Yang Mi លុបកម្មវីធីចោលព្រោះហ្វេនរត់ជាន់គ្នាដូចស្រមោច

2022-09-06 02:40:00
ចំនួនមតិ 0 | ចំនួនចែករំលែក 0

វត្តមានរបស់កំពូលតារាសម្ដែងស្រីចិន Yang Mi បានធ្វើឲ្យផ្អើលទស្សនិកជនសម្រុកមកផ្សារទំនើបមួយ ធ្វើឲ្យជ្រួលច្របល់សូម្បីតែប៉ូលីសក៏មិនអាចបង្ក្រាបបាន។

កាលពីថ្ងៃទី១ ខែកញ្ញាកន្លងទៅនេះ បណ្ដាញព័ត៌មាន Sina បានរាយការណ៍ថា តារាសម្ដែងស្រីជួរមុខចិន Yang Mi មានគម្រោងចូលរួមក្នុងកម្មវីធីបង្ហាញម៉ូដសំលៀកបំពាក់របស់ប្រេន Moco ធ្វើឡើងនៅខេត្ត Hunan។

យ៉ាងណាក្ដី គម្រោងនេះត្រូវបានលុបចោលមុនពេលកម្មវីធីចាប់ផ្ដើម២ម៉ោង ព្រោះអ្នករៀបចំកម្មវិធីគ្រប់គ្រងចំនួនទស្សនិកជនលែងបាន។ ជាក់ស្ដែង ផ្សារទំនើបកម្ពស់៤ជាន់ត្រូវបានហ៊ុមព័ទ្ធដោយអ្នកគាំទ្ររបស់អ្នកម្ដាយកូន១ និងបង្កើតជាភាពចលាចល ព្រោះតែចង់ឃើញមុខតារាស្រីរូបនេះ។

រូបភាពថតវីដេអូរបស់អ្នកមានវត្តមានផ្ទាល់បង្ហាញឲ្យឃើញថា មនុស្សរត់ដូចមានគ្រោះទឹកជំនន់មកដល់នៅពេល ស្រីស្អាតអាយុ ៣៥មកដល់។ ទោះបីជាកងកម្លាំងប៉ូលីសបានមកដល់ជួយរៀបចំហើយក៏ដោយ តែភាពចលាចលនៅតែមាន ដែលតម្រូវឲ្យកម្មវិធីត្រូវលុបចោល។

មនុស្សរាប់ពាន់នាក់ក្រោយពេលឮដំណឹងថា តួរឿងនិស្ស័យស្នេហ៍ទេវតាបីជាតិមានកម្មវិធីនៅ Hunan បានជិះពីផ្លូវឆ្ងាយមកដើម្បីជួបនាងប៉ុន្មាននាទី តែទីបំផុតក៏ត្រូវទៅវិញ ព្រោះអ្នកគាំទ្រមកច្រើនពេក៕