កូនក្នុងផ្ទៃទម្ងន់៤គីឡូជាសញ្ញាល្អ ឬជាសញ្ញាត្រូវយកចិត្តទុកដាក់បន្ថែម?

2024-01-01 01:45:00
ចំនួនមតិ 0 | ចំនួនចែករំលែក 0

ការមានកូនក្នុងផ្ទៃថ្លោសពេករហូតដល់ទម្ងន់៤គីឡូក្រាមគឺមិនមែនជាសញ្ញាល្អសម្រាប់ម៉ាក់ៗ និងកូននោះទេ។ បើមានករណីបែបនេះម៉ាក់ៗគួរប្រឹក្សាជាមួយគ្រូពេទ្យឲ្យបានដិតដល់ព្រមទាំងតាមដានសុខភាពម្ដាយ កូន និងប្រឹក្សាជម្រើសនៃការសម្រាលឲ្យបានល្អ។

ហេតុអ្វីបានកូនក្នុងផ្ទៃទម្ងន់បួនគីឡូក្រាមជាហានិភ័យ? អ្នកស្រីវេជ្ជបណ្ឌិត រ៉ាវុឌ្ឃ សោភារចនា ឯកទេសសម្ភព និងរោគស្ត្រី នៃមន្ទីរសម្ភពរ៉ូស មានប្រសាសន៍ថានៅពេលកូនក្នុងផ្ទៃធំ ឬថ្លោសពេកមានទម្ងន់រហូតដល់បួនគីឡូក្រាម អាចប្រឈមបញ្ហាច្រើនពេលសម្រាល។ បញ្ហាទីមួយគឺថាបើម្ដាយសម្រាលដោយធម្មជាតិ កូនអាចប្រឈមនឹងបញ្ហាជាប់ស្មាពិបាកសម្រាល។

អ្នកស្រីវេជ្ជបណ្ឌិតពន្យល់ថា៖ «ពេលខ្លះអាងត្រគាកម្ដាយសមស្របសម្រាប់ក្បាលកូន ប៉ុន្តែនៅពេលដែលចេញតែក្បាលមក វាធ្វើឲ្យស្មាដែលកូនធាត់ទ្រលុកទ្រលន់ហ្នឹងវាជាប់នឹងអាងត្រគាករបស់ស្រ្តី ដែលចំណុចនេះវាគ្រោះថ្នាក់បំផុតសម្រាប់ស្រ្តី...ពេលខ្លះវាប្រឈមនឹងការបាក់ឆ្អឹងដងកាំបិតរបស់ទារក និងពេលខ្លះមិនអាចយកទារកចេញ ដោយសារកូនធាត់ខ្លាំងពេកហើយចាល់ជាប់នៅនឹងអាងត្រគាក»។

អ្នកស្រីវេជ្ជបណ្ឌិតបន្តថា៖ «ហើយបើសិនជាមិនជាប់ស្មាទៅចុះ ហើយពេលកូនចេញរួចហើយ ក៏ប្រឈមនឹងការធ្លាក់ឈាម ព្រោះពេលកូនធំខ្លាំងពេកនៅក្នុងស្បូន ទំហំស្បូនក៏រីកធំទៅតាមហ្នឹង ហើយស្បូនមិនអាចរួមតូចបានទាន់ពេលវេលា ធ្វើឲ្យមានការធ្លាក់ឈាម»។

បើតាមអ្នកស្រីវេជ្ជបណ្ឌិត ស្រ្តីដែលមានកូនថ្លោសខ្លាំងបែបនេះគឺប្រឈមនឹងការវះកាត់ខ្ពស់ ប៉ុន្តែហានិភ័យធ្លាក់ឈាមអំឡុងពេលវះកាន់នៅតែមានដូចគ្នា។ អ្នកស្រីវេជ្ជបណ្ឌិតណែនាំថា បើសិនជាម៉ាក់ៗមានកូនថ្លោសបែបនេះគឺត្រូវស្វែងរកការប្រឹក្សា និងសេវាថែទាំឲ្យបានត្រឹមត្រូវដើម្បីសុវត្ថិភាពម្ដាយ និងកូន។

ស្វែងយល់បន្ថែចុចទីនេះ!

ប្រភព៖ ប្រភព អត្ថបទ៖ សុខា