សិស្សរៀនចប់ថ្នាក់ទី១២ ពីសាលា CISC នឹងទទួលសញ្ញាបត្រពីអូស្រ្តាលីដែលមានតម្លៃស្មើនឹងសញ្ញបត្រទុតិយភូមិ

2023-08-10 10:12:09
ចំនួនមតិ 0 | ចំនួនចែករំលែក 0

សាលាខេមប្រ៊ិជអន្តរជាតិកម្ពុជា (CISC) ជាសាលាដំបូងគេនៅកម្ពុជាដែលបានទទួលអាជ្ញាបណ្ណសម្រាប់ការអនុវត្តកម្មវិធីសិក្សារបស់អូស្រ្តាលី ដោយសិស្សដែលបញ្ចប់ថ្នាក់ទី១២នៅ CISC នឹងទទួលបានវិញ្ញាបនបត្រអប់រំរបស់អូស្រ្តាលី។

វិញ្ញាបនបត្រអប់រំរបស់អូស្រ្តាលី (WACE) គឺសម្ដៅលើវិញ្ញាបនបត្រមធ្យមសិក្សាទុតិយភូមិ (បាក់ឌុប) ហើយវិញ្ញបនបត្រនេះត្រូវបានទទួលស្គាល់ជាអន្តរជាតិ។ បើតាមសេចក្ដីប្រកាសព័ត៌មានរបស់សាលាបានឲ្យដឹងថា៖ «WACE ត្រូវបានទទួលស្គាល់ជាអន្តរជាតិដោយសាកលវិទ្យាល័យជាច្រើន ស្ថាប័នផ្សេងៗ និងអ្នកផ្ដល់ការបណ្ដុះបណ្ដាលផ្សេងៗទៀត ហើយជាពិសេសត្រូវបានទទួលស្គាល់ដោយក្រសួងអប់រំ យុវជន និងកីឡាក្នុងប្រទេសកម្ពុជា»។

អាជ្ញាបណ្ណនេះ CISC បានទទួលពីស្ថានទូតអូស្រ្តាលីកាលពីថ្ងៃទី ៩ ខែ សីហា ឆ្នាំ២០២៣ និងបានប្រគល់ មក CISC តាម រយៈ ឯកឧត្តម Andreas Zurbrugg ឯកអគ្គរដ្ឋទូតរងអូស្ត្រាលីប្រចាំកម្ពុជា។

គួរបញ្ជាក់ថាសាលាខេមប្រ៊ិជអន្តរជាតិកម្ពុជា និងក្រសួងអប់រំប្រទេសអូស្រ្តាលីបានប្រកាសជាផ្លូវការនូវទំនាក់ទំនងដៃគូសហការរួមគ្នានេះ ដែលធ្វើឲ្យCISC គឺជាសាលាដំបូងគេបង្អស់នៅក្នុងប្រទេសកម្ពុជាដែលទទួលបានអាជ្ញាបណ្ណនេះ។

អត្ថបទ៖ ទូច សុខា