ជំងឺមហារីកថ្លើម ជាប្រភេទជំងឺដែលគ្រូពេទ្យឯកទេសជួបប្រទះក្នុងការព្យាបាលជាញឹកញាប់ និងជាជំងឺមួយដែលកាចសាហាវ និងមានភាពលំបាកនៅក្នុងការថែទាំព្យាបាល និងបានកំពុងតែសម្លាប់ជីវិតមនុស្សជាច្រើនលើពិភពលោកក្នុងមួយឆ្នាំៗ។

ថ្ងៃនេះ កញ្ញានឹងបកស្រាយអំពីជំងឺមហារីកថ្លើម រោគសញ្ញា និងមូលហេតុបង្កនៃជំងឺនេះ ដើម្បីចែកជូនទាំងអស់គ្នាឲ្យបានដឹង។

អ្វីទៅជាជំងឺមហារីកថ្លើម?

ជំងឺមហារីកថ្លើម ជាជំងឺដែលកើតចេញពីសាច់ថ្លើមខ្លួនឯង ឬឆ្លងរាលដាលពីសរីរៈដទៃ(Métastase)។ ជំងឺមហារីកថ្លើមមានច្រើនប្រភេទ ក្នុងចំណោមនោះមានតែមួយប្រភេទប៉ុណ្ណោះ ដែលកើតមានញឹកញាប់ និងកាចសាហាវជាងគេ គឺជាពួកប្រភេទកើតចេញពីកោសិកាថ្លើមដែលក្រិនឈ្មោះថា CHC (Carcinome Hépato-Cellulaire)។

មូលហេតុអ្វីខ្លះដែលបង្កឲ្យមានជំងឺមហារីកថ្លើម?

កត្តាមួយចំនួន ដែលជាមូលហេតុបង្កជាជំងឺមហារីកថ្លើមមាន៖

• ការពិសាស្រា និងជក់បារី ដែលបណ្តាលឲ្យក្រិនថ្លើម
• ជំងឺរលាកថ្លើម បេ និង សេ (B, C)
• ជំងឺទឹកនោមផ្អែម បារ៉ាស៊ីត
• វិទ្យុសកម្ម
• សារធាតុគីមីមួយចំនួន
• ការសាយភាយពីសរីរាង្គដទៃ

តើជំងឺមហារីកថ្លើមមានរោគសញ្ញាអ្វីខ្លះ?

រោគសញ្ញានៃជំងឺមហារីកថ្លើមមានដូចជា៖

• ឈឺពោះ
• អស់កំលាំង មិនសូវឃ្លាន ស្លេកស្លាំង ស្រកទម្ងន់
• មានដុំ (តាមរយៈស្ទាបប៉ះនៅពោះ)

តើអ្នកជំងឺមហារីកថ្លើម គួរទទួលការព្យាបាលបែបណា?

សព្វថ្ងៃមានវិធីសាស្ត្រជាច្រើន ត្រូវបានគេអនុវត្តនៅប្រទេសជឿនលឿន៖

• វិធីវះកាត់ ឬប្តូរថ្លើម
• បាញ់កាំរស្មី និងចាក់ថ្នាំគីមីដោយមិនបាច់វះកាត់ ករណីចំពោះដុំតូចៗ

តើយើងគួរធ្វើបែបណាខ្លះដើម្បីការពារខ្លួនពីជំងឺមហារីកថ្លើម?

យើងអាចអនុវត្តវិធីមួយចំនួន ដើម្បីការពារជំងឺមហារីកថ្លើម៖

• ចាក់វ៉ាក់សាំងការពារជំងឺរលាកថ្លើម
• បញ្ឈប់ការពិសាស្រា និងបារី
• តាមដានសុខភាព ចំពោះការប្រើថ្នាំពន្យាកំណើត
• កាត់បន្ថយការប្រើប្រាស់ និងឃ្លាតឲ្យឆ្ងាយពីសម្ភារៈ និងទីតាំងមានរលកវិទ្យុសកម្ម ដែលប៉ះពាល់ដល់សុខភាព ជាទូទៅជំងឺមហារីកថ្លើមច្រើនកើតឡើងដោយស្ងៀមស្ងាត់ ហេតុដូចនេះត្រូវគប្បីតានដានសុខភាពជាប្រចាំ និងពិគ្រោះយោបល់ជាមួយវេជ្ជបណ្ឌិតឯកទេស ដើម្បីធ្វើរោគវិនិច្ឆ័យ និងព្យាបាលឲ្យបានទាន់ពេលវេលា ប្រកបដោយប្រសិទ្ធភាព។