តើយំបង្ហាញពីសញ្ញាអ្វីខ្លះ?

2024-03-29 12:54:31
ចំនួនមតិ 0 | ចំនួនចែករំលែក 0

យំ គឺជាបាតុភូតធម្មជាតិមួយកើតឡើងដើម្បីឆ្លើយតបទៅនឹងអារម្មណ៍របស់យើងមានទាំងទុក្ខព្រួយ សោកសៅ និងរំភើបរីករាយជាដើម។ អ្នកចិត្តសាស្រ្តបច្ចុប្បន្នយល់ឃើញថាការយំ គឺជាយន្តការមួយនៃការជួយឲ្យយើងកាត់បន្ថយស្រ្តេស និងអារម្មណ៍ឈឺចាប់។ ក្រៅពីនេះការយំក៏បង្ហាញឲ្យឃើញពីភាពជិតស្និទ្ធ ក្ដីអាណិតស្រឡាញ់ និងការគាំទ្រផងដែរ។

ហូរទឹកភ្នែកមានន័យថាយំ?

ការហូរទឹកភ្នែកមិនមែនមានន័យថាសុទ្ធតែយំនោះទេ។ ការហូរទឹកភ្នែកដែលកើតឡើងដោយឯកឯង គឺកើតឡើងនៅពេលមានធូលី ឬផ្សេងចូលភ្នែក ឬដើម្បីការពារកុំឲ្យភ្នែកស្ងួត កុំឲ្យមានការឆ្លងរោគជាដើម ហើយប្រហែលជា៩៨ភាគរយនៃទឹកភ្នែកនេះ គឺទឹក។ ចំណែកការហូតទឹកភ្នែកមួយបែបទៀត គឺដោយសារតែការរំជួលចិត្ត ឬយំព្រោះហេតុការណ៍អ្វីមួយ ដែលការយំនេះជួយបណ្ដេញអ័រម៉ូនស្រ្តេស និងសារធាតុពុលមួយចំនួនចេញពីរាងកាយ។ ការសិក្សារកឃើញថាពេលយំ រាងកាយយើងនឹងបញ្ចេញអ័រម៉ូនអុកស៊ីតូស៊ីន និងអ័រម៉ូនអង់ដូហ្វីន ជួយសម្រួលការឈឺចាប់ទាំងលើរាងកាយ និងផ្លូវចិត្ត។

តើការយំបង្កជាក្ដីបារម្ភដែរទេ?

ពេលខ្លះការយំមិនមែនជាសញ្ញាល្អនោះទេ ជាពិសេសបើការយំកើតឡើងញឹកញាប់ ឬក៏យំដោយមិនមានហេតុផលច្បាស់លាស់ ឬការយំរំខានដល់ការរស់នៅប្រចាំថ្ងៃដែលមិនអាចគ្រប់គ្រងបាន។ ផ្ទុយមកវិញក៏មានដែរ អ្នកខ្លះដែលមានបញ្ហាបាក់ទឹកចិត្តធ្ងន់ធ្ងរ គឺយំមិនចេញនោះទេ បើទោះបីជាអ្នកទាំងនោះមានអារម្មណ៍ចង់យំក៏ដោយ។ បើសិនជាមានករណីទាំងនេះ ជាការល្អគួរស្វែងរកការប្រឹក្សាជាមួយគ្រូពេទ្យ ដើម្បីបានធ្វើរោគវិនិច្ឆ័យត្រឹមត្រូវ និងព្យាបាលបានទាន់ពេលវេលា។

ដូចនេះ បើសិនជាយើងជួបរឿងលំបាកណាមួយ ធ្វើឲ្យយើងកើតទុក្ខ ពិបាកចិត្ត គឺមិនមានអ្វីគួរឲ្យខ្មាសអៀនក្នុងការយំនោះទេ។ មនុស្សជាច្រើនតែងតែយំនៅពេលជួបបញ្ហាសោកសៅ បាក់ទឹកចិត្ត ហើយការយំនេះជាសញ្ញាមួយបញ្ជាក់ថាអ្នកទាំងនោះកំពុងតែវិលទៅរកសភាពល្អប្រសើរឡើងវិញ។ ពេលខ្លះមនុស្សប្រុស ឬក្មេងប្រុស ច្រើនយល់ថាការយំ គឺបង្ហាញពីភាពទន់ខ្សោយ ប៉ុន្តែការយំបែរជាជួយពួកគេឲ្យកាត់បន្ថយឥរិយាបថអវិជ្ជមាន និងជួយឲ្យជីវិតពួកកាន់តែពេញលេញ។

ប្រភព៖ healthline ប្រែសម្រួល៖ សុខា