ការប្រែប្រួលអ័រម៉ូនអាចប៉ះពាល់សុខភាពស្បែកបែបណា?

2023-11-23 00:24:00
ចំនួនមតិ 0 | ចំនួនចែករំលែក 0

អ័រម៉ូនប្រែប្រួលកើតឡើងនៅពេលកម្រិតអ័រម៉ូនមួយ ឬច្រើនមានតិចពេក ឬច្រើនពេកនៅក្នុងរាងកាយ។ ការប្រែប្រួលនេះអាចប៉ះពាល់ដល់សុខភាពទូទៅ។ អ័រម៉ូនគឺជាសារធាតុគីមីដែលផលិតដោយក្រពេញនៅក្នុងប្រព័ន្ធអង់ដូគ្រីន ដែលអាចធ្វើដំណើរតាមចរន្តឈាមទៅកាន់ជាលិកា និងសរីរាង្គផ្សេងៗ ពាំនាំសារប្រាប់ដល់សរីរាង្គទាំងនោះថាត្រូវធ្វើអ្វីខ្លះ និងត្រូវធ្វើនៅពេលណា។

តួនាទីរបស់អ័រម៉ូន

អ័រម៉ូនអឺស្រ្តូហ្សែន៖ អ័រម៉ូនអឺស្រូហ្សែន ឬគេនិយមហៅថាអ័រម៉ូនភេទស្រី ដើរតួសំខាន់ក្នុងការគ្រប់គ្រងជាតិទឹក ឬសំណើមលើស្បែក ជំរុញការផលិតខូឡាជែន និងគាំទ្រដល់សុខភាពទូទៅផ្សេងទៀត។ អ័រម៉ូនប្រភេទនេះជួយឲ្យស្បែកមានសភាពទន់រលោក និងក្មេងជាងវ័យ។

អ័រម៉ូនប្រូជេស្តេរ៉ូន៖ អ័រម៉ូនមួយប្រភេទនេះមានជាប់ពាក់ព័ន្ធនឹងការគ្រប់គ្រងលើវដ្ដរដូវ និងត្រៀមខ្លួនសម្រាប់ការមានផ្ទៃពោះ។ ជាមួយគ្នានេះដែរ អ័រម៉ូននេះក៏មានឥទ្ធិពលលើការផលិតខ្លាញ់ក្នុងស្បែកផងដែរ។

អ័រម៉ូនតេស្តូស្តេរ៉ូន៖ ជាទូទៅគេហៅអ័រម៉ូននេះថាអ័រម៉ូនភេទប្រុស ប៉ុន្តែរាងកាយស្រ្តីក៏ផលិតអ័រម៉ូននេះដែរ។ អ័រម៉ូននេះមានឥទ្ធិពលលើការផលិតខ្លាញ់ ហើយបើសិនជាស្រ្តីមានបញ្ហាអតុល្យភាពអ័រម៉ូនមួយប្រភេទនេះអាចធ្វើឲ្យកើតមុនបានដែរ។

ចំពោះមុនអ័រម៉ូន ឬគេស្គាល់ថាជាមុនកើតលើមនុស្សពេញវ័យ ច្រើនកើតលើអ្នកមានអាយុចន្លោះពី២០ ទៅ៥០ឆ្នាំ។ មុនប្រភេទនេះមានកើតលើមុខ លើខ្នង ស្មា និងទ្រូង។ មុនអ័រម៉ូនកើតឡើងពីការកើនឡើងខ្លាំងនៃខ្លាញ់ក្នុងក្រពេញខ្លាញ់។

មុនអ័រម៉ូនអាចកើតទាំងលើបុរស និងស្រ្តី ប៉ុន្តែភាគច្រើនកើតលើស្រ្តី ស្រ្តីមានផ្ទៃពោះ និងស្រ្តីជិតដល់វ័យអស់រដូវ។ ដើម្បីដោះស្រាយបញ្ហាមុនអ័រម៉ូន យើងត្រូវសម្អាតស្បែកឲ្យបានស្អាតជានិច្ច ផ្លាស់ប្ដូររបបអាហារ ឬត្រូវប្រឹក្សាជាមួយគ្រូពេទ្យដើម្បីបានទទួលការព្យាបាលត្រឹមត្រូវដូចជាការព្យាបាលដោយឡាស៊ែជាដើម។

ប្រភព៖ Cleveland Clinic ប្រែសម្រួល៖ សុខា