វដ្ដរដូវស្រីៗប្រែប្រួលទៅតាមវ័យបែបនេះ

2023-11-08 00:00:00
ចំនួនមតិ 0 | ចំនួនចែករំលែក 0

ស្រីៗយើងពិតជាបានដឹងហើយថាវដ្ដរដូវរបស់ខ្លួនមានការប្រែប្រួលបែបណា គិតតាំងពីពេលពេញវ័យមក។ វដ្ដរដូវអាចមានការប្រែប្រួលទៅតាមវ័យ និងកត្តាមួយចំនួនផ្សេងទៀត។ យ៉ាងណាថ្ងៃនេះ កញ្ញា លើកយកតែការប្រែប្រួលវដ្ដរដូវតាមវ័យមកបកស្រាយប៉ុណ្ណោះ។ តស់ស្វែងយល់ទាំងអស់គ្នា។

វ័យជំទង់៖ ក្នុងវ័យនេះវដ្ដរដូវរបស់ក្មេងស្រីអាចមានភាពមិនទៀងទាត់ច្រើន។ ជាធម្មតាអាចត្រូវការពេលប្រហែលមួយឆ្នាំ ឬរហូតដល់ក្រពេញភីតូរីសនៅក្នុងខួរក្បាល និងក្រពេញអូវែធ្វើការជាមួយគ្នាបាន ដើម្បីផលិតកម្រិតអ័រម៉ូនបានត្រឹមត្រូវ។ ដូចគ្នាវ័យជំទង់ជាវ័យមួយដែលកម្រិតអ័រម៉ូនមានការប្រែប្រួលលឿន ហើយក៏អាចស៊ីពេលពីរបីឆ្នាំដែរទម្រាំវដ្ដរដូវអាចមានភាពទៀងទាត់។

វ័យខ្ទង់២០ឆ្នាំ៖ ចូលដល់វ័យនេះវដ្ដរដូវអាចមានសភាពទៀងទាត់ជាធម្មតា។ ប៉ុន្តែក៏នៅមានស្រ្តីមួយចំនួនមិនអាចមានវដ្ដរដូវ២៨ថ្ងៃ បានរាល់ខែនោះដែរ។ យ៉ាងណា រយៈពេលជាទូទៅនៃវដ្ដរដូវមានចន្លោះពី២៣តៅ៣៥ថ្ងៃ ហើយរយៈពេលមករដូវអាចមានពី៣ទៅ៧ថ្ងៃ។

វ័យខ្ទង់៣០ឆ្នាំ៖ សម្រាប់វ័យនេះចំនួនមេជីវិតញីក៏ចាប់ផ្ដើមធ្លាក់ចុះដែរ ពិសេសចាប់ផ្ដើមធ្លាក់ចុះខ្លាំងនៅអាយុពាក់កណ្ដាល៣០ឆ្នាំ។ រយៈពេលនៃវដ្ដរដូវអាចមានចន្លោះពី២៣ទៅ៣៥ថ្ងៃដែរ ប៉ុន្តែរោគសញ្ញាមុនមករដូវអាចធ្ងន់ធ្ងរជាងកាលនៅវ័យក្មេង។

ចូលដល់វ័យខ្ទង់៤០៖ មកដល់វ័យនេះចំនួនមេជីវិតញីក៏បន្តធ្លាក់ចុះ ហើយក៏ជាពេលជិតដល់វ័យអស់រដូវផងដែរ។ ថ្វីបើស្រ្តីភាគច្រើនអស់រដូវនៅវ័យខ្ទង់៥០ឆ្នាំ ប៉ុន្តែក៏មានស្រ្តីមួយចំនួនអស់រដូវមុនចូលដល់អាយុនេះផងដែរ។

វ័យខ្ទង់៥០ឆ្នាំ៖ ចូលដល់វ័យនេះ គឺជាវ័យអស់រដូវហើយ ដែលស្រ្តីភាគច្រើនអាចអស់រដូវនៅអាយុ៥១ឆ្នាំ ឬលើសនេះ។ ពេលវេលាអស់រដូវនេះ ស្រ្តីក៏លែងមានការបង្កកំណើតទៀតដែរ។ វដ្ដរដូវក៏លែងមានបន្តទៀត ហើយក្រពេញអូវែក៏ឈប់បញ្ចេញមេជីវិតញីដែរ។

ប្រភព៖ ប្រភព ប្រែសម្រួល៖ សុខា