កាដូត្រូវប៉ាន់ថ្ងៃបុណ្យនៃក្តីស្រលាញ់

2017-02-09 09:03:58
ចំនួនមតិ 0 | ចំនួនចែករំលែក 0

បុណ្យនៃក្ដីស្រលាញ់កៀកនឹងមកដល់ក្នុងពេលឆាប់ៗនេះ ចុះមានដឹងអត់ថាកាដូអ្វីដែលពេញនិយមជាងគេក្នុងឆ្នាំនេះ?

តាមសម្ដីរបស់បុគ្គលិកលក់វត្ថុអនុស្សាវរីយ៍នៅហាង Pink House ក្បែរសាលាបាក់ទូកបានប្រាប់កញ្ញាថា៖ ឆ្នាំនេះមិនខុសពីឆ្នាំមុនៗទេ មានសូកូឡាប្រអប់ ជាពិសេសគឺតុក្កតាដែលជាគោលដៅរបស់យុវវ័យយើង ជាពិសេសប្រុសៗ គ្រាន់តែពួកគាត់រើសម៉ូដខុសៗគ្នាតែប៉ុណ្ណោះ ។

រឺឯអ្នកនាងពិសីម្ចាស់ តូបលក់សៀវភៅនិងវត្ថុអនុស្សាវរីយ៍ នៅក្រោយសាលាសន្ធម៉ុកវិញបានលើកឡើងថា ៖ «តូបបងលក់ដាច់ភាគច្រើនស៊ុមរូបថត នាឡិកា កែវថ្ម ឬក៏តុក្កតា តូចៗល្មម បើអាធំ លក់មិនសូវចេញទេព្រោះវាថ្លៃតិច អញ្ចឹងគ្នាជាសិស្សសាលា ទិញតាអាល្មមៗហ្នឹង»។

ចំណែកកញ្ញា ណៃហៀក ជាអ្នកលក់ផ្កានិយាយថា៖ ឆ្នាំមុន លក់ដាច់ណាស់ផ្កាកុលាប រកអ្នកខ្ចប់មិនទាន់ តែឆ្នាំនេះមិនហ៊ាននិយាយដែរ ព្រោះអ្នកលក់ច្រើនទៅៗ តែក៏មានអ្នកមកកក់ផ្កាជាបន្តបន្ទាប់ច្រើនគួរសមដែរ។

ធីតា ៖ សម្រាប់ខ្ញុំចង់ឲ្យមិត្តប្រុសទិញបាច់ផ្កា(កុលាបក្រហម) វាអាចតំណាងឲ្យក្ដីស្រលាញ់យ៉ាងមុះមុត ព្រោះវត្ថុអនុស្សាវរីយ៍ ឬក៏តុក្កតាអីអស់ហ្នឹងអាចឲ្យថ្ងៃផ្សេងក៏បាន ដូចជាខួបកំណើត បុណ្យសិទ្ធិនារី ឬក៏បុណ្យណូអែលជាដើម។

បើអ្នកស្រី វី អ្នកលក់មីឆាក្បែរផ្សារដើមគរ ប្រាប់ថា៖ ខ្ញុំអត់ស្គាល់ទេបុណ្យអីអស់ហ្នឹងហើយក៏មិនចង់បានអីពីប្ដីដែរ សុំត្រឹមមកញាំបាយល្ងាចនៅផ្ទះឲ្យបានញឹកញប់ជាងនេះ ហើយចង់ឲ្យកូនៗឧស្សាហ៍មកលេងម៉ែផង។ នេះជាកាដូដែលអ្នកស្រី ចង់បានពីស្វាមីនិងកូនគាត់។

ចុះប្រិយមិត្តកញ្ញាចង់បានកាដូអីដែរថ្ងៃនោះ?

អត្ថបទៈ តាំង ដាលីន