ដូរទម្លាប់ញេចមុន បើមិនចង់ឲ្យស្បែកមុខកាន់តែដុនដាប

2023-09-10 00:04:00
ចំនួនមតិ 0 | ចំនួនចែករំលែក 0

គ្នាយើងមិនតិចនាក់ទេដែលមិនអាចទ្រាំបានពេលឃើញមុនគឺដឹងតែចង់ញេចតែម្ដង។ ប៉ុន្តែគ្នាយើងធ្លាប់បានដឹងទេថាការញេចមុនអាចបង្កផលអវិជ្ជមានដល់សុខភាពស្បែកមុខបែបណាខ្លះ? ថ្ងៃនេះ កញ្ញា នឹងនាំអ្នកទាំងអស់គ្នាឲ្យបានដឹងពីបញ្ហានេះ។

ការញេចមុនអាចបង្កផលប៉ះពាល់ដល់ស្បែកមុខមួយចំនួន៖

របួស៖ ការញេចមុនលើផ្ទៃមុខអាចបង្កឲ្យមានរបួសនៅលើស្បែកមុខ ដែលរបួសនេះអាចនឹងបង្កឲ្យមានជាស្នាមលើផ្ទៃមុខតែម្ដង។

ឆ្លងមេរោគ៖ ការញេញមុនក៏អាចបង្កឲ្យមានហានិភ័យឆ្លងមេរោគដែរ ហើយការឆ្លងមេរោគនេះអាចនឹងធ្វើមុនកើតឡើងបន្ថែមទៀត។ មុនកើតឡើងថែមទៀតនេះអាចមកពីការញេចមុនធ្វើខ្លាញ់លើផ្ទៃមុខរាលទៅកន្លែងផ្សេង ដៃមិនស្អាតក៏បន្ថែមភាពកខ្វក់ និងបាក់តេរីលើផ្ទៃមុខបន្ថែមទៀតនាំឲ្យមុនកើតកាន់តែច្រើន។

ស្នាមលើមុខ៖ ការញេចមុនអាចធ្វើស្បែកបាត់បង់ជាលិកានៅពេលជាសះឡើងវិញ ដែលការបាត់បង់ជាលិកានេះហើយអាចនាំឲ្យផ្ទៃមុខមានស្នាមដោយសារមុន។

ឡើងក្រមរលើមុខ៖ គ្នាយើងធ្លាប់សម្គាល់ឬអត់ថាពេលខ្លះការញេចមុនអាចនាំឲ្យមានចេញទាំងខ្ទុះ និងឈាម និងក្រោយមកទៀតក៏កើតជាក្រមរតែម្ដង។ ការណ៍នេះក៏នឹងធ្វើឲ្យមុនមិនងាយជាសះស្បើយ និងអាចនាំឲ្យមានស្នាមឡើមុខទៀតផង។

ក្នុងករណីគ្នាយើងកើតមុន ហើយគិតថារំខាន មិនបាត់ទៅវិញ ឬបន្តកើតកាន់តែច្រើន គ្នាយើងមិនគួរញេច ឬប្រើផលិតផលផ្ដេសផ្ដាសនោះទេ គឺយកល្អគួរស្វែងរកការពិគ្រោះយោបល់ជាមួយគ្រូពេទ្យសើស្បែក ដើម្បីបានការព្យាបាលត្រឹមត្រូវ។

ប្រភព៖ Harvard | ប្រភព អត្ថបទ៖ ទូច សុខា