អ្វីជាជំងឺបម្រុងទឹកនោមផ្អែម?

2024-02-10 00:46:00
ចំនួនមតិ 0 | ចំនួនចែករំលែក 0

បើសិនជាគ្រូពេទ្យពិនិត្យឃើញថាយើងមានជំងឺបម្រុងទឹកនោមផ្អែម នោះមានន័យថាកម្រិតជាតិស្ករក្នុងឈាមរបស់យើងគឺខ្ពស់ជាងធម្មតា តែមិនទាន់ខ្ពស់ដែលត្រូវចាត់ចូលជាជំងឺទឹកនោមផ្អែម។

ជំងឺបម្រុងទឹកនោមផ្អែមអាចនាំឲ្យយើងជួបបញ្ហាសុខភាពផ្សេងទៀតដែរដូចជំងឺបេះដូង និងបញ្ហាគ្រោះថ្នាក់សរសៃឈាមខួរក្បាល បើយើងថែទាំសុខភាពមិនបានល្អ។ តើយើងគួរធ្វើម៉េចបើមានជំងឺបម្រុងទឹកនោមផ្អែម?

អ្វីជាដើមចមនាំឲ្យមានជំងឺបម្រុងទឹកនោមផ្អែម?

លំពែងរបស់យើងបញ្ចេញអ័រម៉ូនម្យ៉ាងហៅថាអាំងស៊ុយលីនពេលយើងញ៉ាំអាហារ ដោយនាំយកជាតិស្ករពីឈាមចូលទៅក្នុងកោសិកានៃរាងកាយ និងត្រៀមទុកសម្រាប់ជាប្រភពថាមពលផង។ ដំណើរការនេះហើយ ដែលអាំងស៊ុលីនជួយបញ្ចុះកម្រិតជាតិស្ករក្នុងឈាមរបស់យើង។

មូលហេតុបង្កឲ្យមានជំងឺបម្រុងទឹកនោមផ្អែម និងជំងឺទឹកនោមផ្អែម គឺប្រហាក់ប្រហែលគ្នា បើទោះបីជាជំងឺបម្រុងទឹកនោមផ្អែមគឺជាដំណាក់កាលដំបូងនៃជំងឺទឹកនោមផ្អែម។ ការណ៍ដែលប្រហាក់ប្រហែលគ្នានោះគឺ ភាពសាំអាំងស៊ុយលីន ដែលវាកើតឡើងនៅពេលដែលរាងកាយឆ្លើយតបមិនបានត្រឹមត្រូវទៅនឹងអាំងស៊ុយលីន។ មួយទៀត គឺការរំខានដល់ការធ្វើមេតាប៉ូលិស។ ការកើនឡើងនៃការរំខាននេះនឹងធ្វើឲ្យកម្រិតជាតិស្ករក្នុងឈាមកើនឡើង និងធ្វើឲ្យមានភាពសាំអាំងស៊ុយលីនដែរ។

កម្រិតជាតិស្ករក្នុងឈាមសម្រាប់អ្នកសុខភាពធម្មតាពេលមិនទាន់ញ៉ាំអី គឺខ្ពស់បំផុតត្រឹម៩៩មិល្លីក្រាម/ដេស៊ីលីត្រឈាម (99mg/dL)។ ចំណែកអ្នកមានជំងឺបម្រុងទឹកនោមផ្អែមមានកម្រិតជាតិស្ករក្នុងឈាមពេលមិនទាន់ញ៉ាំអាហារចន្លោះពី១០០ទៅ១២៥មិល្លីក្រាម/ដេស៊ីលីត្រឈាម (100-125mg/dL) ហើយបើលើសពីនេះ គឺយើងមានជំងឺទឹកនោមផ្អែមយើង។

តើគួរការពារខ្លួនបែបណាបើរកឃើញថាមានជំងឺបម្រុងទឹកនោមផ្អែម?

ស្ថាប័ន CDC អាមេរិកបានលើកឡើងថាបើសិនជាយើងអាចស្រកទម្ងន់បាន៥ភាគរយនៃទម្ងន់ខ្លួនដែលយើងមានបច្ចុប្បន្នដែលកំពុងលើសទម្ងន់នោះ គឺយើងពិតជាអាចកាត់បន្ថយហានិភ័យវិវត្តខ្លួនទៅជាមានជំងឺទឹកនោមផ្អែម។ ជាមួយគ្នាដែរ ការជក់បារី និងការមានស្រ្តេសខ្លាំងជាប្រចាំ ក៏អាចរួមចំណែកឲ្យយើងវិវត្តទៅរកជំងឺទឹកនោមផ្អែមប្រភេទ២ដែរ។ ការកែប្រែបែបបទរស់នៅមួយចំនួនជួយការពារយើងពីការកើតជំងឺទឹកនោមផ្អែម។

អ្វីដែលយើងគួរធ្វើគឺញ៉ាំអាហារសម្បូរដោយបន្លែ ផ្លែឈើ ដែលជាប្រភពនៃជាតិសរសៃ កម្រិតការញ៉ាំអាហារមានជាតិផ្អែម ឬភេសជ្ជៈមានជាតិផ្អែម ព្រមទាំងឈប់ជក់បារី បើយើងជាអ្នកជក់បារី។ ក្រៅពីនេះ ការហាត់ប្រាណបានត្រឹម៣០នាទីក្នុងមួយថ្ងៃ ក៏រួមចំណែកកាត់បន្ថយហានិភ័យកើតជំងឺទឹកនោមផ្អែមនេះដែរ។

ប្រភព៖ healthline ប្រែសម្រួល៖ សុខា