ម៉ាក់ៗ ជាច្រើន ច្បាស់ជាជួបប្រទះនឹងបញ្ហាគ្រុន ហើយក៏ឈានដល់ក្តៅខ្លួន នឹងតែងកើតក្តីព្រួយបារម្ភចំពោះសុខភាពទារកក្នុងផ្ទៃ។ ជាក់ស្តែង ដោយមិនច្បាស់ថា តើកត្តាអ្វីដែលនាំឱ្យក្តៅខ្លួន ហើយម៉ាក់ៗគួរធ្វើដូចម្តេចបែលជួបបញ្ហាសុខភាពទាំងនេះ។

ចម្លើយរបស់អ្នកវេជ្ជបណ្ឌិតជំនាញផ្នែកសម្ភពរបស់មន្ទីរពេទ្យកាល់ម៉ែត្រ បានលើកឡើងថា ការក្តៅខ្លួនក្នុងអំឡុងពេលមានផ្ទៃពោះ គឺជាការកើនឡើងកម្តៅខ្លួន លើស ឬស្មើ ៣៧.៨ អង្សារសេ វាជាកម្តៅធម្មតាសម្រាប់ស្ត្រីពពោះប៉ុណ្នោះ។ មកដឹងអំពីមូលហេតុផ្សេងៗទៀត នៃរោគសញ្ញា និងវិធីការពារ ព្យាបាល ដល់អ្នកម្តាយកំពុងពរពោះខាងក្រោមគួរឈ្វេងយល់ក្នុងកំឡុងពេលមានផ្ទៃពោះ៖

១)មូលហេតុ៖

កត្តាដែលនាំអោយមានការកើនឡើងកំដៅក្នុងអំឡុងពេលមានផ្ទៃពោះ មានបីប្រភេទគឺ:

ក.មូលហេតុមិនសូវធ្ងន់ធ្ងរ៖

• រលាកត្រចៀក
• រលាកបំពង់ក
• រលាកទងសួត
• ផ្តាសាយធំ

ខ.មូលហេតុធ្ងន់ធ្ងរ៖

• ការរលាកតម្រងនោម
• ការរលាក ប្រដាប់បន្តពូជ
• ការរលាកស្រោមទឹកភ្លោះ
• ស្អូច, Toxoplasmose , cytomegalovirus , herpès , រលាកសួត ,ស្រឡទែន,រលាកថ្លើមប្រភេទ B ,C, របេង, listeriose , ជំងឺអេដស៍។

គ.មូលហេតុធ្ងន់ធ្ងរដែលតម្រូវអោយមានការវះកាត់បន្ទាន់មានដូចជាៈ

• រលាកខ្នែងពោះវៀន
• រលាកថង់ទឹកប្រមាត់

២)រោគសញ្ញា៖

អាការៈដែលអាចកើតមានឡើងគួបផ្សំជាមួយការកើនឡើងនៃកំដៅមាន

ក.សញ្ញានៃការពិបាកបត់ជើងតូចមានដូចជា:

• ពិបាកនោម
• នោមមិនអស់
• នោមក្រហាយ
• ឈឺចង្កេះ
• នោមមានឈាម

ខ.សញ្ញាផ្នែកប្រដាប់រំលាយអាហារ

• រាគរូស
• ក្អួត ចងោ្អរ
• ចុកពោះ

គ.សញ្ញាផ្លូវដង្ហើម

• ក្អក
• ហត់
• ពិបាកដកដង្ហើម
• ថប់ដើមទ្រូង

ឃ.សញ្ញានៃប្រដាប់បន្តពូជ

• ធ្លាក់សខ្លាំង មានក្លិនស្អុយ
• ការធ្លាក់ឈាម
• ការហូរខ្ទុះ

ចំពោះការបង្ករោគដោយប៉ារ៉ាស៊ីត វីរុស ឬបាក់តេរីមួយចំនួនធំ គឺមិនបណ្តាលអោយមានសញ្ញាតំអូញអ្វីទាំងអស់ ដូច្នេះ ទាមទារអោយស្ត្រីមានផ្ទៃពោះទាំងអស់ត្រូវមកពិនិត្យផ្ទៃពោះ និងធ្វើតេស្តឈាមរកមេរោគមួយចំនួន អោយបានទៀងទាត់ និងទាន់ពេលវេលា។

៣)កត្តាប្រឈម ហានិភ័យដែលអាចកើតមានឡើង បណ្តាលមកពីគ្រុនក្តៅក្នុងអំឡុងពេលមានផ្ទៃពោះមានដូចជាៈ

• អាចបណ្តាលអោយរលូតកូន
• កូនកើតមិនគ្រប់ខែ
• ទារកស្លាប់ក្នុងពោះ
• ជំងឺដែលអាចកើតមានលើទារក ដែលបណ្តាលមកពីការឆ្លងរោគពីម្តាយទៅកូន។

៤)វិធីការពារ និងព្យាបាល៖

• ត្រូវនៅអោយឆ្ងាយពីសត្វឆ្មា ឬសត្វអាចបង្ករោគមួយចំនួនទៀត
• មិនត្រូវបរិភោគ សាច់ឆៅ ឬបន្លែឆៅ ដែលលាងសម្អាតមិនបានស្អាតល្អ
• មិនត្រូវបរិភោគ អាហារផ្អាប់ ឬអាហាររក្សាក្នុងទូរទឹកកករយៈពេលយូរ ព្រោះវាមានផ្ទុកនូវប៉ារ៉ាស៊ីតមួយចំនួន
• ត្រូវនៅអោយឆ្ងាយពីក្មេង ឬកុមារដែលកើតអុតស្វាយ ឬស្អូចព្រោះបណ្តាលអោយឆ្លងបាន *ត្រូវមកពិនិត្យផ្ទៃពោះ និងពិនិត្យឈាមដើម្បីស្វែងរកមេរោគមួយចំនួន ដែលអាចបង្កហានិភ័យដល់ទារកក្នុងផ្ទៃ

ប្រសិនបើស្ត្រីមានផ្ទៃពោះ មានអាការៈក្តៅខ្លួន កំដៅលើស ឬស្មើ ៣៧.៨ អង្សាសេ ត្រូវមកជួបពិគ្រោះជាមួយវេជ្ជបណ្ឌិតជំនាញជាបន្ទាន់ ដើម្បីស្វែងរកមូលហេតុ និងទទួលបានការព្យាបាលអោយបានទាន់ពេលវេលា ជៀសវាងការបង្កគ្រោះថ្នាក់ដល់ម្តាយ និងទារកក្នុងផ្ទៃ៕