តើអំបិលមានឥទ្ធិពលបែបណាលើសម្ពាធឈាម បេះដូងនិងតម្រងនោម?

2023-10-17 10:15:00
ចំនួនមតិ 0 | ចំនួនចែករំលែក 0

គ្នាយើងពិតជាធ្លាប់ឮការណែនាំ ឬការប្រាប់តៗគ្នាថា «ការញ៉ាំប្រៃអាចធ្វើឲ្យលើសសម្ពាធឈាម» ប៉ុន្តែអ្នកទាំងអស់គ្នាដឹងទេថាការញ៉ាំប្រៃប៉ះពាល់តម្រងនោម និងបេះដូងបែបណាដែរ?

តម្រងនោមរបស់យើងច្រោះឈាមជិត១២០លីត្រក្នុងមួយថ្ងៃៗ។ តម្រងនោមជួយចម្រោះជាតិពុល និងសារជាតិទឹកដែលមិនត្រូវការចេញពីកោសិកាក្នុងរាងកាយ រួចក៏បញ្ជូនសារធាតុទាំងនោះទៅក្នុងប្លោកនោម។

ការញ៉ាំអំបិលច្រើន ឬអាហារប្រៃៗច្រើនអាចធ្វើឲ្យតម្រងនោមពិបាកក្នុងការចម្រោះជាតិទឹក ដែលអាចធ្វើឲ្យជាតិទឹកទាំងនោះកើនឡើងក្នុងប្រព័ន្ធរាងកាយ និងធ្វើឲ្យកើនឡើងសម្ពាធឈាមដែរ។

វដ្ដនៃការខូចខាត

នៅពេលយើងញ៉ាំអាហារប្រៃ ឬអំបិលលើសកម្រិតក្នុងរយៈពេលយូរ អាចធ្វើឲ្យមានបញ្ហាសម្ពាធឈាមខ្ពស់ ឬលើសសម្ពាធឈាម ដែលអាចធ្វើឲ្យសរសៃឈាមចង្អៀត។ ពេលនោះឈាម និងអុកស៊ីសែន ហូរទៅកាន់សរីរាង្គសំខាន់ៗរបស់រាងកាយក៏ថយចុះ។ ដូចនេះ បេះដូងក៏ខំបូមឈាមកាន់តែខ្លាំង ដែលនាំឲ្យសម្ពាធឈាមកាន់តែកើនឡើងថែមទៀត។

នៅពេលសម្ពាធឈាមចេះតែបន្តកើនឡើងក្នុងរយៈពេលយូរ គឺបេះដូងក៏ទទួលរងសម្ពាធកាន់តែខ្លាំងដែរ។ សម្ពាធនេះអាចធ្វើឲ្យបេះដូងរីកនៅថតខាងឆ្វេង និងធ្វើឲ្យសាច់ដុំបេះដូងចុះខ្សោយ។

ក្នុងករណីដែលបញ្ហាលើសសម្ពាធឈាមមិនបានទទួលកាព្យាបាលត្រឹមត្រូវ នោះបញ្ហានេះក៏អាចធ្វើឲ្យខូចខាតដល់ជញ្ជាំងរបស់សរសៃឈាម ដែលនឹងចាប់ផ្ដើមប្រមូលផ្ដុំដោយខ្លាញ់ ជាហេតុនាំឲ្យមានជំងឺបេះដូង និងមានលទ្ធភាពកាន់តែខ្ពស់ក្នុងការកើតជាបញ្ហាគាំងបេះដូង និងគ្រោះថ្នាក់សរសៃឈាមខួរក្បាល។

ការលើសសម្ពាធឈាមនិងបញ្ហាតម្រងនោម

បញ្ហាលើសសម្ពាធឈាម បានដាក់សម្ពាធបន្ថែមទៅលើតម្រងនោមដូចគ្នាក្នុងការចម្រោះជាតិទឹក ដែលការណ៍អាចនាំឲ្យតម្រងនោមមានសម្លាក និងកាត់បន្ថយសមត្ថភាពរបស់តម្រងនោមក្នុងការគ្រប់គ្រងជាតិទឹក។ បើសិនជាសម្ពាធលើតម្រងនោមនៅតែបន្តមានមិនឈប់ អ្នកមានបញ្ហាលើសសម្ពាធឈាមអាចនឹងមានជំងឺតម្រងនោម ឬខ្សោយតម្រងនោមដែរ។

ប៉ុន្តែមនុស្សភាគច្រើនមិនបានដឹងថាខ្លួនមានបញ្ហាតម្រងនោមឬអត់នោះទេដរាបណាមិនទាន់មានចេញរោគសញ្ញាមួយចំនួនដូចជាល្ហិតល្ហៃ ពិបាកគេង មិនសូវនោម ឬនោមមានឈាម ហើមជើង កជើង ឬហើមជុំវិញភ្នែក។

បើសិនជាគ្នាយើងមានចេញរោគសញ្ញាណាមួយក្នុងចំណោមនេះ ហើយជាពិសេសសម្រាប់អ្នកមានអាយុលើសពី៦០ឆ្នាំ កំពុងមានបញ្ហាលើសសម្ពាធឈាម ឬមានជំងឺទឹកនោមផ្អែម គួរប្រឹក្សាជាមួយគ្រូពេទ្យអំពីសុខភាពតម្រងនោម និងបរិមាណអំបិលដែលត្រូវញ៉ាំ។

ប្រភព៖ Cleveland Clinic ប្រែសម្រួល៖ សុខា