ផ្ទុះការតវ៉ា ព្រោះខនសឺតរបស់ BTS ធ្វើឲ្យសណ្ឋាគារឡើងថ្លៃ ៣០ដង

2022-08-31 02:35:00
ចំនួនមតិ 0 | ចំនួនចែករំលែក 0

ក្រុមអ្នកគាំទ្ររបស់ក្រុមចម្រៀងល្បីឈ្មោះកូរ៉េ BTS បានធ្វើការតវ៉ាដល់សាលាក្រុង Busan ព្រោះតម្លៃសណ្ឋាគារកើនឡើងលើសលប់។

កាលពីថ្ងៃទី ២៩ ខែសីហាមុននេះ បណ្ដាញព័ត៌មាន Nate បានរាយការណ៍ថា សណ្ឋគារ និងសេវាផ្សេងៗនៅទីក្រុង Busan ប្រទេសកូរ៉េកំពុងរងការតវ៉ាជាខ្លាំង ដោយសារឡើងថ្លៃយ៉ាងតិច១០ដងព្រោះការប្រគុំតន្ត្រីរបស់ក្រុមចម្រៀងប្រុសល្បីឈ្មោះ BTS។

តាមនោះដែរ ក្រុមចម្រៀង៧សមាជិក នឹងប្រារព្ធកម្មវិធីសម្ដែងនៅខែតុលាខាងមុខដើម្បីជួយទីក្រុង Busan ដណ្ដើមបានតំណែងម្ចាស់ផ្ទះកម្មវិធី World Expo ក្នុងឆ្នាំ ២០៣០។ ទោះបីជាសំបុត្រចូលមើលគឺឥតគិតថ្លៃក៏ដោយ តែត្រូវចុះឈ្មោះមុនទើបអាចចូលមើលបាន ដោយគ្រោងមានអ្នកមកទស្សនាសរុប ១១០០០០នាក់។

ឆ្លៀតឱកាសកំពូលក្រុមចម្រៀងមកសម្ដែង ម្ចាស់សណ្ឋាគារ និងផ្ទះសំណាក់នានាបានឡើងថ្លៃពី១០ទៅ ៣០ដង ដែលធ្វើឲ្យគេតវ៉ាជាខ្លាំង។ តាមនោះដែរ សណ្ឋាគារនៅជិតកន្លែងខនសឺតមានតម្លៃពី ៥ពាន់ ទៅ១ម៉ឺនដុល្លារ១យប់ ដែលកើនឡើងដល់ទៅ៣០ដងនៃតម្លៃធម្មតា។

រីឯផ្ទះសំណាក់នៅឆ្ងាយពីកន្លែងខនសឺត១០គីឡូម៉ែត្រមានតម្លៃ៦០០ដុល្លារ ក្នុង១យប់ ឡើង១០ដងប្រៀបនឹងធម្មតា។ មនុស្សជាច្រើនបានធ្វើការតវ៉ាដល់សាលាក្រុង Busan ដោយសារការឡើងថ្លៃហួសហេតុនេះ៕

ប្រភព៖ news.zing.vn ប្រែសម្រួល៖ Caramel