ស្បែកមុខប្រភេទធម្មតាជាស្បែកដែលមានតុល្យភាពមិនស្ងួតពេក ឬខ្លាញ់ពេក។ ស្បែក​ប្រភេទនេះ​មិន​ងាយ​ប្រឈមនឹងការឡើងមុន មិន​មានរន្ធញើសធំៗ ឬឡើងខ្លាញ់ខ្លាំងពេកនោះទេ។

អ្នក​ដែលមានស្បែកធម្មតា គឺ​មានរន្ធញើសតូច ស្បែករលោង និងមិនងាយនឹងប្រតិកម្ម ឬមានស្នាមអុជខ្មៅនោះឡើយ។ ទោះបីជាប្រភេទស្បែកនេះហាក់មានភាពអំណោយផលជាងប្រភេទស្បែកផ្សេងៗទៀតក៏ដោយ អ្នកមានស្បែកមុខធម្មតា ក៏នៅតែត្រូវការការថែទាំស្បែកដែលមានតុល្យភាព ដើម្បីរក្សាស្បែកមុខឲ្យមានសុខភាពល្អ។

ថ្ងៃនេះ កញ្ញានាំយកគន្លឹះមួយចំនួនសម្រាប់ថែទាំស្បែកធម្មតាឲ្យមានសុខភាពល្អ៖

១. លាងសម្អាតផ្ទៃមុខ៖ សម្អាតដោយប្រើទឹកក្តៅឧណ្ឌៗ ដោយប្រើហ្វូមលាងមុខប្រភេទស្រាល ដែលមិនបង្កការរលាក។ យើងត្រូវលាងសម្អាតថ្មមៗ ដោយមិនត្រដុះ ឬរូសខ្លាំងៗ។

២. ការពារពីកម្ដៅ​ព្រះអាទិត្យ៖ ជៀសវាងការត្រូវកម្តៅថ្ងៃខ្លាំង គួរប្រើឡេការពារកម្តៅថ្ងៃ និងប្រើសម្លៀកបំពាក់ជិតៗ។

៣. ការពារស្បែកកុំឲ្យស្ងួត៖ គួរផឹកទឹកឱ្យបានច្រើន ហើយប្រើក្រែមផ្តល់សំណើមដល់ស្បែក។

៤. កាត់បន្ថយភាពតានតឹង៖ ភាពតានតឹង ឬស្រ្តេសអាចប៉ះពាល់ដល់សុខ​ភាពស្បែករបស់យើង​ និងប្រព័ន្ធរាងកាយ។

៥. គេងឱ្យបានគ្រប់គ្រាន់៖ អ្នកជំនាញណែនាំឲ្យគេងឲ្យបាន ៩ម៉ោងក្នុងមួយយប់សម្រាប់មនុស្សវ័យជំទង់ និង៧-៨ម៉ោងសម្រាប់មនុស្សពេញវ័យ។

**៦.ទទួលការពិគ្រោះជាមួយគ្រូពេទ្យ៖៏៏ ពិគ្រោះជាមួយវេជ្ជបណ្ឌិតជំនាញ​ ប្រសិនបើអ្នកសម្គាល់ឃើញការផ្លាស់ប្តូរចម្លែកណាមួយចំពោះស្បែក ដូចជាកន្ទួល ឬប្រជ្រុយដែលផ្លាស់ប្តូរទំហំ ឬពណ៌។