សុខភាពក្រពះពោះវៀនមិនល្អអាចរំខានដល់ការមករដូវ

2024-01-14 00:30:00
ចំនួនមតិ 0 | ចំនួនចែករំលែក 0

សុខភាពក្រពះពោះវៀនមានទំនាក់ទំនងបែបណាដល់វដ្ដរដូវ? សំណួរនេះប្រហែលជាធ្វើឲ្យគ្នាយើងឆ្ងល់មិនខាន តែវាជាការពិត សុខភាពភាពក្រពះពោះវៀនជាចំណែកមួយជួយនារីៗយើងមានរដូវទៀងទាត់ ប៉ុន្តែបើសុខភាពក្រពះពោះវៀនមិនល្អនឹងនាំឲ្យយើងមានរដូវមិនទៀងដែរ។ ហេតុអ្វី? តស់! ស្វែងយល់បន្ថែមទាំងអស់គ្នា។

ក្រពះពោះវៀនរបស់យើងមានឥទ្ធិពលទៅលើសមត្ថភាពរំលាយអាហារ ការស្រូបសារជាតិចិញ្ចឹមរបស់រាងកាយ និងការធ្វើមេតាប៉ូលិស។ បន្ថែមពីនេះសុខភាពក្រពះពោះវៀនក៏មានឥទ្ធិពលលើវដ្ដរដូវផងដែរ។ ការសិក្សាមួយចុះផ្សាយកាលពីឆ្នាំ២០១៤ ដោយបណ្ណាល័យជាតិវេជ្ជសាស្រ្តអាមេរិកបានបង្ហាញថាអតុល្យភាពបាក់តេរីក្នុងពោះវៀនអាចនាំឲ្យមានអតុល្យភាពអ័រម៉ូន។ ការណ៍នេះនាំឲ្យជះឥទ្ធិពលដល់ការមករដូវ ដែលអាចធ្វើឲ្យរដូវមកមិនទៀងទាត់។ ហេតុនេះហើយ បើយើងចង់ឲ្យរដូវមកទៀងទាត់ល្អ ក៏ត្រូវយកចិត្តទុកដាក់លើសុខភាពក្រពះពោះវៀនដូចគ្នា។

ក្រពះពោះវៀនជាអ្នករំលាយអាហារដែលយើងបានញ៉ាំ និងជួយស្រូបយកសារជាតិចិញ្ចឹមសម្រាប់ទ្រទ្រង់ដល់រាងកាយ។ ពេលក្រពះពោះវៀនយើងមានសុខភាពល្អ បាក់តេរីក្នុងពោះវៀនក៏មានតុល្យភាព ហើយនៅពេលក្រពះពោះវៀនមានសុខភាពមិនល្អធ្វើឲ្យតុល្យភាពរបស់បាក់តេរីនេះប្រែប្រួល។ ការប្រែប្រួលតុល្យភាពបាក់តេរីក្នុងពោះវៀនអាចមកពីរបបអាហារមិនល្អ ភាពតានតឹងផ្លូវចិត្ត គេងមិនគ្រប់គ្រាន់ និងការប្រើថ្នាំផ្សះច្រើនជាដើម។ នៅពេលអតុល្យភាពបាក់តេរីកើតឡើង វានឹងធ្វើឲ្យមានបញ្ហាដល់ប្រព័ន្ធរំលាយអាហារ ហើយឈានដល់មានបញ្ហាដល់សុខភាពទូទៅផងដែរ។

ដើម្បីជួយឲ្យក្រពះពោះវៀនយើងមានសុខភាពល្អ ត្រូវកាត់បន្ថយស្រ្តេស ញ៉ាំអាហារសម្បូរដោយបន្លែ និងផ្លែឈើ ព្រមទាំងញ៉ាំទឹកឲ្យបានគ្រប់គ្រាន់ផងដែរ។

ប្រភព៖ ប្រភព ប្រែសម្រួល៖ សុខា