អបែបនេះគួរទៅ shopping ដើរទិញរបស់របរឲ្យណាណីម្ដង ដើម្បីបង្ហាញគេគ្រប់គ្នាថាសង្សារយើងស្រលាញ់យើងខ្លាំង។

ដារីយ៉ា ៖ (បន្ទរ) និយាយដូចដឹងចិត្តមេស តែបើបានដើរលេងក្រៅប្រទេសទៀតកាន់តែល្អ... ហហាហាហ(សើច)

សិលា ៖ (និយាយកាត់) និយាយមកដូចស្រួលណាស់... បើសង្សារយើងមានលុយវាមិនអីទេ ចុះប៉ះចំគ្នាអ្នកអត់វិញគិតម៉េច? សម្រាប់ខ្ញុំ រោងកុនជាកន្លែងស័ក្តិសមបំផុតហើយ ព្រោះអាចនៅក្បែរគ្នា កើយលើស្មាមនុស្សដែលយើងស្រលាញ់យ៉ាងកក់ក្ដៅ និងចំណាយមិនច្រើនទៀត។

ណាតា ៖ (បន្ត) តាមយោបល់គ្នាគួរទៅ ហាងញ៉ាំអីជាមួយគ្នាវិញល្អជាង...។

ពិសី ៖ ណាតានិយាយត្រូវ តែវាដូចសាមញ្ញពេកហើយ

ដានី៖ (ផ្ទាន់) ម្នាក់ៗ និយាយតែពីសង្សារ ចុះមិនគិតថាចង់ចំណាយពេលឲ្យគ្រួសារខ្លះ ទេអី? បើពិបាកគិតពេក ហើយចង់ដឹងថាសង្សារស្រលាញ់យើងខ្លាំងប៉ុណ្ណា ទាំងអស់គ្នាសាកបបួលសង្សារមកញ៉ាំអាហារពេលល្ងាចជុំគ្នានិងអ្នកផ្ទះយើងហ្មងទៅ ព្រួញមួយបាញ់បានសត្វពីរ ហើយគ្មានអ្នកណានិយាយដើមផង៕

អត្ថបទៈ តាំង ដាលីន