អ្វីជាខ្លាញ់មិនល្អក្នុងរាងកាយ?

2024-03-07 14:21:00
ចំនួនមតិ 0 | ចំនួនចែករំលែក 0

ខ្លាញ់មិនល្អក្នុងរាងកាយច្រើនអាចនាំឲ្យមានហានិភ័យខ្ពស់ក្នុងការកើតជំងឺបេះដូង និងគ្រោះថ្នាក់សរសៃឈាមខួរក្បាល។ បើអីចឹង តើខ្លាញ់មិនល្អគឺជាអ្វី កើតឡើងបានដោយរបៀបណា?

អ្វីជាខ្លាញ់មិនល្អ?

ខ្លាញ់មិនល្អ ឬLDL ជាប្រភេទខ្លាញ់ម្យ៉ាងមាននៅក្នុងឈាមរបស់យើង។ ខ្លាញ់ប្រភេទផ្ទុកទៅដោយកូលេស្តេរ៉ូលភាគច្រើន និងមានមួយភាគតូចជាប្រូតេអ៊ីន ហើយបើខ្លាញ់ប្រភេទនេះមានកាត់តែច្រើន នឹងធ្វើឲ្យមានហានិភ័យខ្ពស់ដែរក្នុងការកើតជំងឺបេះដូង ឬគ្រោះថ្នាក់សរសៃឈាមខួរក្បាល។

ពេលខ្លះគេហៅខ្លាញ់អាក្រក់ និងកូលេស្តេរ៉ូលអាក្រក់ក្នុងន័យដូចគ្នា ប៉ុន្តែថាបើកម្រិតកូលេស្តេរ៉ូលប្រភេទនេះនៅទាបមិនមានអ្វីអាក្រក់ចំពោះសុខភាពនោះទេ ហើយវាថែមទាំងបានដើរតួសំខាន់ក្នុងការជួយដល់ដំណើរការរាងកាយទៀតផង។ ប៉ុន្តែវានឹងក្លាយជាបញ្ហានៅពេលខ្លាញ់ ឬកូលេស្តេរ៉ូល LDL នេះកើនឡើងច្រើនពេក។

ហេតុអ្វីគេហៅថាកូលេស្តេរ៉ូលអាក្រក់?

ដោយសារតែកម្រិតកូលេស្តេរ៉ូលកើនឡើងខ្ពស់អាចនាំឲ្យមានដុំកំណកនៅក្នុងសរសៃឈាម ហើយអាចបង្កឲ្យមានជំងឺបេះដូង ទើបគេហៅវាថាជាខ្លាញ់អាក្រក់ ឬកូលេស្តេរ៉ូលអាក្រក់។ ហេតុនេះហើយបានជាគ្រូពេទ្យតែងណែនាំឲ្យយើងញ៉ាំអាហារល្អចំពោះសុខភាព និងហាត់ប្រាណជាប្រចាំដើម្បីរក្សាកម្រិតកូលេស្តេរ៉ូល LDL ឲ្យនៅកម្រិតល្អចំពោះសុខភាព។

មូលហេតុនាំឲ្យឡើងកូលេស្តេរ៉ូល ឬខ្លាញ់មិនល្អ

របបអាហារ៖ អាហារដូចជាសាច់មានខ្លាញ់ និងអាហារប្រភេទ Fast Food អាចធ្វើឲ្យយើងឡើងកូលេស្តេរ៉ូល ព្រោះថាអាហារទាំងនេះមានផ្ទុកបរិមាណខ្លាញ់ឆ្អែតច្រើន និងពេលខ្លះមានខ្លាញ់ចម្រាញ់ទៀត។ ខ្លាញ់ទាំងពីប្រភេទនេះ នាំឲ្យមានការកើនឡើងកូលេស្តេរ៉ូលមិនល្អ។

វ័យ៖ កត្តាវ័យក៏ដូចគ្នា នៅពេលយើងមានវ័យកាន់តែច្រើន ជាទូទៅនឹងឡើងកម្រិតកូលេស្តេរ៉ូលដូចគ្នា។

ជក់បារី៖ សារធាតុគីមីក្នុងថ្នាំជក់នឹងធ្វើឲ្យចំនួនកូលេស្តេរ៉ូលល្អ ឬ HDL ធ្លាក់ចុះ ខណៈកូលេស្តេរ៉ូលល្អ មាននាទីជួយគ្រប់គ្រងលើកូលេស្តេរ៉ូលអាក្រក់។ ដូចនេះ បើបារីអាចបំផ្លាញកូលេស្តេរ៉ូលល្អ នោះនឹងធ្វើឲ្យកូលេស្តេរ៉ូលអាក្រក់ក្នុងរាងកាយកើនឡើង។

ប្រភព៖ Cleveland Clinic ប្រែសម្រួល៖ សុខា