៨ វិធីដ៏មានប្រសិទ្ធិភាពខ្ពស់ ដើម្បីយកឈ្នះលើការភ័យខ្លាចនៃការនិយាយជាសាធារណៈ

  • 2022-06-09 01:00:00
  • ចំនួនមតិ 0 | ចំនួនចែករំលែក 0

នៅពេលដែលលើកឡើងអំពីការនិយាយជាសាធារណៈ វាអាចជារឿងមួយដែលធ្វើឲ្យមនុស្សមួយចំនួនមានការភ័យខ្លាចបំផុត អ្នកខ្លះអាចមិនខ្លាច ឬខ្លះទៀតខ្លាចតិច និងច្រើនគឺវាអាស្រ័យទៅលើបុគ្គលនោះ។ វាអាចជារឿងពិបាកក្នុងការឈរនៅចំពោះមុខមនុស្សមួយក្រុមធំ ឬមនុស្សរាប់សិបនាក់ មិនថាអ្នកស្គាល់ពួកគេឬអត់ ពេលខ្លះអ្នកនឹងមានការភ័ចខ្លាចចូលមកខ្លះៗ។

មិនថានៅកន្លែងការងារ ឬកាលៈទេសៈណាក៏ដោយ នៅក្នុងឆាកជីវិតរស់នៅអ្នកនឹងត្រូវតែប្រឈមមុខក្នុងការជួបមនុស្សជាច្រើន ហើយធ្វើការថ្លែងសុន្ទរកថាទៅកាន់ពួកគេ។ តើអ្នកមានវិធីអ្វីខ្លះដើម្បីយកឈ្នះការភ័យខ្លាចនៅពេលដែលមានការនិយាយជាសាធារណៈ? និងមានយុទ្ធសាស្ត្រអ្វីខ្លះទៀតដើម្បីទទួលបានភាពជឿជាក់ទៅលើជំនាញនិយាយជាសាធារណៈ?

អ្នកជំនាញបានពន្យល់ពីវិធីសាស្ត្រល្អៗទាំងប្រាំបីយ៉ាងដើម្បីធ្វើឲ្យអ្នកមានទំនុកចិត្តលើជំនាញនៃការនិយាយជាសាធារណៈរបស់អ្នកបាន៖

១. ការរៀបចំយ៉ាងហ្មត់ចត់ ធ្វើឲ្យប្រសើរឡើងនូវជំនាញនិយាយជាសាធារណៈរបស់អ្នក ពីព្រោះអ្នក​នឹង​មិន​សូវ​មាន​ការ​ភ័យ​ខ្លាច​ទេ ប្រសិន​បើ​អ្នក​បាន​គ្រោង​ទុក​នូវ​អ្វី​ដែល​អ្នក​នឹង​និយាយនោះ។

២. ដឹងថាអ្វីជាគោលបំណងរបស់អ្នក ជំនាញនៃការនិយាយជាសាធារណៈកាន់តែអាចគ្រប់គ្រងបានល្អប្រសើរនៅពេលដែលអ្នកចំណាយពេលគិត និងរៀបចំផែនការឲ្យបានហ្មត់ចត់ ហើយរឿងដំបូងដែលអ្នកត្រូវគិតនោះគឺអ្វីជាគោលបំណងដែលអ្នកចង់និយាយ។

៣. ជ្រើសរើសប្រធានបទដែលអ្នកចូលចិត្តនិយាយ ប្រសិនបើអ្នកមានជម្រើសក្នុងការជ្រើសរើសប្រធានបទមួយ ជ្រើសរើសអ្វីដែលអ្នកចូលចិត្តដែលអាចពិភាក្សាដោយចំណេះដឹង វាធ្វើឲ្យមានភាពងាយស្រួល ហើយទស្សនិកជននឹងទទួលបាននូវភាពរីករាយជាមួយសុន្ទរកថាជាសាធារណៈរបស់អ្នក។

