ពេលប្ដីមានស្រី ក្នុងនាមយើងជាប្រពន្ធគួរធ្វើបែបណាខ្លះទើបអូសទាញបានមកវិញ?

2017-02-01 03:59:10
ចំនួនមតិ 0 | ចំនួនចែករំលែក 0

ពាក្យចាស់ពោលថា "ទុក្ខអ្វីមិនស្មើទុក្ខប្ដីមានស្រី” ពិតជាមិនខុសមែន។ តោះមកមើលការរៀបរាប់របស់ស្ត្រីៗដែលធ្លាប់ឆ្លងកាត់រឿងនេះ និងវិធីទាញស្វាមីមកវិញ៖

អ្នកស្រី ស្រីមុំ អាយុ ៣៤ ឆ្នាំមុខរបរត្រឹមអ្នកលក់ដូរបន្តិចបន្តួចនៅផ្ទះ ហើយស្វាមីអ្នកស្រីមានតំណែងជា GM ក្នុងក្រុមហ៊ុនល្បីឈ្មោះមួយបានឲ្យដឹងថា"ពេលប្ដីមានស្រី បងស្ទើរតែឆ្កួតហើយ ប្ដីធ្លាប់ដេកឱបជាប់ទ្រូង បែរជាស្រីផ្សេងដណ្ដើមយកទៅឱបវិញតើស្រីណាអាចធ្វើចិត្តបាន។ តែបងមានវិធីទាញប្ដីមកវិញបាន ដំបូងយើងត្រូវតាំងស្មារតីឲ្យរឹងមាំសិន មិនបាច់ទៅវ៉ៃ ទៅជេរគេទេ ហៅតែប្ដីយើងមកនិយាយទល់មុខគ្នាជាកំហិត រំលឹកគ្រាផ្អែមល្ហែម និងធ្វើឲ្យឃើញថាស្រីដែលគាត់កំពុងទាក់ទងនោះចង់បានតែប្រាក់ប៉ុណ្ណោះ។ ហើយវិធីមួយទៀតគឺ ប្រាប់ម្ដាយឪពុកក្មេកបង ឲ្យពួកគាត់និយាយជាមួយកូនគាត់។ ព្រោះយើងជាកូនប្រសាស្រីពេញមុខមាត់ ដូចនេះគាត់ប្រាកដជាជ្រើសរើសយើង”។

ចំណែកអ្នកស្រី គន្ធា ដែលមានស្វាមីជាបុគ្គលិកធនាគារប្រាក់ខែជាង ២ ពាន់ដុល្លារបានបង្ហើបតិចនិកខ្លះៗថា "ស្រីដែលចាំតែទាក់ប្ដីគេ ចង់បានតែលុយប៉ុណ្ណោះ។ ចឹងពេលប្ដីបងមានស្រី បងប្រាប់ប្ដីឲ្យទៅសាកចិត្តស្រីម្នាក់នោះសិន បើគេស្រលាញ់ស្មោះចាំឲ្យគាត់មកលែងលះ ហើយឲ្យគាត់ប្រាប់គេថាគាត់មានតែខ្លួនទេ លុយ,ឡាន,ផ្ទះ,ដី អីប្រគល់ឲ្យប្រពន្ធកូនអស់។ ចាំមើលស្រីនោះទទួលគាត់ទៀតអត់។ គាត់ធ្វើតាមសម្ដីបងប្រាប់មែន ហើយលទ្ធផលគឺគេមិនទទួលគាត់ ដូចនេះទើបគាត់ភ្ញាក់ខ្លួន។ តាំងពីពេលនោះមកឈប់មើលស្រីផ្សេង”។

ខុសពីវិធីអ្នកស្រី ស្រីមុំ និង គន្ធា អ្នកនាង ធានី ដែលទើបរៀបការបាន ៣ ឆ្នាំ តែជួបប្រទះរឿងស្វាមីមានស្រីបានចែករំលែកវិធីប្លែកដោយប្រាប់ស្វាមីថា "បើបងមានស្រីក្រៅផ្ទះបាន ខ្ញុំក៏ទៅរកប្រុសនៅក្រៅផ្ទះដែរ ហើយបើបងយកលុយឲ្យស្រី ខ្ញុំក៏យកលុយឲ្យប្រុសដែរ។ បើបងចង់លែង Ok ស្វាគមន៍ជានិច្ច។ ខ្ញុំនិយាយតែប៉ុណ្ណឹងគឺចប់ឈប់និយាយ ហើយគាត់ក៏លែងរវីរវល់នឹងស្រីៗផ្សេងទៀតដែរទៅ។ តែជាចុងក្រោយសូមផ្ដាំផ្ញើទៅបងៗ ឬប្អូនៗសុភាពស្ត្រីទាំងឡាយថាទោះមានប្ដី កូន ហើយក៏ដោយកុំបណ្ដោយខ្លួនឲ្យរយីករយាកអី ព្រោះលោកប្ដីកំហូចនឹងយកលេសនេះទៅមានស្រីក្រៅបាន។ តែបើយើងនៅតែស្អាត ហើយមានការងារ មានចំណូលប្រចាំថ្ងៃគេមិនហ៊ានខ្លាំងជាមួយយើងទេ។”

ស្ត្រីវ័យកណ្ដាល សុខ វណ្ណី បានចែករំលែកបទពិសោធន៍មួយទាក់ទងនឹងគ្រួសារចង់បែកចានបែកឆ្នាំងនេះថា"ដំបូងយើងធ្វើជាមិនដឹងមិនឮសិន ក្រោយមកមិនចាំបាច់និយាយអ្វីទាំងអស់ជាមួយប្ដី មិនបាច់គេងជាមួយគ្នា ឲ្យគេទៅណាក៏ទៅៗ។ ដល់ពេលគេទ្រាំមិនបានឲ្យគេមកនិយាយជាមួយយើងមុន ចាំយើងចាប់ផ្ដើមសួរថាចង់លែងគ្នា ឬយ៉ាងម៉េចប្រាប់មក។ តែមិនត្រូវប្រគល់កូនឲ្យគេឡើយ។ បើគេទៅមែន ឲ្យគេទៅចុះ តែមុនគេទៅប្រាប់ថាយើងនៅចាំគេនៅទីនេះ។ ចុងក្រោយគ្រួសារមីងក៏បានវិលមកមែន ព្រោះស្រី និងប្រពន្ធខុសគ្នា”៕

អ្នកប្រិយមិត្តណាទៀតធ្លាប់មានរឿងនេះ ជួយប្រាប់វិធីផ្សេងផង!

អត្ថបទ៖ ទ្រី រ៉ាវី