ហេតុអ្វីការថែទាំសុខភាពក្រោយសម្រាលជារឿងចាំបាច់?

2023-08-29 02:35:35
ចំនួនមតិ 0 | ចំនួនចែករំលែក 0

រយៈពេលក្រោយសម្រាលគឺរាប់ចាប់ពីពេលសម្រាលរហូតដល់៦សប្ដាហ៍ ឬប្រាំបីសប្ដាហ៍ក្រោយសម្រាល។ ក្នុងរយៈពេលនេះការថែទាំសុខភាពម្ដាយទាំងផ្លូវកាយ និងផ្លូវចិត្តគឺជារឿងចាំបាច់ ដើម្បីឲ្យម្ដាយអាចមានសុខភាពល្អដូចដើមវិញ។

ក្នុងដំណាក់កាលនេះបើមិនបានថែទាំសុខភាពឲ្យបានដិតដល់ទេម៉ាក់ៗអាចប្រឈមនឹងបញ្ហាសុខភាពមួយចំនួន។ បញ្ហាសុខភាពទាំងនោះអាចមានដូចជាថប់បារម្ភ ធ្លាក់ឈាម ឡើងសម្ពាធឈាម ឬបញ្ហាពិបាកបំបៅដោះកូនជាដើម។ តើការថែទាំក្រោយសម្រាលមានអ្វីខ្លះ?

ក្នុងដំណាក់កាលនេះស្រ្តីជាម្ដាយមានការប្រែប្រួលច្រើនទាំងផ្នែករាងកាយ និងអារម្មណ៍។ ដូចនេះការយកចិត្តទុកដាក់លើរបបអាហារល្អចំពោះសុខភាព សម្រាកឲ្យបានគ្រប់គ្រាន់ ធ្វើលំហាត់ប្រាណតាមការណែនាំរបស់គ្រូពេទ្យគឺជារឿងត្រូវយកចិត្តទុកដាក់។

បន្ថែមពីនេះការទៅជួបគ្រូពេទ្យដើម្បីពិនិត្យសុខភាពក៏ជារឿងចាំបាច់ដែរ បើទោះបីជាយើងមិនមានបញ្ហាអ្វីក៏ដោយ ព្រោះថាបញ្ហាសុខភាពក្រោយសម្រាលមួយចំនួនអាចដឹងបានដរាបណាមានការពិនិត្យដោយគ្រូពេទ្យជំនាញ។

មួយវិញទៀតបើសិនជាម៉ាក់ៗជួបបញ្ហាអាមរម្មណ៍ប្រែប្រួល បាត់បង់ចំណង់អាហារ អស់កម្លាំងខ្លាំង បាត់បង់ភាពរីករាយបន្ទាប់ពីសម្រាលរួច ពិបាកមើលថែកូន និងគ្មានអារម្មណ៍ធ្វើកិច្ចការផ្ទះមួយចំនួនបាន នោះទំនងជាម៉ាក់ៗកំពុងមានបញ្ហាថប់បារម្ភហើយ។ ការណ៍នេះ ម៉ាក់ៗគួរស្វែងរកអ្នកប្រឹក្សាយោបល់ពីមនុស្សជុំវិញខ្លួន ឬត្រូវទៅជួបពិគ្រោះជាមួយគ្រូពេទ្យក្នុងករណីអាការៈមិនថមថយ។

ជារួមការថែទាំខ្លួនក្រោយសម្រាលនេះមិនត្រឹមតែមានសារសំខាន់សម្រាប់សុខភាពម្ដាយទេ តែក៏សំខាន់សម្រាប់សុខភាពទារកដែរ បើម្ដាយមានសុខភាពល្អ ការបំបៅដោះកូន និងការមើលថែកូនក៏បានល្អដូចគ្នា។

ប្រភព៖ healthline | mayoclinic អត្ថបទ៖ ទូច សុខា