រួមភេទលើកទី១ អាចមានផ្ទៃពោះអត់?

2023-10-17 06:13:00
ចំនួនមតិ 0 | ចំនួនចែករំលែក 0

សម្រាប់ក្មេងស្រី ឬមនុស្សស្រីក្នុងវ័យបន្តពូជ ក៏អាចនឹងមានផ្ទៃពោះបានដែរបើទោះបីជាការរួមភេទធ្វើឡើងជាលើកដំបូងក៏ដោយ។ រាល់ពេលដែលមនុស្សស្រីរួមភេទតាមទ្វារមាស ជាមួយនឹងបុរសណាម្នាក់ ភាគីខាងស្រីនឹងប្រឈមទៅនឹងការមានផ្ទៃពោះ។ ទោះបីជាភាគីខាងប្រុសបានប្រើវិធីបាញ់ទឹកកាមនៅខាងក្រៅប្រដាប់ភេទខាងស្រី ឬដកលិង្គចេញពីប្រដាប់ភេទខាងស្រីមុនពេលចេញទឹកកាម ក៏នៅតែមានឱកាសធ្វើឲ្យភាគីខាងស្រីមានផ្ទៃពោះដូចគ្នា។

ក្រៅពីការប្រឈមនឹងការមានផ្ទៃពោះ ការរួមភេទមិនបានការពារ ទោះបីជាលើកដំបូងក៏ដោយក៏អាចប្រឈមនឹងជំងឺកាមរោគបានដែរ។ រាល់ពេលនៃការរួមភេទមិនថាតាមមាត់ តាមរន្ធគូទ ឬតាមទ្វារមាស គឺសុទ្ធតែអាចប្រឈមនឹងហានិភ័យកើតជំងឺកាមរោគបើសិនជាមិនបានការពារត្រឹមត្រូវ។

ដើម្បីបង្ការកុំឲ្យមានផ្ទៃពោះ ឬឆ្លងជំងឺកាមរោគ យើងត្រូវអនុវត្តវិធីមួយចំនួន៖

តមការរួមភេទ៖ វិធីដែលល្អបំផុតមិនឲ្យមានផ្ទៃពោះ ឬឆ្លងជំងឺកាមរោគគឺតមការរួមភេទ ឬកុំឆាប់ប្រឡូកក្នុងការរួមភេទមិនថារួមភេទតាមមាត់ តាមរន្ធគូទឬទ្វារមាស។

ប្រើប្រាស់ស្រោមអនាម័យ៖ បើសិនជាយើងត្រូវការរួមភេទ ហើយមិនទាន់ចង់បានកូន ឬមិនចង់ប្រឈមនឹងការឆ្លងជំងឺកាមរោគ ការប្រើប្រាស់ស្រោមអនាម័យជាជម្រើសល្អបំផុតមួយ។ ភាគីខាងស្រី ត្រូវនិយាយជាមួយដៃគូឲ្យបានច្បាស់លាស់ពីការប្រើប្រាស់ស្រោមអនាម័យនៅពេលរួមភេទ ព្រោះថាការប្រើប្រាស់ស្រោមជាវិធីការពារទាំងមិនឲ្យមានផ្ទៃពោះ និងឆ្លងជំងឺកាមរោគ។ ការប្រើប្រាស់ស្រោមអនាម័យគឺជាការចាំបាច់ មិនមានថាប្រើក៏បានអត់ក៏បាននោះទេ បើយើងមិនទាន់ចង់បានកូន ឬបារម្ភពីការឆ្លងជំងឺកាមរោគ។

ក្នុងករណីរួមភេទដោយមិនបានការពារ ឬមានបញ្ហាបែកស្រោមពេលរួមភេទ បើភាគីខាងស្រីបារម្ភពីបញ្ហាមានផ្ទៃពោះដោយចៃដន្យគួរស្វែងរកឱសថសម្រាប់លេបដែលគេស្គាល់ថាជាថ្នាំ៧២ម៉ោង ឬប្រឹក្សាជាមួយគ្រូពេទ្យ ហើយបើសង្ស័យថាដៃគូមានជំងឺកាមរោគ មិនថាភាគីខាងស្រី ឬប្រុស គួរស្វែងរកការធ្វើតេស្តជំងឺកាមរោគដូចគ្នា។

មួយវិញទៀតក្នុងករណីធ្លាប់រួមភេទ ឬគិតថានឹងបន្តការរួមភេទ ភាគីខាងស្រីគួរប្រឹក្សាជាមួយគ្រូពេទ្យពីវិធីពន្យារកំណើតបើមិនទាន់ចង់មានផ្ទៃពោះ។ ដូចគ្នាដែរ ការពិភាក្សាជាមួយគ្រូពេទ្យអំពីការធ្វើតេស្តរកជំងឺកាមរោគ និងវិធីការពារជំងឺកាមរោគក៏គួរធ្វើដែរ ដើម្បីធានាថាយើង និងដៃគូរបានរួមភេទដោយសុវត្ថិភាពនៅពេលខាងមុខ។

ប្រភព៖ kidshealth ប្រែសម្រួល៖ សុខា