គេងបើកកង្ហារពេលយប់មានគុណវិបត្តិដែរទេ?

2024-03-15 00:54:00
ចំនួនមតិ 0 | ចំនួនចែករំលែក 0

ការបើកកង្ហារសម្រាប់គេងពេលយប់ជួយឲ្យយើងមានអារម្មណ៍ត្រជាក់ និងស្រួលគេង។ ប៉ុន្តែទន្ទឹមនឹងមានផលល្អទាំងនេះ តើកង្ហារមានផលអវិជ្ជមានខ្លះដែរទេ? តស់ស្វែងយល់ទាំងអស់គ្នាមើលថាយ៉ាងម៉េចខ្លះ?

តឹងច្រមុះ

ការគេងបើកកង្ហារនៅពេលយប់ក្រៅពីធ្វើឲ្យយើងត្រជាក់ គេងបានលក់ស្រួល ក៏មានគ្នាយើងមួយចំនួនជួបផលរំខានពីកង្ហារដែរ។ ខ្យល់ចេញពីកង្ហារអាចធ្វើឲ្យយើងស្ងួតមាត់ ច្រមុះ និងបំពង់ក ដែលអាចនាំឲ្យមានការកើនឡើងនៃស្លេស្ម។ ក្រៅពីនេះក៏អាចបណ្ដាលឲ្យយើងឈឺក្បាល តឹងច្រមុះ ឈឺក ឬអាចស្រមុកថែមទៀតផង។ ដើម្បីបង្ការបញ្ហាតឹងច្រមុះ ដោយសារកង្ហារយើងអាចញ៉ាំទឹកបន្ថែម និងអាចប្រើម៉ាស៊ីនផ្ដល់សំណើមក្នុងបន្ទប់ ស្របពេលដែលយើងបើកកង្ហារ។

អាលែកហ្ស៊ី

កង្ហារអាចបក់ធូលី ឬលម្អងផ្កាឲ្យវិលចុះឡើងក្នុងបរិយាកាសបន្ទប់ ដែលការណ៍នេះអាចធ្វើឲ្យគ្នាយើងមួយចំនួនមានប្រតិកម្មអាលែកហ្ស៊ីបាន ពិសេសធូលីដែលតោងជាប់នឹងស្លាបកង្ហារ។ បើសិនជាយើងដកដង្ហើមស្រូបយកធូលីទាំងនោះចូល យើងអាចនឹងមានបញ្ហាហៀរសំបោរ រមាស់បំពង់ក ហៀរទឹកភ្នែក និងពិបាកដកដង្ហើមជាដើម។

ស្ងួតភ្នែក និងស្បែក

ខ្យល់ចេញពីកង្ហារអាចធ្វើឲ្យស្បែក និងភ្នែករបស់យើងស្ងួតដែរ។ ប្រើគ្រីមផ្ដល់សំណើមដល់ស្បែក និងប្រើថ្នាំបន្តក់ភ្នែកទំនងជាអាចជួយកាត់បន្ថយបញ្ហាស្ងួតស្បែក និងភ្នែកបាន។ យ៉ាងណា ចំពោះការប្រើប្រាស់ថ្នាំបន្តក់ភ្នែកណាមួយគួរប្រឹក្សាជាមួយឱសថការី ឬគ្រូពេទ្យឲ្យបានត្រឹមត្រូវជាមុន។

ឈឺសាច់ដុំ

ពេលត្រូវកង្ហារយូរអាចធ្វើឲ្យសាច់ដុំតឹង ឬឈឺចាប់បានដែរ។ ក្នុងន័យនេះ កង្ហារអាចរំខានដំណេករបស់យើងបាន ដោយសារតែយើងអាចភ្ញាក់ដោយសារតែឈឺសាច់ដុំ។ ការពារបញ្ហានេះ យើងអាចបង្វែរមុខកង្ហារកុំឲ្យចំខ្លួនយើងពេក។

ប្រភព៖ healthline ប្រែសម្រួល៖ សុខា