៤. សរសេរសុន្ទរកថារបស់អ្នកទុកជាមុន នៅពេលអ្នកបង្កើតទម្លាប់សរសេរបទបង្ហាញរបស់អ្នក វានឹងជួយបង្កើនជំនាញនិយាយជាសាធារណៈរបស់អ្នក ហើយវា​ក៏​ជា​ឧបករណ៍​ដ៏​អស្ចារ្យ​មួយ​ដែល​អាច​សម្រាល​ការ​ភ័យ​ខ្លាច​របស់​អ្នក​បាននៅពេល​អ្នក​កំពុង​និយាយ។

៥. ហាត់សមនៅមុខកញ្ចក់ដើម្បីមើលជំនាញនិយាយជាសាធារណៈរបស់អ្នក ប្រសិនបើអ្នកមានការភ័យខ្លាចក្នុងការធ្វើវានៅចំពោះមុខសាធារណៈជន សូមព្យាយាមហាត់សមនៅមុខកញ្ចក់ វានឹងធ្វើឲ្យអ្នកកាន់តែមានទំនុកចិត្តនៅថ្ងៃដែលអ្នកធ្វើសុន្ទរកថានោះ។

៦. និយាយឲ្យច្បាស់នឹងផ្ដោតទៅលើទស្សនិកជនជាចម្បង កុំសម្លឹងមើលក្រសែភ្នែកឲ្យសោះ គ្រាន់តែផ្តោតផ្នែកខាងលើក្បាលរបស់ពួកគេទាំងអស់គ្នា ហើយម្នាក់ៗនឹងមានអារម្មណ៍ថាអ្នកកំពុងនិយាយទៅកាន់ពួកគេដោយផ្ទាល់។

៧. ត្រូវចាំថាញញឹមនឹងបង្ហាញចិត្តរំភើប ជំនាញ​នៃការ​និយាយ​ជា​សាធារណៈ​​ល្អ​គឺត្រូវភ្ជាប់​ទំនាក់ទំនង​ជាមួយ​អ្នក​ស្តាប់​ដោយ​អារម្មណ៍ ហើយអ្នក​ធ្វើ​បែប​នោះ​ដោយ​ការញញឹម និង​សាទរ​បង្ហាញទស្សនិកជននូវភាពបើកចំហ និងចំណង់ចំណូលចិត្តរបស់អ្នកចំពោះអ្វីដែលអ្នកកំពុងតែនិយាយ។

៨. ប្រើការលេងសើចនៅពេលដែលសមរម្យ ការនិយាយកំប្លែងក៏អាចបញ្ចៀសពីការភ័យខ្លាចនៃការនិយាយជាសាធារណៈរបស់អ្នកបានដែរ វានឹងបន្ធូរបន្ថយភាពតានតឹងរបស់អ្នក ប្រសិនបើអ្នកធ្វើវាប្រកបដោយភាពត្រឹមត្រូវ ហើយទស្សនិកជននឹងកាន់តែចូលចិត្តអ្នក។

ពេលខ្លះក្នុងជីវិតនៅរបស់អ្នក អ្នកត្រូវតែមានការនិយាយនៅមុខទស្សនិកជន ឬក្រុមមនុស្សជាច្រើន មិន​ថា​សម្រាប់​ការងារ ឬ​ឱកាស​ពិសេស​ណាមួយនៅក្នុង​ក្រុមគ្រួសារ​របស់​អ្នក​ឡើយ វា​អាច​ធ្វើ​ឲ្យ​អ្នក​មានការភ័យ​ខ្លាចបន្ដិចបន្ដួច ដូច្នេះអ្នកអាចមកសាកល្បងប្រើគន្លឹះទាំងអស់ខាងលើនេះ និងគន្លឹះដ៏មានតម្លៃផ្សេងៗទៀតជាច្រើន ដើម្បីជួយពង្រឹងអារម្មណ៍របស់អ្នកឲ្យមានភាពងាយស្រួលជាងមុនក្នុងការនិយាយជាសាធារណៈនៅពេលណាមួយ៕

ចុចអានបន្ត៖ វិធីដោះស្រាយកុំឲ្យស្ត្រេស បើអ្នកទទួលរងសម្ពាធខ្លាំងពេកនៅកន្លែងធ្វើការ

អត្ថបទ៖ Chrel Den

អត្ថបទពេញនិយម