លើសជាតិខ្លាញ់ពីរប្រភេទនេះ អាចប៉ះពាល់សុខភាពបេះដូង

2023-09-19 01:36:12
ចំនួនមតិ 0 | ចំនួនចែករំលែក 0

ពេលនិយាយដល់ការលើសជាតិខ្លាញ់យើងគួរស្វែងយល់ថាអ្វីទៅជាខ្លាញ់ និងហេតុអ្វីរាងកាយយើងលើសជាតិខ្លាញ់។ កូលេស្តេរ៉ូល និង Triglycerides គឺជាប្រភេទខ្លាញ់ដូចគ្នា ហើយបើខ្លាញ់ទាំងពីរនេះលើសក្នុងរាងកាយអាចធ្វើឲ្យយើងមានហានិភ័យកើតជំងឺបេះដូង។

តើកូលេស្តេរ៉ូល និង Triglycerides ខុសគ្នាបែបណា? លេស្តេរ៉ូល និង Triglycerides ជាប្រភេទខ្លាញ់ដូចគ្នា តែមាននាទីខុសគ្នាសម្រាប់រាងកាយ។ លេស្តេរ៉ូលប្រើសម្រាប់បង្កើតកោសិកា និងអ័រម៉ូនជាក់លាក់មួយចំនួន ខណៈដែលTriglycerides មាននាទីផ្ទុកកាឡូរីដែលមិនប្រើប្រាស់ និងផ្ដល់ថាមពលដល់រាងកាយ។

កូលេស្តេរ៉ូលមានពីរប្រភេទ គឺកូលេស្តេរ៉ូលអាក្រក់ឬLDL និងកូលេស្តេរ៉ូលល្អ ឬHDL។ កូលេស្តេរ៉ូលអាក្រក់រួមចំណែកធ្វើឲ្យមានខ្លាញ់ក្នុងសរសៃឈាម ដែលអាចនាំឲ្យមានហានិភ័យនៃបញ្ហាគាំងបេះដូង គ្រោះថ្នាក់សរសៃឈាមខួរក្បាល និងជំងឺសរសៃឈាមបេះដូងជាដើម។ ចំណែកកូលេស្តេរ៉ូលល្អវិញមាននាទីជួយនាំកូលេស្តេរ៉ូលអាក្រក់ចេញពីសរសៃឈាម និងបញ្ជូនត្រឡប់ទៅថ្លើម ជាកន្លែងដែលត្រូវបំបែក និងបញ្ចេញពីរាងកាយ។

ពេលយើងមានទាំងបញ្ហាលើសកូលេស្តេរ៉ូលអាក្រក់ និង Triglycerides ក្នុងពេលតែមួយ យើងនឹងប្រឈមខ្ពស់ទៅនឹងជំងឺបេះដូង។

កត្តាមួយចំនួននាំឲ្យមានការលើសកូលេស្តេរ៉ូលអាក្រក់ និង Triglycerides៖

របបអាហារមិនល្អ៖ ការញ៉ាំអាហារមានជាតិខ្លាញ់ឆ្អែត និងខ្លាញ់ចម្រាញ់ច្រើននាំឲ្យយើងកើតមានកូលេស្តេរ៉ូលអាក្រក់។ ចំណែកការញ៉ាំអាហារមានជាតិស្ករខ្ពស់ក៏អាចនាំថ្លើមផលិតកូលេស្តេរ៉ូលអាក្រក់ច្រើន និងខ្លាញ់Triglycerides និងបែរជាបន្ថយកូលេស្តេរ៉ូលល្អទៅវិញ។
ធាត់លើសទម្ងន់៖ ការធាត់លើសទម្ងន់បានរួមចំណែកនៃការកើនឡើងកម្រិតកូលេស្តេរ៉ូលអាក្រក់ និង Triglycerides។
មិនសូវមានសកម្មភាពរាងកាយ៖ មិនហាត់ប្រាណ មិនបានធ្វើការបញ្ចេញញើស គឺជាកត្តាមួយរួមចំណែកធ្វើឲ្យយើងឡើងទម្ងន់ និងនាំឲ្យមានការកើនឡើងកម្រិតកូលេស្តេរ៉ូលអាក្រក់ និង Triglycerides។

ដើម្បីបញ្ជុះកម្រិត កូលេស្តេរ៉ូលអាក្រក់ និង Triglycerides ការផ្លាស់ប្ដូរបែបបទនៃការរស់នៅគឺជារឿងចាំបាច់។ ការកែប្រែនេះមានដូចជាញ៉ាំអាហារល្អៗចំពោះសុខភាពសម្បូរដោយបន្លែ ផ្លែឈើ អាហារមានជាតិខ្លាញ់ទាប និងមានស្ករទាបជាដើម។ ក្រៅពីនេះការហាត់ប្រាណជាប្រចាំ ក៏ជារឿងចាំបាច់ដើម្បីជួយឲ្យរាងកាយមាំមួន រក្សាទម្ងន់ខ្លួនបានល្អ កាត់បន្ថយហានិភ័យធាត់លើសទម្ងន់។ ក្រៅពីនេះការប្រឹក្សាជាមួយគ្រូពេទ្យកាន់តែចាំបាច់បើសិនជាយើងមានបញ្ហាលើសជាតិខ្លាញ់នេះ ករណីខ្លះគ្រូពេទ្យអាចចេញវេជ្ជបញ្ជាឲ្យប្រើថ្នាំដើម្បីគ្រប់គ្រងជាតិខ្លាញ់។

ប្រភព៖ Cleveland Clinic | CDC អត្ថបទ៖ ទូច សុខា