ហេតុអ្វីពេលមករដូវខ្ញុំឧស្សាហ៍មានអារម្មណ៍ចង់ក្អួត ឬចង្អោរ?

2023-09-25 04:11:12
ចំនួនមតិ 0 | ចំនួនចែករំលែក 0

ស្រីៗយើងមួយចំនួនអាចជួបងាការៈចង្អោរ វិលមុខ ឬឈឺក្បាលពេលកំពុងមករដូវពិតអត់? គ្រូពេទ្យមិនទាន់អាចបញ្ជាក់បានទេថាមូលហេតុអ្វីបានជាកើតមានអាការៈបែបនេះ ប៉ុន្តែការប្រែប្រួលអ័រម៉ូនអំឡុងពេលមករដូវនេះហើយដែលគេជឿថាជាដើមចមនៃអាការៈទាំងនេះ។

អាការៈឈឺចាប់ពេលមករដូវ ឬមុនមករដូវ

អាការៈឈឺចាប់មុនមករដូវ ឬពេលមករដូវអាចមានសភាពផ្សេងៗគ្នាពីស្រ្តីម្នាក់ទៅម្នាក់ទៀត។ ស្រីៗយើងខ្លះអាចមានអារម្មណ៍មិនស្រួលខ្លួន និងឈឺចាប់មុនពេលមករដូវ ឬក៏ពេលមករដូវនៅខែនីមួយៗតែម្ដង។ សម្រាប់ស្រ្តីខ្លះទៀតអាចមានអាការៈឈឺចាប់ ឬមិនស្រួលខ្លួនបន្ទាប់ពីថ្ងៃធ្លាក់មេជីវិតញីទៅវិញ។ អាការៈទាំងនេះជាទូទៅអាចកើតមានក្នុងរង្វង់១០ទៅ១៦ថ្ងៃមុនពេលចាប់ផ្ដើមធ្លាក់ឈាមរដូវ ដែលវាអាស្រ័យលើវដ្ដរដូវរបស់ស្រីៗយើងម្នាក់ៗ។ ចំពោះអាការៈឈឺចាប់មុន ឬពេលមករដូវអាចមានកម្រិតពីស្រាលទៅធ្ងន់ និងមានរយៈពេលពី១ទៅ៣ថ្ងៃ។

រោគសញ្ញាផ្សេងៗទៀតមានដូចជា ចង្អោរ រាក ទល់លាមក វិលមុខ ក្អួត អស់កម្លាំង ឈឺក្បាល ចុកពោះ ហើមពោះ និងរួយខ្នងជាដើម។

ហេតុអ្វីមានអាការៈទាំងនេះ?

អ្នកជំនាញជឿថាការប្រែប្រួលកម្រិតគីមីជាក់លាក់មួយចំនួនក្នុងរាងកាយអំឡុងពេល និងមុនពេលមករដូវអាចមានទំនាក់ទំនងនៅនឹងអាការៈទាំងនេះ។

Prostaglandins គឺជាមួលេគុលដែលដើរតួជាអ្នកនាំសារធាតុគីមីនៅក្នុងរាងកាយ ដូចជាអ័រម៉ូនជាដើម។ បើសិនជាយើងមានអារម្មណ៍ថាក្ដៅខ្លួន នោះមានន័យថារាងកាយយើងកំពុងប្រឆាំងនឹងការឆ្លងវីរុស បាក់តេរី ឬមេរោគផ្សិត។ ប្រព័ន្ធភាពស៊ាំយើងនឹងដំណើការអង់ទីករ និងសារធាតុគីមីផ្សេងទៀតដូចជា prostaglandin ដើម្បីបំផ្លាញវីរុស ឬបាក់តេរីទាំងនោះ។ ពេលស្ថានការណ៍បែបនេះកើតឡើង រាងកាយរបស់យើងនឹងឡើងកម្ដៅ។

ដូចគ្នាដែរ រាងកាយយើងផលិត prostaglandin នៅជញ្ជាំងស្បូនពេលយើងចាប់ផ្ដើមមករដូវ។ មូលេគុលនេះបានភ្ជាប់ទៅនឹងធ្មួលក្នុង hypothalamus ដែលជាផ្នែកមួយនៃខួរក្បាលដែលគ្រប់គ្រងលើសីតុណ្ហភាពរាងកាយ។ ការណ៍នេះក៏អាចធ្វើឲ្យស្រីៗយើងមួយចំនួនមានអារម្មណ៍ក្ដៅខ្លួនតិចតួចផងដែរ។

Prostaglandin ក៏អាចបង្កឲ្យមានការកន្ទ្រាក់សាច់ដុំក្នុងស្បូនខ្លាំងដែលនាំឲ្យមានអាការៈឈឺចាប់ មិនស្រួលខ្លួន ចង្អោរ និងរាកផង សម្រាប់ស្រ្តីមួយចំនួន។ បន្ថែមពីនេះបើសិនជាការកន្ទ្រាក់នេះមានសភាពខ្លាំងក្លាពេក វាក៏អាចសង្កត់ទៅលើសរសៃឈាមនៅជុំវិញ និងកាត់ផ្ដាច់ការផ្គត់ផ្គង់អុកស៊ីសែនមួយចំនួន ជាហេតុធ្វើឲ្យស្រ្តីមួយចំនួនមានអាការៈចុករមួលក្នុងពោះ។

អ័រម៉ូនអឺស្រ្តូហ្សែន កម្រិងអ័រម៉ូនអឺស្រ្តូហ្សែននឹងមានការប្រែប្រួលខ្លាំងនៅរយៈពេលមុន និងអំឡុងពេលមករដូវ ដែលជាហេតុនាំឲ្យស្រីៗយើងខ្លះអាចប្រឈមនឹងបញ្ហាអស់កម្លាំង ចុកពោះ និងអារម្មណ៍ប្រែប្រួល។ ដូចគ្នាដែរ ពេលធ្លាក់មេជីវិត ក៏អាចធ្វើឲ្យរាងកាយស្រីៗយើងឡើងកម្ដៅពីរបីថ្ងៃដែរ។

ដោះស្រាយបញ្ហានេះដោយរបៀបណា? យើងអាចប្រើប្រាស់ថ្នាំបំបាត់ការឈឺចាប់មួយចំនួនដែលមិនត្រូវការវេជ្ជបញ្ជា និងរកទិញបាននៅតាមឱសថស្ថានស្របច្បាប់។ ការស្អំទឹកក្ដៅឧណ្ហៗលើពោះ ក៏ជាមធ្យោបាយមួយផ្សេងទៀតជួយបំបាត់អាការៈឈឺចុកចាប់នេះដែរ។ ដូចគ្នាដែរ ការហាត់ប្រាណ មិនជក់បារី កម្រិតការផឹកភេសជ្ជៈមានជាតិកាហ្វេអ៊ីន និងគ្រឿងស្រវឹងក៏ចូលរួមកាត់បន្ថយអាការៈទាំងនេះបានដែរ។ យ៉ាងណា បើអាការៈទាំងនេះ រំខានដល់ការរស់នៅ ឬការឈឺចាប់មានសភាពធ្ងន់ធ្ងរ ស្រីៗយើងគួរប្រឹក្សាជាមួយគ្រូពេទ្យជំនាញទើបជាការប្រសើរ។

ប្រភព៖ webmd | healthline ប្រែសម្រួល៖ ទូច សុខា